Izehhiden 33

1 Sřiweřwem i SIDI, a imseggaden, aṣebbaḥ d ict n telwizt i yinni iseggmen. 2 Qadam SIDI s řgambri, zehhdem as s lɛud u s lharpa ak-d ɛecra n ifiřan. 3 Ɣennjem as s yijj n yezři amaynu, irarem mliḥ s wesruddeḥ n řbuq. 4 Minzi awař n SIDI iseggem, marra min ittegg, ittegg i-t s řaman. 5 Netta ittexs tasegda d řḥeqq. Tammurt teccur s tmexsiwt icewwaren n SIDI. 6 Zeg wawař n SIDI ttwaggen ijenwan, zi Arruḥ n uqemmum nnes ttwaggent marra řɛeskarat nsen. 7 Netta issmun aman n řebḥar am yijj n weɣbar. Netta ixemmeř aman ihewřen deg ixxamen n řexzen. 8 Ad teggʷed marra tammurt zi SIDI, ad zzayes ggʷeden marra imezdaɣ n ddunect. 9 Maɣar Netta issawař uca aqa-t din, Netta ittamar uca ad yiři ibedd din. 10 SIDI ittareẓẓa ccwar n řegnus, issebḍeř ixarriṣen n řegnus. 11 Ccwar n SIDI ad iqqim ibedd i řebda, ixarriṣen n wuř nnes zi jjiř ař jjiř. 12 Sseɛd n řgens i ɣar iǧa AREBBI nnes d SIDI, řgens nni ixḍar i-t Netta d tasɣart i Yixef nnes. 13 SIDI ixezzar-dd zeg ujenna, ittwařa marra tarwa n bnadem. 14 Zi tzeddiɣt nnes imetnen ixezzar ɣar marra imezdaɣ n temmurt. 15 Netta weḥḥdes d wenni ikewwnen uř nsen, Netta iḥekkar i marra timegga nsen. 16 Ajeǧid war ittwassenjam s yijj n řɛeskar d ameqqran, bu-teɣruḍt war ittwafekki s jjehd aṭṭas. 17 Aqa d axarriq belli ayis ad dd-yawi asenjem, ɛad s jjehd nnes ameqqran war dd-ittenfekki. 18 Xzar, tiṭṭ n SIDI x yinni zzayes itteggʷeden, x yinni ittrajan tamexsiwt nnes icewwaren, 19 ḥima ad ifekk řeɛmar nsen zi řmewt, ḥima ad ten yejj qqimen ddaren di řaẓ. 20 Řeɛmar nneɣ ittraja SIDI, aqa Netta d aɛawen nneɣ d taseddart nneɣ i useřqi. 21 Maɣar zzayes ifarreḥ wuř nneɣ, minzi nettcař x Yisem nnes iqeddsen. 22 Ad xaneɣ tarsa tmexsiwt nnec icewwaren, a SIDI, am mammec i Cek nettraja.