إِزهِّيذنْ 30

1 أَزهّذْ. إِزْڒِي إِ ؤُذشّنْ ن ثَادَّارْثْ. ن ذَاوُوذْ. 2 نشّْ أَذْ شكْ سُّوعْڒِيغْ، أَ سِيذِي، مَاغَارْ شكْ ثسّْڭعّْذذْ أَيِي، وَارْ ثجِّيذْ شَا ڒْعذْيَانْ إِنُو أَذْ فَارْحنْ خْ وعْرُورْ إِنُو. 3 أَ سِيذِي، أَربِّي إِنُو، نشّْ ڒَاغِيغْ أَشْ، ؤُشَا شكْ ثسّْڭنْفِيذْ أَيِي. 4 أَ سِيذِي، شكْ ثسُّوعْڒِيذْ ڒعْمَارْ إِنُو زِي ڒَاخَارْثْ، ثَارِّيذْ أَيِي-د غَارْ ثُوذَارْثْ جَارْ يِينِّي د-إِهكّْوَانْ ذڭْ وحْفُورْ. 5 زهّْذمْ إِ سِيذِي، أَ كنِّيوْ، إِمْثِيقَّانْ نّسْ، قَاذَامْ،عقْڒمْ خْ ثْقدَّاسْثْ نّسْ. 6 مَاغَارْ أَغْضَابْ نّسْ إِتّكّْ ذْرُوسْ وَاهَا، مَاشَا أَرْضَا نّسْ إِتّْغِيمَا مَارَّا ثُوذَارْثْ. ذِي ثْمذِّيثْ أَقَا ذِينْ إِمطَّاونْ أَڒْ دْجِيڒثْ، مَاشَا غَارْ ثُوفُّوثْ أَقَا ذِينْ أَسْڒِيوْڒوْ. 7 ذڭْ ؤُفْڒَاحْ إِنُو نِّيغْ نشّْ: “وَارْ تّْفَارِيغغْ شَا إِ ڒبْذَا!" 8 أَ سِيذِي، ذِي ڒْخَاضَارْ نّشْ ثسّْمثْنذْ أَذْرَارْ إِنُو س ؤُمتّنْ إِجهْذنْ، مَاشَا ؤُمِي ثْڒحّْفذْ ؤُذمْ نّشْ، ذوْڒغْ تّڭّْوذغْ. 9 نشّْ ڒَاغِيغْ أَشْ-د، أَ سِيذِي، تَّارغْ أَرْضَا زِي سِيذِي إِنُو. 10 مَانْ ڒفْضڒْ نْ إِذَامّنْ إِنُو، ن ؤُهكّْوُو إِنُو غَارْ ثُورْصُوضِي ذڭْ ونْضڒْ؟ مَا أَذْ شكْ ثْقَاذَا ثْعجَّاجْثْ؟ مَا أَذْ ثْبَارّحْ س ڒَامَانْ نّشْ؟ 11 سڒْ-د غَارِي، أَ سِيذِي، حِينّْ خَافِي، أَ سِيذِي، إِڒِي ذ أَمْعَاونْ إِنُو. 12 شكْ أَقَا ثَارِّيذْ ثْغُويِّيثْ إِنُو ن وشْضَانْ ذ شّْضِيحْ س نُّوبْثَاثْ، ثسَّارْخُوذْ ثَاخَانْشثْ إِنُو ن وشْضَانْ، ثسّْبيْسذْ أَيِي س ڒفْرَاحثْ، 13 حِيمَا أَعُودْجِي إِنُو أَذْ أَشْ إِزهّذْ ؤُ وَارْ إِتّْسُوسُومْ. أَ سِيذِي، أَربِّي إِنُو، نشّْ أَذْ شكْ قَاذِيغْ إِ ڒبْذَا.