Ayub 34

1 Iṭṭef Ilihu ɛawed deg wawař, inna: 2 Sřem-dd ɣar wawařen inu, a imiɣisen, wcem ayi amezzuɣ, a kenniw, ayt n tussna. 3 Maɣar amezzuɣ inebbec deg wawařen, am mammec ittqasa waneɣ macca. 4 Jjem aneɣ ad nixḍar jar aneɣ min iǧan nican, jjem aneɣ ad nessen jar aneɣ min iǧan d aṣebḥan. 5 Maɣar Ayub inna: ‘Necc d amsegged, Arebbi ikkes ayi tasɣart inu! 6 Waxxa ɣari řḥeqq, ɛad ttɣimeɣ ttbaneɣ am yijj n bu-ixarriqen! Ayezzim n fřitca i dayi iǧa, war izemmar ad ittwassgenfa am war din iǧi uɛeddi.’ 7 Man wen iǧan d aryaz am Ayub, wenni isessen astehzi am waman? 8 Netta iggur deg webrid am ittɛacar inni itteggen řmuɛṣiyyet, iggur ak-d iryazen iɛeffanen. 9 Maɣar inna: ‘War ineffeɛ walu i bnadem, mařa netta d amarḍi ɣar AREBBI.’ 10 S uya sřem-dd ɣari, kenniw iryazen i di teǧa řefhamet: ‘Iggʷej x Arebbi maḥend ad yegg tuɛeffna, uřa x Umzemmar x kuřci maḥend ad yegg min ifarɣen.’ 11 Maɣar Netta ixřef zi bnadem ɛlaḥsab timegga nnes, u am mammec iǧa webrid n weryaz, ammu i d as ɣa yarr ad t yaf. 12 S tidett, ɛemmarṣ war ittegg Arebbi tuɛeffna, Amzemmar x kuřci war issfarriɣ ccreɛ. 13 Man wen t iwekkřen x temmurt, man wen issarsen marra ddunect? 14 Mařa Netta ad xas issneqřeb uř nnes, mařa ad ɣares dd-yawi ɛawed buḥbeř nnes d nnefs nnes, 15 marra bnadem d řmař ad ssuffɣen buḥbeř u bnadem ad iɛqeb ɣar ucař. 16 Mařa dayek řefhamet, seř xenni i man aya, ewc amezzuɣ nnec i řḥess n wawařen inu. 17 Ma izemmar wenni icarrhen řḥeqq ad iḥkem, niɣ texsed cek ad tedɛid x wenni iǧan d Amsegged d ameqqran? 18 Ma ad inin i ujeǧid: ‘Cek war tsekkʷid walu!’ u i tarwa n taṣiřet: ‘Kenniw d iɛeffanen’? 19 Mammec xenni i Wenni war issizwiřin řḥukkam u war ittriḥ ak-d bu-wagřa x umezřuḍ, maɣar marra nitni d řxedmet n ifassen nnes. 20 Mmuten deg wermac n wabřiwen, deg wezyen n ǧiřet. Ttwanhezzen nitni, řgens nni, uca hellken. Wenni ɣar teǧa ṣṣulṭa ittwaɛarren ɣar uɣezdis, břa ma iḥada i-t ufus n bnadem. 21 Maɣar tiṭṭawin nnes xezzarent ɣar ibriden n mkuř ijj, Netta ittwařa mliḥ marra iṣuraf nsen. 22 War teǧi tubbarcent u war teǧi tiři n řmewt, mani zemmaren ad nnuffaren inni itteggen řɣar. 23 War d as ittxeṣṣi ad ixzar di bnadem aṭṭas n řweqt, qbeř i dd ɣa yadef ɣar ddeɛwet zzat i uɣembub n Arebbi. 24 Iřebbez jjwaḥeř břa aseqsi uca igga inneɣni deg wemcan nsen. 25 Maɣar Netta issen timegga nsen, issneqřab i-ten di ǧiřet uca ttwařebzen. 26 Iccat i-ten jar iɛeffanen, deg ijj wemcan mani ttbeddan iwdan ttwařan, 27 minzi nitni ḥeyyden xas, war ttḥekkiren marra ibriden nnes, 28 maḥend ad xas issiweḍ tɣuyyit n imezřaḍ, u maḥend ad istajeb i iɣuyyan n řmusakin. 29 Mařa Netta yiwi-dd řhudnet, man wen dayes i ɣa iggin řɛib? Mařa issnuffar aɣembub nnes, wi t ɣa iẓaren? Iḥekkem řa x řgens am x bnadem, 30 ḥima war iḥekkem uřa d ijj n bnadem i itteggen s tnayen n wudmawen, u ḥima war ttiřint ɛad txecifin i řgens. 31 Mři inna bnadem nni i Arebbi ‘Ssgeɛɛdeɣ ixef inu, war ttɛiwideɣ ad ggeɣ řɣar. 32 Min war ttwiřiɣ, sɣar ayi t Cek! Mařa ggiɣ min war iseggden, war t tteggeɣ ɛad.’ 33 Ma ittxeṣṣa ad ixřef Netta am mammec t texsed cek? Aqa tesseḥqared t! Aqa texsed ad tixḍared s yixef nnec, necc maca lla! Mařa ittɣiř ac aqa tessned tt, ini tt! 34 Iryazen s řefhamet ad ayi inin, am qaɛ aryaz amiɣis ittesřa-dd ɣari, 35 aqa Ayub war issiweř s tussna, aqa awařen nnes břa řefhamet i yeǧan. 36 Iwa, ejj Ayub ad ittwaqeǧeb ař aneggar, minzi ittarra-dd am iryazen ccuren s řmuɛṣiyyet. 37 Maɣar i ddenb nnes yarenni ɛad aɛeddi, jar aneɣ iccat camxa s ifassen u ttmarenyen wawařen nnes ḍidd i Arebbi.