Izehhiden 28

1 N Dawud. I Cek umi řaɣiɣ, a SIDI, aqa Cek d Taṣḍart inu. War ttegg ca Ixef nnec war ɣari tᵉttesřid, ařami, s wesqar nnec zzati, war ttarekkwiseɣ ak-d yinni dd-ihekkwan deg wenḍeř. 2 Seř i tmijja n tutra inu, xmi xak ttřaɣiɣ, xmi kessiɣ ifassen inu ɣar Wexxam n Daxeř n Zzawect nnec Iqeddsen. 3 War d ayi ttjarri ak-d iɛeffanen, ak-d yinni itteggen řmuɛṣiyyet, inni issawařen x řehna ak-d jjiran nsen, am ɣarsen iǧa řɣar deg wuř nsen. 4 Xeǧeṣ asen ɛlaḥsab min tteggen, ɛlaḥsab tuɛeffna n tmegga nsen. Xeǧeṣ asen ɛlaḥsab řxedmet n ifassen nsen, ewc asen řmunet nsen i isdaheǧen, 5 minzi nitni war xezzaren ɣar řefɛayeř n SIDI, uřa ɣar řxedmet n ifassen nnes. Netta ad ten iɣḍeř, war ten ibenni ca. 6 Ad ittwabarek SIDI, maɣar Netta isřa i tmijja n tutra inu. 7 SIDI d řɛezz inu d taseddart inu n useřqi, uř inu ittceř xas uca ttwaɛawneɣ. Uř inu ineggez s řefraḥet, s yezři inu ad t qadiɣ. 8 SIDI d jjehd nsen, Netta d lburj ijehden n isenjimen i umedhun nnes. 9 Senjem řgens nnec, barek tasɣart nnec, arwes i-ten u arbu ten i řebda qaɛ.