Izehhiden 105

1 Qadam SIDI, řaɣam x Yisem nnes, barrḥem s tmegga nnes jar řegnus. 2 Ɣennjem as, zehhdem i Netta, siwřem x marra lmuɛjizat nnes. 3 Cennɛem ixef nnec s Yisem nnes iqeddsen, ḥima uř n yinni yarezzun SIDI, ad ifarḥ. 4 Seqsam x SIDI d jjehd nnes, arzum udem nnes řebda. 5 Ɛeqřem x lmuɛjizat nnes i igga, x řeɛřamet nnes u x řeḥkamat n uqemmum nnes. 6 Zzariɛet n Ibrahim, amsexxar nnes, ayt n Yaɛqub, inni zzayes ittwafarzen! 7 Netta d SIDI, AREBBI nneɣ. Řeḥkamat nnes i dd-ittasen x temmurt marra. 8 Ɛeqřem x Řɛahd nnes i řebda, awař nni iweṣṣa i wařef n jjiřat, 9 i igga ak-d Ibrahim, u issemten i-t s tjaǧit nnes i Isḥaq. 10 Netta igga i-t d tawṣeyyet i Yaɛqub, i Israil igga i-t d Řɛahd i řebda, 11 umi inna: “Ad ac wceɣ tammurt n Kenɛan, afiřu n řeɛbar n tesɣart nwem!" 12 umi tuɣa kenniw deg ijj n wuru n yeryazen, s drus waha, u am yibarraniyyen i teǧim dayes. 13 Nitni telɛen zi řgens ɣar řgens nneɣni, zeg ict n tgeldit ɣar ijj n řgens nneɣni. 14 War ijji uřa d ijj n bnadem ad ten isseḥṣar, iɛaqeb ijeǧiden di ṭṭweɛ nsen. 15 War ttḥadam ca imedhunen inu, war tteggem řɣar deg inabiyyen inu. 16 Xenni iřaɣa-dd i řaẓ ɣar temmurt. Yarẓa asen marra řeɛweč n weɣrum. 17 Issekk-dd ijj n weryaz ɣar zzat, Yusuf immenz d ismeɣ. 18 Carfen iḍaren nnes deg iceddiyyen, řeɛmar nnes ittwaḥṣar deg wuzzař. 19 Ař řweqt nni di ittwasseqfeř wawař nnes iṣeffa as řhard n SIDI. 20 Issekk ujeǧid ijj ḥima ad as issarxu, řḥakem n řegnus iḍřeq i-t. 21 Netta igga i-t d bab x taddart nnes, uřa d řḥakem x marra min ɣares. 22 ḥima ad ɣares icedd řḥukkam u ḥima ad isseřmed tiɣit i imɣaren nnes. 23 Awarni aya yusa-dd Israil ɣar Miṣra, iqqim Yaɛqub am ubarrani di temmurt n Ḥam. 24 Netta igga řɣiǧet di řgens nnes aṭṭas, yarra i-t ijhed x yinni t iḥeṣṣaren. 25 Netta yarra uř nsen inneqřeb, ařami dewřen carrhen řgens nnes, dewřen ɣeddaren imsexxaren nnes. 26 Xenni issekk-dd Musa, amsexxar nnes, d Harun wenni ifarz i-t Netta. 27 Nitni ggin řeɛřamat nsen ifarzen jar asen, u ggin lmuɛjizat di temmurt n Ḥam. 28 Netta issekk-dd taǧest uca tedweř marra d taǧest. Nitni war ɣewwɣen ca x wawařen nnes. 29 Netta yarra aman nsen d idammen u inɣa iseřman nsen. 30 Netta yarra tammurt nsen tseffay s iqarqriwen, ař daxeř deg ixxamen n ijeǧiden nsen. 31 Netta issiweř uca yusa-dd weyřaf n ibeɛɛac, nnamus wḍan-dd x temmurt nsen marra. 32 Netta yarra anẓar nsen d abrurri, issekk-dd timessi d iceɛɛařen x temmurt nsen. 33 Netta iwta tazayart nsen d wartu nsen, yarẓa ticejjura di temmurt nsen. 34 Netta issiweř, xenni tusa-dd tmuɣri, uřa d bu-weřsaḥ, aqa aten břa řeḥsab. 35 Nitni ccin marra afsu di temmurt nsen, ccin řɣiǧet n temmurt nsen. 36 Netta inɣa marra imenza di temmurt nsen, imenza n marra taryast nsen. 37 Netta issuffeɣ i-ten-dd s nnuqart d wureɣ, war din tuɣi uřa d ijj di tqebbař nsen i inderfen. 38 Miṣra tfarḥ s wuffuɣ nsen, maɣar tewḍa xasen tiggʷudi temɣar. 39 Netta ibezzeɛ aseynu am yijj n arwaq u tmessi ḥima ad tewc tafawt s ǧiřet. 40 Nitni ẓẓuǧen u Netta yarra ad dd-asen ijḍaḍ, qqaren as ’tsalwa’, issjjiwen i-ten s weɣrum n ujenna. 41 Netta yarzem taṣḍart, aman duqqzen-dd zzayes, uzzřen x řaẓaɣ u dewřen am yeɣzar. 42 Maɣar Netta iɛqeř x wawař nnes iqeddsen, x umsexxar nnes Ibrahim. 43 Netta issuffeɣ-dd řgens nnes s řefraḥet, inni zzayes ittwafarzen s usřiwřew. 44 Netta iwca asen timmura n řegnus, nitni warten tamara n ccuɛub, 45 ḥima ad ṭṭfen di tweṣṣa nnes, ad ḥḍan izerfan nnes. Hallilu-Yah.