Ayub 19

1 Yarra-dd Ayub, inna: 2 Mecḥař ɛad i ɣa tekkem tceḍnem řeɛmar inu, ad ayi třebzem s wawařen? 3 Řexxu ɛad wiss ɛecra n twařawin ttekkwarem ayi, war tᵉttseḍḥim umi d ayi dd-tɣeṭṭřem awař. 4 Mařa s tidett weddareɣ, ad iqqim uweddar inu i ixef inu. 5 Mařa s tidett texsem ad xafi tessgeɛɛdem ixef nwem s cciki, ad ayi tessqenɛem s řefḍiḥet inu, 6 snem xenni, aqa Arebbi inneqřeb xafi, uca inneḍ ayi-dd s tracca nnes. 7 Xzar, sɣuyyuɣ: ‘Řexcunet!’, maca war xafi dd-yarri uřa d ijj, ttřaɣiɣ i twiza, maca řḥeqq war din iǧi. 8 Abrid inu iqqen i-t, ařami war zemmareɣ ad ɛduɣ, taǧest issu tt x imesraq inu. 9 Řɛezz inu ikecceḍ i-t zzayi, u ttaj i iǧan x uzeǧif inu ikkes i-t. 10 Netta yareddeǧ ayi zi marra iɣezdisen, ad ttwahellkeɣ! Iqřeɛ řayas inu am yict n tcejjart. 11 Aɣḍab nnes yarɣa dayi, Netta iḥesseb ayi am ijj zeg iɣrimen nnes. 12 Munent ffɣent-dd bandiyyat nnes, sswejdent-i-dd abrid nsent ɣari uca quwwarent i tqiḍunt inu. 13 Aytma issiggʷej i-ten xafi, inni d ayi issnen dewřen d midden xafi. 14 Inni d ayi itteɛnan jjin ayi, inni d ayi issnen ttun ayi. 15 Imsexxaren n taddart inu d tiyya inu ḥessben ayi d řbarrani, necc d aɣrib jar tiṭṭawin nsen. 16 Řaɣiɣ i umsexxar inu, maca war xafi dd-yarri, tuɣa ittxeṣṣa ad t ḥeccmeɣ s uqemmum inu. 17 Řeɛwin n temwarrit n nnefs inu issɛiff tamɣart inu, arṣuḍeɣ i aytma. 18 Ɛad iḥramen imeẓyanen sseḥqaren ayi. Mařa kkareɣ beddeɣ, ttemɛarran xafi s wawařen nsen. 19 Marra immeddukkař inu iɛizzen carrhen ayi, inni ttexseɣ, nnqeřben xafi. 20 Ɣar teřmect d weysum inu řessqen iɣsan inu. Necc nejmeɣ ak-d tiřmect n teɣmas inu waha. 21 Ḥinnem xafi, ḥinnem xafi, a kenniw, imeddukkař inu! Maɣar afus n Arebbi iřqef ayi. 22 Mayemmi d ayi tḍaffarem am tt ittegg Arebbi, u mayemmi war ttjiwinem aysum inu? 23 Mři uran awařen inu, mři ttwazemmemen deg ijj n wedlis! 24 Mři ttwaneqcen s pluma n wuzzař u s řexfif di jjarf i řebda. 25 Necc ssneɣ: ‘Amefdi inu iddar u Netta ad dd-ikkar d Aneggar x ucař.’ 26 U awarni řami i ɣa tᵉttwařbez teřmect inu ammu, ad ẓareɣ Arebbi zi arrimet inu. 27 Ad t ẓareɣ zzati, tiṭṭawin inu ad t ẓarent, war iǧi midden. Ɣares i ttmeẓrent tiẓẓař inu ɣar daxeř inu. 28 Waxxa amenni kenniw ad tinim: ‘Mammec i nzemmar ad t neḍfar?’ maɣar aẓwar n tmesřact ittwaf dayi. 29 Ggʷedem zi ssif, maɣar s ssif ad dd-yas wesɛar x ddnub ineqqen, maḥend ad tessnem aqa ad yiři řḥukm.