Ayub 41

1 Xzar, qaɛ araji ad ifceř, mɣir tamuɣři nnes tesseɛgaz bnadem. 2 War iǧi uřa d ijjen ammu d azeɛɛam ařami t i ɣa ihweř, man wen xenni izemmaren ad iqqim ibedd zzat i uɣembub inu? 3 Man wen i d ayi iwcin ca d amezwaru, ařami d ayi ittxeṣṣa ad ɣares t-i-dd-arreɣ? Marra min iǧan sadu ijenwan inu! 4 Necc war ttesqariɣ x iḍaren nnes, x řemɣaret n jjehd nnes u x ucuwwar n waddud nnes. 5 Man wen izeɛɛmen ad iqejjeɛ taqcurt n warruḍ nnes, man wen izeɛɛmen ad dd-iqarreb ɣar tyuya n řesdud n teɣmas n iɣesmar nnes? 6 Man wen izemmaren ad yarzem tiwwura ɣar uɣembub nnes? Min innḍen i teɣmas nnes mɣir d anexřiɛ. 7 Řesdud n tseddariyin x weɛrur nnes cennɛen, kuř ijj zzaysen ittwabelleɛ s ṭṭabeɛ iqqnen nican. 8 Ijjen iqqnen nican ɣar ijj n nneɣni, war izemmar ad din dd-yadef arriḥ jar asen. 9 Řessqen deg wayawya, udfen deg ixef nsen maḥend war temmsebḍin. 10 Mařa iɛḍes, tᵉttceɛciɛ tfawt, tiṭṭawin nnes ggint am wabřiwen n tfawt n řefjar. 11 Zeg ujeqmim nnes tteffɣen-dd iṣefḍawen, tifeṭṭutin n tmessi dduqquzent zzayes. 12 Ddexxan ittfewwar zeg ixubac n wenzaren nnes, am zeg ijj n uṭenjir ittnennan s uɣanim idduxxunen. 13 Twarrit n nnefs nnes tᵉssekkara timessi di řefḥem, zeg uḥerqum nnes itteffeɣ-dd uḥaduq n tmessi. 14 Jjehd izdeɣ deg ijiman nnes, ɣar zzat nnes ineṭṭu unexřiɛ. 15 Ṭṭrufa n weysum n uɛeddis nnes mmřesqen, am xasen fesyen, war zemmaren ad ttwanhezzen. 16 Uř nnes iqseḥ am weẓru, iqseḥ am teṣḍart n swadday n tsirt. 17 Xmi issgeɛɛad ixef nnes, ttnexřaɛen inni ijehden, zeg uqezzeb xeṭṭan di tendayt. 18 Mařa iřqef i-t ca n yijjen s ssif, war ittiři, war iǧi s uḥric, řa s lansa uřa s fřitca. 19 Uzzař ɣares am uřum, nnḥas am ukeccuḍ yarcan. 20 Fřitca n řqews war t tesstewwej, iẓra n iǧiy ddakkwařen zzates d aqecqac. 21 Idebbuzen iḥesseb i-ten am uqecqac, iḍeḥḥec x uzebzeb n uḥric. 22 Ɣar wadday n uɛeddis nnes aqa din iceqfan iqeḍɛen, ittjarra řemwas iqeḍɛen nni am teřwiḥt itteḥřuǧuḍen i usarwet tiwa n ubeǧaɛ. 23 Igga řaǧaɣ ad isstextex am teydart, ittegg řebḥar am umeqraj itthajan. 24 Ittejja awarni as jjurret tareqq d amesraq, aman ihewřen ttbanen am ucuwwaf n umeccaybu. 25 War din iǧi uřa d ijj x temmurt yarwes dayes, ittwagg ḥima ɛemmarṣ war itteggʷed. 26 Inḍar tiṭṭawin nnes x marra wi yuɛřan, aqa-t d ajeǧid x marra iyraden imeẓyanen ineffxen.