Ayub 40

1 Yarni yarra-dd SIDI x Ayub, inna: 2 Ma ixs wenni ittemcarraɛen ak-d Umzemmar x kuřci ad t iseggem? Ejj wenni ixsen ad idɛa Arebbi, ad dd-yarr! 3 Xenni yarra-dd Ayub x SIDI, inna: 4 Xzar, necc drus, min zemmareɣ ad xak dd-arreɣ? Necc ad ggeɣ afus inu x uqemmum inu. 5 Aqa ssiwřeɣ ict n twařa, maca war dd-ttarriɣ ɛad. twařa wiss tnayen war d as arenniɣ! 6 Xas uca yarni yarra-dd SIDI x Ayub zi tḥaryaḍt, inna: 7 Byes xenni tijɛinnatin nnec am weryaz. Necc xseɣ ad cek sseqsiɣ u cek, arr-dd xafi! 8 Ma texsed s tidett ad tarẓed řḥukm inu? Ma texsed ad ɣari dd-tarred řɛib, maḥend ad tbaned cek d amsegged? 9 Ma ɣarek aɣiř am Arebbi? Ma tzemmared ad teddardḥed am wajjaj s tmijja nnec? 10 Qqen xenni ixef nnec s lɛaḍama d uɛuǧi, arḍ s tissiqt d řɛezz. 11 Ejj aduqqez n ufugem nnec ad izeǧeɛ, xzar ɣar kuř bu nnfaxet, uca sehwa i-t! 12 Xzar mliḥ ɣar mkuř bu-nnfaxet, sehwa i-t, řbez iɛeffanen deg wemcan nsen. 13 Ffar i-ten marra am munen deg ucař, cfen iɣembab nsen di tnuffra sadu tammurt. 14 Xenni uřa d Necc ad cek ssemɣareɣ, minzi afus nnec afusi issenjem i cek. 15 Xzar maca Řweḥc, ‘Bᵉhimut’, wenni ggiɣ am mammec cek ggiɣ. Ittett arbiɛ am ufunas. 16 Xzar jjehd nnes di tejɛinnatin nnes, řɛezz nnes deg iẓewran nnes n uɛeddis! 17 Mařa ixs, ad igg akennas nnes am tcejjart n tengelt, iẓewran n tmeṣṣaḍin nnes meḥḍen mmuden. 18 Ixsan nnes tteggen am yiqudas n nnḥas, am barrat n wuzzař iḍaren d iɣaǧen nnes. 19 Netta d amezwaru n ibriden n Arebbi. Wenni t yeggin, iwca as ssif nnes. 20 Iwa, idurar ttawyen as-dd arbiɛ, marra řewḥuc n yeyyar ttiraren dinni. 21 Ibbuzzeř sadu i tcejjura itteggen tiři, deg udurri n uɣanim, di ssebxet. 22 Ad xas dduryent tcejjura i itticen tiři, kuř ict s tiři nnes, tinemrač n tɣezratin ttennḍent as-dd. 23 Xzar, mařa ihaj yeɣzar, war ittarjiji, ittɣima yarsa mařa řḥemřet n L’Urdun tudef as-dd ɣar uqemmum. 24 Ma izemmar bnadem ad t iṭṭef am ixezzar netta nican di tiṭṭawin nnes, ad as issnuqqeb tinzart s tesɣunin? 25 Ma tzemmared ad tjebded ‘Liviyatan’ s tsennart n weymar, niɣ ad tessehwid iřes nnes deg ufiřu n weymar? 26 Ma tzemmared ad as tegged taxadent n uɣanim di tenzart nnes, niɣ ad tessnuqqbed aɣesmir nnes s uɣanču? 27 Ma ad zzayek ittar aḥinni? Ma ad issiweř akidek s wawařen imiziḍen? 28 Ma ad yegg akidek řɛahd? Ma tzemmared ad t teksid d ismeɣ i řebda? 29 Ma tzemmared akides tᵉttirared am ak-d ijj n ujḍiḍ, niɣ ad t teqqned i teḥramin nnec? 30 Ma zemmaren ineymaren ad dayes sebbeben? Ma zemmaren ad t bḍan jar ayt n Kenɛan? 31 Ma tzemmared ad tejjud tiřmect nnes s fřitcat, niɣ s lansa n iseřman azeǧif nnes? 32 Sars xas afus nnec, xemm ɣar umenɣi, war t tteggid ɛemmarṣ ɛad.