Izehhiden 106

1 Hallilu-Yah, qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda. 2 Wi izemmaren ad iḥaja timegga timeqqranin n SIDI, ad ibarreḥ marra ccan nnes? 3 Sseɛd nsen i yinni iḥḍan řḥeqq, sseɛd nnes i wenni itteggen řebda tasegda. 4 Ɛqeř xafi, a SIDI, s arḍa ɣar řgens nnec, ɛahed ayi s usenjem nnec, 5 maḥend ad ẓareɣ řxar i yinni zzayek ittwafarzen, maḥend ad farḥeɣ s řefraḥet n řgens nnec, maḥend ad farḥeɣ s yixef inu jmiɛ ak-d tesɣart nnec. 6 Neccin nexḍa, jmiɛ ak-d řejdud nneɣ, negga řɣecc, negga tuɛeffna. 7 Řejdud nneɣ di Miṣra war fhimen i lmuɛjizat nnec, war xarrṣen deg ufeyyeḍ n tmegga n tmexsiwt nnec icewwaren, maca ɣewwɣen ɣar řebḥar, ɣar Řebḥar n Telga. 8 Maca Netta issenjem i-ten di ṭṭweɛ n Yisem nnes, ḥima ad tᵉttwassen řemɣaret nnes. 9 Netta iwebbex Řebḥar n Telga ařami idweř yuẓeɣ, uca ijja i-ten ad kken x wudem n temmurt jar waman ihewřen axmi di řexřa. 10 Netta ifekk i-ten zeg ufus n yinni i-ten icarrhen, ifekk i-ten zeg ufus n řeɛdu. 11 Aman dřin inni ten iḥeṣṣaren, war iqqim uřa d ijjen zzaysen. 12 Nitni ttecřen x wawařen nnes, ṣebbḥen as s yijj n yezři n uṣebbeḥ. 13 Maca ttun deɣya timegga nnes, war xsen ad rajan ɛad ccwar nnes. 14 Nitni dewřen ttmeɣɣřen aṭṭas di řexřa, qeǧben Arebbi di tnezruft. 15 Xenni iwca asen min ttaren, maca issemẓi řqedd n řeɛmur nsen. 16 Nitni dewřen usmen zi Musa di řmargeḥ n řɛeskar, uřa zi Harun, amqeddes n SIDI. 17 Tammurt tennurzem, tṣarḍ Datan, uca tentiy abarru n Abiram. 18 Timessi tebda tecmeḍ jar ubarru nsen, ijj n uceɛɛař n tmessi iqqed iɛeffanen nni. 19 Nitni ggin ijj n uɛejmi ɣar Ḥurib, bendqen i yijj n řexyař ifesyen. 20 Nitni beddřen aɛuǧi n SIDI ak-d řexyař n ijj n ufunas i ittetten arbiɛ. 21 Ttun Arebbi, Amsenjem nsen, wenni tuɣa iggin timegga timeqqranin di Miṣra, 22 lmuɛjizat di temmurt n Ḥam, timegga ssaggʷadent ɣar Řebḥar n Telga. 23 Inna aqa ad ten ikeḥḥeḍ, mři war iǧi d Musa, wenni zzayes ittwafarzen, ikkar-dd di txenduqt zzat i wudem nnes di ṭṭweɛ nsen, maḥend ad issbeɛɛed asɛar nnes i zi ixs ad ten yareddeǧ. 24 Nitni kksen taqcurt x temmurt iɛizzen, war tecřen ca x wawař nnes. 25 Nitni ndeqmen deg iqiḍan nsen, war sřin ɣar tmijja n SIDI. 26 Netta issgeɛɛed afus nnes xasen, ijjuǧ ad ten isseɣḍeř di řexřa, 27 maḥend ad isseɣḍeř tarwa nsen jar řegnus, maḥend ad ten izeǧeɛ di temmura. 28 Nitni ssřeḥmen ixef nsen ɣar Baɛal-Faɣur, ccin tiɣarṣa i imettan. 29 Sɛaren t s tmegga nsen, ařami dd xasen tewḍa jjriḥect. 30 Xenni ikkar-dd Finaḥas, yusa-dd jar asen, u ammu i tᵉttwassbedd jjriḥect. 31 Aya ittwaḥseb as-dd d tasegda, zi jjiř ař jjiř i řebda. 32 Nitni sɛaren afugem nnes ɣar waman n Mariba, ařami igga Musa řɣar di ssibbet nsen, 33 maɣar ssarezgen řeɛmar nnes, ɣares ařami iffeɣ wawař war iḍbiɛen zeg iyencicen nnes. 34 Nitni war teḥḥan řegnus ɛlaḥsab min d asen yumur SIDI. 35 Maca ṣṣuren ixef nsen ak-d řegnus řemden ad ggen min ggin nitni. 36 Nitni tuɣa ttsexxaren i řexyařat n l’aṣnam nsen, inni d asen idewřen d řfex. 37 Nitni iwyen iḥenjiren nsen d tḥenjirin nsen d taɣarṣt i ccwaṭen. 38 Nitni ssizzřen idammen imezdagen, idammen n iḥenjiren nsen d tḥenjirin nsen, nni iwyen d taɣarṣt i řexyařat n l’aṣnam n Kenɛan, ařami tedweř temmurt tefsed s idammen. 39 Nitni dewřen xemjen zi tmegga nsen, ssfesden ixef nsen s řexdayem nsen. 40 Yarɣa weɣḍab n SIDI x řgens nnes u Netta iɛiff tasɣart nnes. 41 Netta isellem i-ten ɣar ifassen n řegnus u inni ten icarrhen dewřen ttseǧaḍen xasen. 42 Ḥṣaren ten řɛedyan nsen, nitni ttwasswaḍɛen sadu afus nsen. 43 Aṭṭas n twařawin tuɣa ittfekka i-ten, maca nitni ssarezgen xas s tɣennant nsen, ttwassmeẓyen s řmuɛṣiyyet nsen. 44 Waxxa amenni Netta ixzar ɛad ɣarsen umi ten tuɣa di řeḥṣaret, umi isřa tɣuyyit nsen. 45 Yidar Řɛahd nnes di ṭṭweɛ nsen u indem zi ssibbet n tmexsiwt nnes icewwaren. 46 Isscen asen arreḥmet nnes zzat i wudem n marra inni ten iḥebbsen. 47 Senjem aneɣ, a SIDI, AREBBI, ndeh aneɣ nmun zi řegnus, ḥima ad nqada Isem amqeddas nnec, ad Cek nṣebbeḥ s yezřan n usemɣar. 48 Ad ittwabarek SIDI, AREBBI n Israil, zi řebda ař řebda!" Ejj marra řgens ad yini: ‘Amin! Hallilu-Yah!’