Izehhiden 146

1 Hallilu-Yah. A řeɛmar inu, ṣebbeḥ i SIDI. 2 Necc ad ṣebbḥeɣ i SIDI min ɣa kkeɣ ddareɣ, ad zehhdeɣ i AREBBI inu min da ɣa kkeɣ ɛad. 3 War tceř x tarwa n taṣiřet, x mmis n bnadem, wenni umi war ɣar iǧi bu usenjem. 4 Iffeɣ buḥbeř nnes, idweř ɣar temmurt. Deg wass nni simant nnes ad qḍan inwayen nnes. 5 Sseɛd n wenni ɣar iǧa Arebbi n Yaɛqub d amɛawen, wenni ittrajan SIDI, AREBBI nnes, 6 wenni iggin ijenwan d temmurt, řebḥar d marra min dayes, wenni dayes řaman i řebda, 7 wenni ittaɣen tasɣart i yinni ittwaḥeṣṣaren, wenni itticen aɣrum i yinni iǧuẓen. SIDI yarexxu i imeḥbas. 8 SIDI yarezzem i idarɣařen tiṭṭawin, issbedda inni igguren itteqwisen, SIDI ittexs imseggaden. 9 SIDI iḥeṭṭa ibarraniyyen, ittic afus i uyujiř d tijjař, maca abrid n iɛeffanen ad t issfarɣ. 10 SIDI ad iḥkem i řebda, AREBBI nnec, a Ṣihyun, iḥekkem zi jjiř ař jjiř. Hallilu-Yah.