Ayub 18

1 Xas uca yarra-dd Bildad, wenni dd-yusin zi Cuḥa, inna: 2 Ař meřmi ɛad tarezzum ad tᵉṭṭfem ijj n bnadem x wawařen nnes? Mařa tfehmem, xenni awarni i uya ad nessiweř. 3 Mayemmi d aneɣ ittwagg am řmař u nettwaḥṣar di buḥbeř di tiṭṭawin nwem? 4 Cek, a yaryaz wenni ittmezzqen ixef nnes deg uxeyyeq nnes! Ma ad jjen temmurt di ssibbet nnec, ad ittwassmuṭṭi jjarf zeg wemcan nnes di ssibbet nnec? 5 Wah, tafawt n iɛeffanen ad texsi, aceɛɛař n tmessi n uɛeffan war ittegg tafawt ɛemmarṣ ɛad. 6 Tafawt di tqidunt nnes ad tebbarcen, řefnar nnes tiwa nnes ad t ssxesyen. 7 Ttarjijen iṣuraf nnes ijehden, ccwar n yixef nnes ad t iɣḍeř. 8 Maɣar s iḍaren nnes ad innaɣ deg uṣennaj, ad yuyur x tracca, mmuden tt i tneymart. 9 Taxceft ad t temneɛ zeg unirz, řfex ad dayes tᵉṭṭef. 10 Tennuffar tesɣunt n řfex di temmurt, řfex aqa-tt x webrid. 11 Ssiggʷeden t inexřiɛen zi marra iɣezdisen, ḍeffaren t ɣar iḍaren nnes. 12 Ittwaḥṣar dayes jjehd nnes, aḍeyyeɛ ittraja i-t ɣar uɣezdis nnes. 13 Arẓiyyet ad tecc marra iɣezdisen n arrimet nnes, iɣezdisen n arrimet nnes ad ten yecc ijj n řeḥřac ineqqen. 14 Minxef tuɣa ittceř, ittwaqřeɛ zi tqiḍunt nnes. Tneddeh i-t arẓiyyet ɣar ujeǧid n inexřiɛen. 15 Iwdan nni war ǧin d yinni nnes, zeddɣen deg uqiḍun nnes, řecbariyyet tᵉttwazuzzar x tzeddiɣt nnes. 16 Sadu netta ttaẓɣen iẓewran nnes, zi sennej ttwaqessen řefruɛ nnes. 17 Řidaret nnes ad tᵉttwakkes zi temmurt, war d as ittɣimi ɛad isem deg webriden. 18 Ad t ɛarnen zi tfawt ɣar taǧest, ad sstewwjen zi ddunect. 19 War ɣares ittiři warraw niɣ jjadira di řgens nnes, war ittɣimi uřa d ijj ad iddar di tzeddiɣin nnes. 20 X wass nnes ad arjijen inni izeddɣen ɣar mani tɣeǧi tfuct, inni izeddɣen ɣar manis i dd-tneqqar tfuct ad ten tᵉṭṭef tiggʷudi. 21 Wah, ammu i tᵉttemsar i tzeddiɣin n imeqjaḥen, wa d amcan n yinni war issinen Arebbi.