Ayub 33

1 Seř řexxu ɣar řhard inu, Ayub, ewc amezzuɣ i wawařen inu marra. 2 Xzar, arzmeɣ aqemmum inu, issawař yiřes inu sadu waneɣ inu. 3 Tteffɣen wawařen inu zi řeṣfayet n wuř inu, tussna teqqur ad xas harrden iyencicen inu. 4 Arruḥ n Arebbi igga ayi, asuḍi n nnefs n Umzemmar x kuřci iwca ayi tudart. 5 Mařa tzemmared, arr-dd xafi. Sars ayi tamesřact, bedd zzati! 6 Xzar, necc am cek zzat i Arebbi, uřa d necc ttwaggeɣ zeg ubeǧaɛ. 7 Xzar, ahuddi inu war cek issiggʷid ca, war xak ttzeyyareɣ ca aṭṭas. 8 S tidett, aqa tennid t deg imezzuɣen inu, sřiɣ i řḥess n wawařen-a: 9 ‘Necc d amezdag, břa ddenb, d afurri i ǧiɣ, war dayi ca n řmuɛṣiyyet. 10 Xzar, Netta yarezzu ssibbet ḥima ad zzayi icetca, iḥesseb ayi d řeɛdu nnes. 11 Iḍaren inu iqqen i-ten ɣar ukeccuḍ, iḥeṭṭa marra imesraq inu.’ 12 Xzar, ad ac iniɣ, war teǧid ca d amsegged deg uya, maɣar Arebbi d ameqqran x bnadem. 13 Min xef kides tᵉttemɛarrid? Aqa Netta war ittegg řeḥsab i marra timegga nnes! 14 Maɣar Arebbi issawař ict n twařa, wah, tnayen n twařawin, maca bnadem war iḥeṭṭi: 15 di tirja, s ijj n řewḥiy di ǧiřet, xmi dd-iweṭṭa yiḍeṣ yuǧɣen x iwdan, deg unudem di řectu. 16 Xenni yarezzem Netta amezzuɣ n iwdan, ittcemmeɛ s ucemmiɛ nnes x uweddeb nsen, 17 ḥima ad issḥeyyed bnadem x tmeggit nnes taɛeffant, ḥima ad issbedd nnfaxet x weryaz. 18 Netta imenneɛ řeɛmar nnes zi turṣuḍi, tudart nnes zeg uhellek s lansa. 19 Ijeyyeḥ i-t řeḥriq di qama nnes uřa d amenɣi řebda deg iɣsan nnes. 20 Tudart nnes tarra i-t ittɛiffa aɣrum u řeɛmar nnes yarra i-t ittɛiffa macca iṣebḥen aṭṭas. 21 Iqeṭṭa weysum nnes zeg wudem nnes, ixsan nnes nni war ttwaẓrin ɛemmarṣ, aqa ttbanen řexxu. 22 Ittqarrab řeɛmar nnes ɣar turṣuḍi, tudart nnes ɣar ijarrayen n řmewt. 23 Mařa xenni din ijj n lmalak ibedd as-dd ɣar uɣezdis, ijj n Řɛadeř, ijjen zeg wařef, ḥima ad isscen i bnadem tasegda nnes, 24 xenni ad xas iḥinn, ad yini: ‘Fekk i-t, ařami netta war ihekkwi ɣar turṣuḍi deg wenḍeř, aqa Necc ufiɣ aṣřaḥ xas!’ 25 Xenni ad tneɛneɛ arrimet nnes ktar zi ṭṭri n temẓi, ad dd-idweř ɣar wussan n temẓi nnes. 26 Netta ad ittar Arebbi s tutra yuǧɣen u Netta ad xas yarḍa, ařami wanita ad iẓar udem nnes deg usřiwřew n řefraḥet, u ammu i ɣa yarr Netta i bnadem tasegda nnes. 27 Ad iɣennej i yewdan, ad yini: ‘Necc xḍiɣ, ssfarɣeɣ min iseggden, maca Netta war zzayi tt yexřif. 28 Ifekk Arebbi řeɛmar inu zi turṣuḍi deg wenḍeř, tudart inu txezzar ammu d wammu di tfawt.’ 29 Xzar, marra aya ittegg i-t Arebbi, tnayen niɣ třata n twařawin ak-d weryaz, 30 ḥima ad isseɛqeb řeɛmar nnes zi turṣuḍi deg wenḍeř, ḥima ad t yarr yareqq s tfawt n tudart. 31 Ḥḍa, Ayub! Seř-dd ɣari! Sqar, xenni necc ad ssiwřeɣ. 32 Mařa ɣarek awařen wejden, arr-dd xafi, siweř, maɣar ɣari s řxaḍar ad xak barriɣ. 33 Mařa lla, seř-dd ɣari! Sqar, u ad ac ssɣareɣ tiɣit.