إِزهِّيذنْ 116

1 نشّْ تّخْسغْ، مَاغَارْ سِيذِي إِسْڒَا إِ ثْمِيجَّا إِنُو، إِ ثُوثْرَا إِنُو، 2 مَاغَارْ نتَّا إِوْشَا أَيِي أَمژُّوغْ نّسْ. أَذْ أَسْ ڒَاغِيغْ مَارَّا ؤُسَّانْ ن ثُوذَارْثْ إِنُو. 3 إِسغْوَانْ ن ڒْموْثْ نّْضنْ أَيِي-د، ثوْضَا-د خَافِي ثِيڭّْوُوذَا ن ڒَاخَارْثْ. نشّْ ؤُفِيغْ أَقَا أَيِي تّْوَاحْصَارغْ ؤُ شضْنغْ. 4 ڒَاغِيغْ خْ يِيسمْ ن سِيذِي، نِّيغْ: “أَ سِيذِي، فكّْ ڒعْمَارْ إِنُو!" 5 سِيذِي ذ أَحْنِينْ ذ أَمْسڭّذْ، أَربِّي نّغْ ذَايسْ ڒحْنُونشْثْ. 6 سِيذِي إِحطَّا ؤُڒَاونْ ن إِحَافِييّنْ. نشّْ ثُوغَا أَيِي أَمْ ؤُنعْضَابْ، مَاشَا نتَّا إِسّنْجمْ أَيِي. 7 هْنَا عَاوذْ، أَ ڒعْمَارْ إِنُو، مَاغَارْ سِيذِي إِڭَّا أَشْ مِينْ إِصبْحنْ. 8 مَاغَارْ شكْ ثحْضِيذْ ڒعْمَارْ إِنُو زِي ڒْموْثْ، ثِيطَّاوِينْ إِنُو زڭْ إِمطَّاونْ، أَضَارْ إِنُو زڭْ ؤُنقْرَاضْ. 9 أَذْ ؤُيُورغْ زَّاثْ إِ وُوذمْ ن سِيذِي، ذِي ثمُّورَا ن يِينِّي إِدَّارنْ. 10 نشّْ ؤُمْنغْ، س ؤُينِّي نِّيغْ: “نشّْ تّْوَاحْصَارغْ أَطَّاسْ!" 11 ذِي ثِيڭّْوُوذِي إِنُو نِّيغْ: “مَارَّا إِوْذَانْ ذ أَيْثْ ن بُو-إِخَارِّيقنْ!" 12 مَامّشْ إِ غَا خدْجْصغْ سِيذِي خْ مَارَّا ڒْخَارْ إِ ذ أَيِي إِڭَّا؟ 13 أَذْ سّْڭعّْذغْ ڒْْكَاسْ ن ؤُسنْجمْ أَمقّْرَانْ، أَذْ ڒَاغِيغْ خْ يِيسمْ ن سِيذِي. 14 نشّْ أَذْ كمّْڒغْ لْوُوعُوذْ إِنُو إِ سِيذِي، قِيبَاتْشْ إِ مَارَّا ڒْڭنْسْ نّسْ. 15 أَقَا إِغْڒَا ذِي ثِيطَّاوِينْ ن سِيذِي ڒْْموْثْ ن إِمْثِيقَّانْ نّسْ. 16 أَ سِيذِي، أَقَا نشّْ ذ أَمْسخَّارْ نّشْ، نّشْ ذ أَمْسخَّارْ نّشْ، مِّيسْ ن ثَايَّا نّشْ. شكْ ثسَّارْخُوذْ خَافِي إِشذِّيينْ إِنُو. 17 نشّْ أَذْ شكْ د-أَوْيغْ ثَاوْهِيبْثْ ن ؤُقَاذِي، أَذْ ڒَاغِيغْ خْ يِيسمْ ن سِيذِي. 18 نشّْ أَذْ سّْقفْڒغْ لْوُوعُوذْ إِنُو إِ سِيذِي، قِيبَاتْشْ إِ مَارَّا ڒْڭنْسْ نّسْ. 19 ذِي ڒمْرَاحَاثْ ن ثَادَّارْثْ ن سِيذِي، ذِي ڒْوسْطْ نّمْ، أَ ؤُرْشَالِيمْ! هَالِّيلُو-يَاه.