إِزهِّيذنْ 48

1 إِزْڒِي، أَزهّذْ زڭْ أَيْثْ ن قُورَاحْ. 2 سِيذِي ذ أَمقّْرَانْ، إِسْذَاحدْجْ أَذْ إِتّْوَاسّمْغَارْ أَطَّاسْ، ذِي ثنْذِينْثْ ن أَربِّي نّغْ، خْ وذْرَارْ نّسْ إِقدّْسنْ. 3 ڒُْوعْڒَا نّسْ ذ ڒمْڒَاحثْ، أَذْرَارْ ن صِيهْيُونْ أَقَا-ث ذ ڒفْرَاحثْ إِ مَارَّا ثَامُّورْثْ، غَارْ ؤُغزْذِيسْ ن شَّامَالْ ن ثنْذِينْثْ ن ؤُجدْجِيذْ ذ أَمقّْرَانْ. 4 أَربِّي أَقَا-ث ذِي ڒقْصُورْ نّسْ، نتَّا إِتّْوَاسّنْ أَمْ يِيجّْ ن لْبُورْجْ يُوعْڒَانْ. 5 مَاغَارْ خْزَارْ، إِجدْجِيذنْ مُوننْ، أَقَا فّْغنْ جْمِيعْ. 6 ڒَْامِي ث ژْرِينْ، ثْبهْثنْ، أَقَا نّْجرْفَانْ ؤُشَا أَروْڒنْ ذغْيَا. 7 ذِينِّي ثطّفْ إِ-ثنْ ثَارْجِيجِيثْ، أَمْ ڒحْرِيقْ ن إِشْثْ ن ثمْغَارْثْ ثتَّارُو. 8 س ؤُسمِّيضْ زِي شَّارْقْ ثتَّارژِّيذْ إِغَارُّوبَا ن ثَارْشِيشْ. 9 أَمْ مَامّشْ ثُوغَا ت نسْڒَا، أَمُّو إِ ت نثْوَاڒَا ذِي ثنْذِينْثْ ن سِيذِي ن ڒْعسْكَارَاثْ، ذِي ثنْذِينْثْ ن أَربِّي نّغْ. أَربِّي أَذْ ت إِسّمْثنْ إِ ڒبْذَا. سِيلَاهْ. 10 أَ أَربِّي، نِيذَارْ ثَامخْسِيوْثْ نّشْ إِشوَّارنْ، ذِي ڒْوسْطْ ن زَّاوشْثْ نّشْ ثَامقّْرَانْثْ. 11 أَمْ إِسمْ نّشْ، أَ أَربِّي، أَمُّو إِتَّاكّْوَاضْ ؤُڒَا ذ شَّانْ نّشْ أَڒْ ثِينڭُّورَا ن ثمُّورْثْ. أَفُوسْ نّشْ أَفُوسِي إِشُّورْ س ثْسڭْذَا. 12 أجّْ أَذْرَارْ ن صِيهْيُونْ أَذْ إِفَارْحْ، جّمْ يسِّيسْ ن يَاهُوذَا أَذْ أَرشْقنْثْ زِي سِّيبّثْ ن ڒحْكَامَاثْ نّشْ. 13 كّمْ خْ صِيهْيُونْ، نّْضمْ أَسْ-د، حسْبمْ صُّومْعَاثْ نّسْ! 14 ڭّمْ ؤُڒْ نْومْ خْ ڒْحِيضْ نّسْ إِجهْذنْ، خْزَارمْ مْلِيحْ ذِي ڒقْصُورْ نّسْ، حِيمَا أَذْ ت تّْعَاوْذذْ إِ جِّيڒْ إِ د غَا يَاسنْ. 15 مَاغَارْ أَربِّي وَانِيثَا ذ أَربِّي نّغْ إِ ڒبْذَا قَاعْ. نتَّا أَذْ أَنغْ إِنْذهْ غَارْ ؤُجمَّاضْ ن ڒْموْثْ.