إِزهِّيذنْ 115

1 وَارْ إِدْجِي إِ نشِّينْ، أَ سِيذِي، وَارْ إِدْجِي إِ نشِّينْ، مَاغَارْ إِ يِيسمْ نّشْ أَذْ يِيڒِي ؤُعُودْجِي، ذِي سِّيبّثْ ن ثْمخْسِيوْثْ نّشْ إِشوَّارنْ ذ ڒَامَانْ نّشْ. 2 مَايمِّي غَا قَّارنْ ڒڭْنُوسْ: ‘مَانِي إِدْجَا خنِّي أَربِّي نْسنْ؟’ 3 أَربِّي نّغْ أَقَا-ث ذڭْ ؤُجنَّا، إِڭَّا مَارَّا مِينْ ذ أَسْ يَارْضَانْ. 4 ڒخْيَاڒَاثْ نْسنْ ن لْ-أَصْنَامْ أَقَا أَثنْثْ س نُّوقَارْثْ ذ وُورغْ، ڒْْخذْمثْ ن إِفَاسّنْ ن إِوْذَانْ. 5 غَارْسنْ أَقمُّومْ، مَاشَا وَارْ سِّيوِيڒنْثْ، غَارْسنْثْ ثِيطَّاوِينْ، مَاشَا وَارْ تّْوِيڒِينْثْ، 6 غَارْسنْثْ إِمزُّوغنْ، مَاشَا وَارْ تّسْڒِينْثْ، غَارْسنْثْ وَانْزَارنْ، مَاشَا وَارْ تّْشمِّينْثْ. 7 إِفَاسّنْ نْسنْ وَارْ زمَّارنْ أَذْ شبَّارنْ، إِضَارنْ نْسنْ وَارْ زمَّارنْ أَذْ ؤُيُورنْ. نِيثْنِي وَارْ سُّوفُّوغنْ ڒْحسّْ زِي ثْمِيجَّا نْسنْ. 8 أجّْ إِنِّي ثنْثْ إِڭِّينْ أَذْ ذَايْسنْثْ أَروْسنْ، كُوڒْ إِجّْ زڭْ إِنِّي خَاسنْثْ إِتّشْڒنْ. 9 إِسْرَائِيل، ثْشڒْ خْ سِيذِي. نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي. 10 ثَادَّارْثْ ن هَارُونْ، ثْشڒْ خْ سِيذِي. نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي. 11 مَارَّا كنِّيوْ إِنِّي إِتّڭّْوذنْ سِيذِي، ثشْڒمْ خْ سِيذِي. نتَّا ذ ثْوِيزَا نْسنْ ذ ثَاسدَّارْثْ نْسنْ إِ ؤُسڒْقِي. 12 سِيذِي إِعْقڒْ خَانغْ، نتَّا أَذْ إِبَاركْ. أَذْ إِبَاركْ ثَادَّارْثْ ن إِسْرَائِيل، أَذْ إِبَاركْ ثَادَّارْثْ ن هَارُونْ. 13 نتَّا أَذْ إِبَاركْ إِنِّي إِتّڭّْوذنْ زِي سِيذِي، إِمژْيَاننْ جْمِيعْ أَكْ-ذ إِمقّْرَاننْ. 14 سِيذِي أَذْ أَومْ إِسّْمَارْنِي ثَارْوَا، إِ كنِّيوْ ؤُڒَا إِ إِحنْجِيرنْ نْومْ. 15 كنِّيوْ ثتّْوَابَارْكمْ زِي سِيذِي، ونِّي إِڭِّينْ إِجنْوَانْ ذ ثمُّورْثْ. 16 إِجنْوَانْ، وَاهْ، إِجنْوَانْ ن سِيذِي، مَاشَا ثَامُّورْثْ إِوْشَا إِ-ت إِ ثَارْوَا ن بْنَاذمْ. 17 إِمتَّانْ وَارْ زمَّارنْ أَذْ سّمْغَارنْ سِيذِي، ؤُڒَا ذ إِنِّي د-إِهْوَانْ ذڭْ ؤُسُوسمْ. 18 نشِّينْ أَذْ نْبَاركْ سِيذِي، زِي ڒخُّو أَڒْ إِ ڒبْذَا. هَالِّيلُو-يَاهْ!