Izehhiden 21

1 I umeqqran n imeɣnajen. Azehhed n Dawud. 2 A SIDI, ajeǧid ifarḥ s jjehd nnec, mammec ifarḥ aṭṭas s usenjem nnec! 3 Tewcid as meẓri n wuř nnes, Cek war tugid ca azaweg n iyencicen nnes. Silah. 4 Maɣar Cek tusid-dd i umsagar akides s lbarakat ccurent s řxar, teqqned as ttaj n wureɣ ittwaṣeffan x uzeǧif nnes. 5 Ittar ac tudart, tewcid as tt, tuzzeggart n wussan i řebda qaɛ. 6 Imɣar uɛuǧi nnes s usenjem nnec, tesszehhjed t s tissiqt d řɛezz. 7 Minzi Cek tarrid i-t d lbaraka tameqqrant i řebda, Cek teccured t s řefraḥet ɣar wudem nnec. 8 Maɣar ajeǧid ittcař x SIDI, war ittefriɣ s tmexsiwt icewwaren n Umɛuǧi x kuřci. 9 Afus nnec ad yaf marra řɛedyan nnec, afus afusi nnec ad yaf marra inni Cek icarrhen. 10 Cek ad ten tarrid am tefqunt icemmḍen di řweqt n weḍḥar nnec, SIDI ad ten isarḍ s weɣḍab nnes, timessi ad ten tecc. 11 Ad temḥid řɣiǧet nsen zi temmurt, zzariɛet nsen zi tarwa n bnadem. 12 Maɣar nitni nedyen ac řɣar, ggin ict n tmeɛmuč, maca war zemmaren walu. 13 Maɣar Cek ad ten tegged jar tiṭṭawin, s ifiřan n řqews nnec ad tneyyced x wudmawen nsen. 14 Sgeɛɛed ixef nnec, a SIDI, s jjhed nnec! Ejj aneɣ ad nɣennej u ad nzehhed i tzemmar nnec.