Izehhiden 29

1 Azehhed n Dawud. Wcem i SIDI, arraw n irebbiten, wcem i SIDI aɛuǧi d tzemmar. 2 Wcem i SIDI aɛuǧi n Yisem nnes, bendqem zzat i SIDI di řɛezz n Zzawect iqeddsen. 3 Tmijja n SIDI teddarḍeḥ tiwa i waman, Arebbi n uɛuǧi isshemhem, SIDI, x waman aṭṭas. 4 Tmijja n SIDI teccur s jjehd, tmijja n SIDI teccur s řɛezz. 5 Tmijja n SIDI tᵉttareẓẓa ticejjura n tneglin, SIDI ittareẓẓa tineglin n Lubnan. 6 Yarra i-ten ad negzen am uɛejmi, adrar n Lubnan d wedrar n Siryun, am umeẓyan n iɣayḍ n řexřa ak-d waccawen d iziraren. 7 Tmijja n SIDI tneqqec iceɛɛařen n tmessi. 8 Tmijja n SIDI tarra řexřa ittarjiji, SIDI yarra řexřa n Qadac ittarjiji. 9 Tmijja n SIDI tarra tudadin ttarwent, Netta ittɛarra izeɣran, maca di Zzawect nnes Tameqqrant marra tessawař x uɛuǧi nnes. 10 SIDI tuɣa ittɣima am řqaḍi ɣar sseḥřet n waman, SIDI ittɣima am Ujeǧid i řebda. 11 SIDI ad iwc jjehd i řgens nnes, SIDI ad ibarek řgens nnes s řehna.