Izehhiden 147

1 Hallilu-Yah, maɣar azehhed i AREBBI nneɣ d aṣebḥan, minzi ittas-dd akides ad as nṣebbeḥ. 2 SIDI ibenna Urcalim, issmun immeneɛraq n Israil. 3 Netta issgenfa inni ɣarsen uř yarẓen, ittcedda iyezzimen nsen itteqsen. 4 Iḥesseb qedda n itran, ittřaɣa ten marra s yisem. 5 Siditneɣ d ameqqran u jjehd nnes imɣar. Řeɛqeř nnes war ɣares bu řeɛbar. 6 SIDI ittsenned imwaḍɛen, isshekkwa iɛeffanen ař tammurt. 7 Qadam SIDI s uɣennej, zehhdem i AREBBI nneɣ s řgambri. 8 Netta d wenni iddařen ajenna s iseynuten, d wenni issewjaden anẓar i temmurt, d wenni issɣemmayen arbiɛ x idurar. 9 d wenni itticen i řmař macca nnes, uřa i tarwa n ibaɣřiwen xmi ɣa sɣuyen. 10 Netta war yareṭṭi s jjehd n uyis, iḍaren n weryaz war d as tteɛjiben. 11 Yareṭṭa as i SIDI inni t itteggʷeden, inni issitmen di tmexsiwt nnes icewwaren. 12 A Urcalim, ṣebbeḥ i SIDI, a Ṣihyun, ṣebbeḥ i AREBBI nnem. 13 Maɣar Netta issemḥed zzekrunat n tewwura nnec, ibarek iḥenjiren nnec di řwest nnec, 14 Netta iwca řehna i iymiren nnec, issjiwen i cek s min iṣebḥen qaɛ n yirden. 15 Netta issekka tiwařin nnes ɣar temmurt, awař nnes ittazzeř aṭṭas. 16 Ittic adfeř am tḍuft, izzuzara nnda igersen am yiɣɣeḍ. 17 Issekka adfeř nnes d ibquqen, wi izemmaren ad iqqim ibedd zzat i tesmuḍi nnes? 18 Issekka awař nnes uca ittarra i-ten ad fesyen, Netta ittejja asemmiḍ nnes ittsuḍ, xenni ttucruren waman. 19 Netta ibarreḥ i Yaɛqub awařen nnes, i Israil tiweṣṣa nnes d lfarayiḍ nnes. 20 Uřa i yijj n řgens nneɣni war d as iggi ammu, nitni war ssinen ca lfarayiḍ nnes. Hallilu-Yah!