Izehhiden 20

1 I umeqqran n imeɣnajen. Azehhed n Dawud. 2 Ad xak dd-yarr SIDI deg wass n řeḥṣaret, ad cek issizdeɣ Isem n AREBBI n Yaɛqub deg wemcan yuɛřan ifaryen. 3 Ad ac iwc afus zi Zzawect Iqeddsen, ad cek dd-iɛawen zi Ṣihyun. 4 Ad cek yidar di tewhibin n řɣiǧet nnec, ad tiři tɣarṣt n wecmaḍ nnec am tadunt i Netta. Silah. 5 Ad ac iwc ɛlaḥsab min immeẓri wuř nnec, ejj i-t ad ikemmeř marra inwayen nnec. 6 Neccin ad nesřiwřew x usenjem s ufus nnec, ad nessuɛřa ibanduten deg Yisem n AREBBI nneɣ. Ad issjiwen SIDI marra meẓri nnec. 7 Řexxu ssneɣ, aqa SIDI ad yawi asenjem i umedhun nnes. Netta ad t-i-dd-yarr zeg ijenwan n Zzawect nnes Iqeddsen, s tmegga timeqqranin n usenjem s ufus afusi nnes. 8 Ina ttxarraṣen deg ikarruten u ina deg iysan, maca neccin ad nxarreṣ deg Isem n SIDI, AREBBI nneɣ. 9 Nitni uḍaren uca wḍan, neccin nekkar u neqqim nbedd. 10 A SIDI, awi-dd asenjem! Ejj ad aneɣ dd-yarr ujeǧid deg wass i di nřaɣa.