إِزهِّيذنْ 31

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 نشّْ أَركّْوَاڒغْ غَاركْ، أَ سِيذِي، وَارْ تّجِّي أَذْ سضْحِيغْ إِ ڒبْذَا، فكّْ أَيِي س ثْسڭْذَا نّشْ. 3 أوْشْ أَيِي أَمزُّوغْ نّشْ، فكّْ أَيِي ذغْيَا. إِڒِي ذ ثَاصْضَارْثْ إِجهْذنْ إِ نشّْ، إِجّْ ن لْبُورْجْ حِيمَا أَذْ أَيِي ثسّْنجْمذْ. 4 مَاغَارْ شكْ ذ ثَاصْضَارْثْ إِنُو ذ لْبُورْجْ إِنُو. نْذهْ أَيِي، ثْهِيلَّا ذَايِي ذِي طّْوعْ ن يِيسمْ نّشْ. 5 فكّْ أَيِي زِي ثْرَاشَّا نِّي خَافِي ڭِّينْ س ثْنُوفّْرَا، مَاغَارْ شكْ ذ جّهْذْ إِنُو. 6 ذڭْ ؤُفُوسْ نّشْ إِ ڭِّيغْ بُوحْبڒْ إِنُو. شكْ ثفْذِيذْ أَيِي، أَ سِيذِي، أَربِّي، ذ أَمْثِيقِّي إِ ثدْجِيذْ. 7 نشّْ شَارّْهغْ إِنِّي إِتّْشغْڒنْ إِخفْ نْسنْ س ڒخْيَاڒَاثْ إِبطّْڒنْ. نشّْ تّشْڒغْ خْ سِيذِي. 8 نشّْ أَذْ أَرشْقغْ ؤُ أَذْ فَارْحغْ زِي ثْمخْسِيوْثْ نّشْ إِشوَّارنْ، مِينْزِي شكْ ثتّْوَاڒِيذْ ڒغْبنْ إِنُو ؤُ ثَارڭّْبذْ خْ ڒحْصَارَاثْ إِنُو، 9 مِينْزِي وَارْ ذ أَيِي ثَارِّيذْ غَارْ ؤُفُوسْ ن ڒعْذُو إِنُو، مَاشَا ثڭِّيذْ أَيِي تَّاسِيعْ غَارْ إِضَارنْ إِنُو. 10 حِينّْ خَافِي، أَ سِيذِي، مَاغَارْ تّْوَاحصَّارغْ، ثِيطّْ إِنُو ذ ڒعْمَارْ إِنُو ذ ثكْرِيشْثْ إِنُو أَقَا فشْڒنْ. 11 مَاغَارْ ثُوذَارْثْ إِنُو ثْكمّڒْ س وشْضَانْ، إِسڭّْوُوسَا إِنُو س ؤُزهَّارْ. جّْهذْ إِنُو إِهيّفْ زِي ڒْمُوعْصِييّثْ إِنُو، إِخْسَانْ إِنُو أَقَا أَرْشَانْ. 12 إِ مَارَّا إِنِّي ذ أَيِي إِحصَّارنْ ذوْڒغْ ذ أَسْثهْزِي، إِ جِّيرَانْ إِنُو قَاعْ أَطَّاسْ، إِ يِينِّي ذ أَيِي إِسّْننْ ذوْڒغْ ذ إِجّنْ إِ إِسّْنخْڒِيعنْ. إِنِّي ذ أَيِي إِتّْوَاڒِينْ ذڭْ وبْرِيذْ، تّْرَاكّْوَاڒنْ زَّايِي. 13 تُّونْ أَيِي س وُوڒْ أَمْ يِيجّْ ن ؤُمتِّينْ، ذوْڒغْ أَمْ يِيشقْفَانْ ن وقْذِيحْ، 14 مَاغَارْ سْڒِيغْ أَقَا أَطَّاسْ شقّْفنْ ذَايكْ، أَسِّيڭّْوذْ ثُوغَا إِتّنّضْ أَيِي-د ؤُمِي خَافِي ڭِّينْ ثَامعْمُوتْشْ. ثُوغَا أَرزُّونْ أَذْ كّْسنْ ثُوذَارْثْ إِنُو. 15 مَاشَا نشّْ تّشْڒغْ خَاكْ، أَ سِيذِي، قَّارغْ: ‘شكْ ذ أَربِّي إِنُو!’ 16 ڒْوقْثْ إِنُو أَقَا-ت ذڭْ ؤُفُوسْ نّشْ. فكّْ أَيِي زڭْ ؤُفُوسْ ن ڒْعذْيَانْ إِنُو ؤُ زڭْ إِنِّي ذ أَيِي إِضفَّارنْ، 17 أجّْ ؤُذمْ نّشْ أَذْ يَارْغْ خْ ؤُمْسخَّارْ نّشْ، سنْجمْ أَيِي س ثْمخْسِيوْثْ نّشْ إِشوَّارنْ. 18 أَ سِيذِي، وَارْ تّجِّي أَذْ ذوْڒغْ تّْسضْحِيغْ، مَاغَارْ خَاكْ إِ تّْڒَاغِيغْ. أَرّْ إِعفَّاننْ أَذْ ذوْڒنْ تّْسضْحَانْ، أَرّْ إِ-ثنْ أَذْ سُّوسْمنْ ذِي ڒَاخَارْثْ. 19 أجّْ أَذْ سْقَارنْ إِينْشِيشنْ إِسّْخَارِّيقنْ، إِنِّي إِسَّاوَاڒنْ س نّْفَاخثْ ضِيدّْ إِ ؤُمْسڭّذْ، س ؤُعفَّارْ ذ ؤُسحْقَارْ. 20 مشْحَاڒْ إِمقَّارْ ڒْخَارْ نّشْ إِ ثْخمّْڒذْ إِ يِينِّي شكْ إِتّڭّْوذنْ، نِّي ثسّْوجْذذْ إِ يِينِّي غَاركْ يَاركّْوَاڒنْ زِي ثَارْوَا ن بْنَاذمْ! 21 شكْ ثسّْذُورُّويذْ إِ-ثنْ س ؤُڒحَّافْ ن وُوذمْ نّشْ، زِي نّْفَاخثْ ن بْنَاذمْ. شكْ ثسّْنُوفَّارذْ إِ-ثنْ ذِي ثخْزَانْثْ، زڭْ ؤُمْشُوبّشْ ن إِينْشِيشنْ. 22 أَذْ إِتّْوَابَاركْ سِيذِي، مَاغَارْ نتَّا يَارَّا أَيِي-د ثَامخْسِيوْثْ نّسْ إِشوَّارنْ ذ ڒعْجبْ، ذڭْ إِشْثْ ن ثنْذِينْثْ إِفَارْينْ. 23 نشّْ ذغْيَا نِّيغْ: “نشّْ تّْوَاقسّغْ زِي زَّاثْ إِ ثِيطَّاوِينْ نّشْ!’ مَاشَا عَاذْ شكْ ثسْڒِيذْ إِ ثْمِيجَّا إِنُو، ؤُمِي د خَاكْ ڒَاغِيغْ. 24 سْعِيزّمْ سِيذِي، مَارَّا إِمْثِيقَّانْ نّسْ، مَاغَارْ سِيذِي إِحطَّا خْ يِينِّي إِتَّامْننْ، ؤُ ونِّي إِتّڭّنْ س نّْفَاخثْ، إِتّْخدْجصْ إِ-ث س أَطَّاسْ. 25 إِڒِيمْ ذ إِرْيَازنْ ؤُ نتَّا أَذْ ذَايْومْ يڭّْ ؤُڒْ، وَاهْ، مَارَّا إِنِّي إِتّْرَاجَانْ سِيذِي.