Izehhiden 34

1 N Dawud, umi issniɛmiř, igga ixef nnes d abuhaři zzat i wudem n Abimilik, wenni i xas yuẓẓřen ařami yuyur netta. 2 Alif. Necc xseɣ ad barkeɣ i SIDI řebda, aṣebbiḥ nnes ad yiři deg uqemmum inu břa qeṭṭu. 3 Bit. Řeɛmar inu ad iṣebbeḥ i SIDI. Imhinen ad as sřen u ad farḥen. 4 Gimel. Semɣarem akidi SIDI, ejj aneɣ ad nessuɛřa Isem nnes jmiɛ. 5 Dalit. Necc arzuɣ x SIDI u Netta yarra-dd xafi, ifekk ayi zi marra innexřiɛen inu. 6 Hi. Nitni xezzaren ɣares uca ceɛceɛen, iɣembab nsen war ddikkwiřen zewɣen s useḍḥi ɛemmarṣ. 7 Zayin. Řmeskin-a danita iřaɣa u SIDI isřa ɣares, ifekk i-t zi marra řeḥṣarat nnes. 8 Xit. lmalak n SIDI iquwwar s řmargeḥ nnes x yinni t itteggʷeden, Netta ifekk i-ten. 9 Tit. Qasem uca xzarem, aqa SIDI icna. Sseɛd n weryaz wenni ɣares yarekkwařen. 10 Yud. Ggʷedem SIDI, a kenniw, imqeddasen nnes, maɣar inni t itteggʷeden war ten ittxeṣṣi walu. 11 Kaf. Iyraden imeẓyanen tteḥwajen, daysen řaẓ, maca inni yarezzun x SIDI, war ten ittxeṣṣi walu zi marra min iǧan d řxar. 12 Lamid. Asem-dd, a, kenniw iḥenjiren, sřem-dd ɣari! Necc ad awem ssřemdeɣ tiggʷudi n SIDI. 13 Mim. Man wen i iǧan d aryaz wenni di iǧa meẓri di tudart, wenni ittexsen ussan n tudart nnes ḥima ad iẓar řxar? 14 Nun. Mneɛ iřes nnec zi řɣar, uřa d iyencicen nnec zeg wawař n řɣecc. 15 Samix. Ḥeyyed x tuɛeffna u egg řxar, arzu x řehna u ḍfar i-t. 16 Ɛayin. Tiṭṭawin n SIDI x imseggaden, imezzuɣen nnes meyyřen ɣar iɣuyyan nsen. 17 Pi. Udem n SIDI ḍidd i yinni itteggen řɣar, ḥima ad ikkes řidaret daysen zi temmurt. 18 Tsadi. Nitni řaɣan u SIDI isřa ɣarsen, Netta ifekk i-ten zi marra řeḥṣarat nsen. 19 Quf. SIDI yudes i marra inni umi ittwarẓ wuř nsen, issenjam inni umi ittwařbez buḥbeř nsen. 20 Rix. Aṭṭas iǧan ifeqqusen n imseggaden, maca SIDI ifekk i-ten zzaysen marra. 21 Cin. Netta iḥeṭṭa iɣsan nnes marra, uřa d ijj zzaysen war ittareẓẓi. 22 Taf. Aqa řɣar ad ineɣ aɛeffan, inni icarrhen amsegged ad ttwaɛaqben. 23 SIDI ad ifdi řeɛmar n imsexxaren nnes, marra inni ɣares yarekkwařen, war ttwaɛaqben.