إِزهِّيذنْ 49

1 إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. أَزهّذْ. 2 سْڒمْ إِ ؤُيَا، مَارَّا ڒڭْنُوسْ، سْحسّمْ مَارَّا، أَ إِمزْذَاغْ ن دُّونشْثْ، 3 أَمْ ثَارْوَا ن أَذَامْ، أَمْ ثَارْوَا ن إِجّْ ن ورْيَازْ، أَيْثْبَابْ ن وَاڭْڒَا ذ إِمزْڒَاضْ جْمِيعْ أَكْ-ذ وَايَاوْيَا! 4 أَقمُّومْ إِنُو إِسَّاوَاڒْ ثِيغِيثْ، إِخَارِّيصنْ ن وُوڒْ إِنُو شُّورنْ س ڒفْهَامثْ. 5 نشّْ أَذْ وْشغْ أَمزُّوغْ إِنُو إِ وَاوَاڒْ إِوزْننْ، أَذْ سَّارْڭْبغْ ثْحَاجِيثْ إِنُو ن ثْوَافِيثْ غَارْ ثِيرَارْثْ ن ڒْڭَامْبْرِي. 6 مَايمِّي غَا ڭّْوذغْ ذڭْ وُوسَّانْ إِعفَّاننْ، خْمِي د أَيِي ثتّنّضْ ڒْمُوعْصِييّثْ ن يِينِّي ذ أَيِي د-إِضفَّارنْ ذِي ثِيرِي إِنُو. 7 أَقَا ذِينْ إِنِّي إِتّْشَاڒنْ خْ ڒكْسِيبثْ نْسنْ، تّْفيّْشنْ س وَاڭْڒَا نْسنْ أَمقّْرَانْ، 8 مَاشَا ؤُڒَا ذ إِجّْ ن ثَاوْمَاثْ وَارْ إِزمَّارْ أَذْ إِفْذِي يِيجّْ ن ورْيَازْ، وَارْ إِزمَّارْ أَذْ إِخدْجصْ دّيّثْ ن يِيخفْ نّسْ إِ أَربِّي. 9 تَّامَانْ ن وصْڒَاحْ ن ڒعْمَارْ نْسنْ ثِيغْڒَا أَطَّاسْ، وَارْ د-ثتِّيسْ إِ ڒبْذَا، 10 حِيمَا نتَّا أَذْ إِدَّارْ إِ ڒبْذَا، عمَّارْصْ وَارْ إِتّْكِيشُّو. 11 مَاغَارْ إِتّْوَاڒَا إِمِيغِيسنْ مُّوثنْ، ؤُڒَا ذ أَبُوهَاڒِي ذ ؤُقفُّوحْ أَذْ تّْوَاقسّنْ س ثْنَاينْ، أَذْ جّنْ ڒكْسِيبثْ نْسنْ إِ إِنّغْنِي أَوَارْنِي أَسنْ. 12 أَخَارّصْ ن وُوڒْ نْسنْ أَقَا ثُوذْرِينْ نْسنْ أَذْ قِّيمنْثْ إِ ڒبْذَا، ثِيزذِّيغِينْ نْسنْ زِي جِّيڒْ أَڒْ جِّيڒْ. وَاخَّا ؤُڒَا ذ ثِيمُّورَا ڭِّينْ أَسنْثْ إِسْمَاونْ نْسنْ. 13 بْنَاذمْ إِ غَارْ إِدْجَا شَّانْ، وَارْ إِتّْغِيمِي شَا، نتَّا أَمْ ڒبْهِيمثْ إِفنَّانْ. 14 وَا ذ أَبْرِيذْ إِ غَارْسنْ، مِينْ خفْ تّْسنَّاذنْ، ؤُشَا إِنِّي ثنْ إِضفَّارنْ أَذْ جِّيوْننْ س ؤُقمُّومْ نْسنْ. سِيلَاهْ. 15 أَمْ وُودْجِي سَّاريّْحنْ نِيثْنِي إِخفْ نْسنْ ذِي ڒَاخَارْثْ، ڒْموْثْ أَذْ ثنْ ثَارْوسْ. إِمْسڭَّاذنْ أَذْ خَاسنْ حكْمنْ خْ صّْبحْ، أَدُّوذْ نْسنْ أَذْ إِذْوڒْ إِ ڒْغشّْ ذِي ڒَاخَارْثْ، تّْوَاسُّوفّْغنْ نِيثْنِي زِي ثْزذِّيغْثْ نْسنْ. 16 مَاشَا أَربِّي أَذْ إِفْذِي ڒعْمَارْ إِنُو زڭْ ؤُفُوسْ ن ڒَاخَارْثْ، مَاغَارْ نتَّا أَذْ أَيِي يَاوِي أَكِيسْ. سِيلَاهْ. 17 وَارْ تّڭّْوذْ شَا مَاڒَا شَا ن ورْيَازْ إِذْوڒْ ذ بُو-وَاڭْڒَا، خْمِي إِ غَا يَارْنِي ؤُشُووَّارْ ن ثَادَّارْثْ نّسْ، 18 مَاغَارْ ذِي ڒْموْثْ نّسْ وَارْ كِيذسْ إِكسِّي شَا مَارَّا أَيَا، أَشُووَّارْ نّسْ وَارْ إِهكّْوِي أَكِيذسْ أَوَارْنِي أَسْ. 19 وَاخَّا إِبَاركْ ڒعْمَارْ نّسْ ذِي ثُوذَارْثْ نّسْ، وَاخَّا نِيثْنِي أَذْ شكْ سّمْغَارنْ مَاغَارْ ثڭِّيذْ مِينْ إِصبْحنْ إِ يِيخفْ نّشْ، 20 أَقَا أَذْ د-يَاوضْ ڒعْمَارْ نّسْ غَارْ جِّيڒْ ن ڒجْذُوذْ نّسْ، نِّي وَارْ ژَترّنْ ثَافَاوْثْ إِ ڒبْذَا. 21 بْنَاذمْ إِ غَارْ إِدْجَا شَّانْ، مَاشَا وَارْ إِفهّمْ، نتَّا أَمْ ڒبْهِيمثْ إِفنَّانْ.