ዓይኑሞ ማፃኣፖ 65

¹ ፆኦሲዮ! ፂዮኔይዳ ጋላታ ኔኤም ኮይሳኔ፤ ኔኤም ኑኡኒ ናኣቤ ናኣቦዋ ዒንጊ ኩንሣንዳኔ።

² ኔኤኒ ሺኢጲሢ ዋይዛያ ማዔሢሮ ዓሲ ቢያ ኔ ባንሢ ሙካንዳኔ።

³ ጎማ ኑና ኩሚ ባይዜ ዎዶና ኔኤኒ ኑ ዻቢንቶ ዓቶም ጌዔኔ።

⁴ ኔኤኒ ዶኦሬ፥ ኔ ባንሢያ ኔ ዑኪሴ ዓሳ ቡካ ጶኦካ ኔ ጌሤዞንሢ ዎዛዾንጎ፤ ኔኤኮ ዱማዼ ጌኤዦ ማኣራፓ ኔ ኬኤፃፓ ዓንጆ ኑ ሚሽካንዳኔ።

⁵ ኑና ዓውሳ ፆኦዛሢዮ! ኔኤኮ ዲቃሣ ፂሉሞና ኑኡም ማሄ፤ ኔኤኒ ሳዖኮ ጋፖም ቢያ ሃኬ ዓኣ ባዞማኣ ጉሙርሳ ዎዛሢኬ።

⁶ ዹኮ ኔኤኒ ኔ ዶዱሞና ማዤኔ፤ ዎልቆዋ ኔኤኮ ኔኤኒ ቱኡቴኔ።

⁷ ኔኤኒ ባዞኮ ዖኦዢፆ ባዞ ጉዳሢኮዋ ጉኡሚፆ ዴሮኮዋ ዣላሢ ኔ ዚቲዳኔ።

⁸ ሳዖኮ ጋፓ ሃኬ ዓኣሢ ኔኤኮ ዲቃሣ ዓኮ ማዾሮ ዲቃታኔ፤ ካሪፆንታ ዓሚፆንታ ሙካኣና ዎዛዺ ዒላሻንዳጉዲ ኔ ማሃኔ።

⁹ ሳዖም ዒርዚ ኔ ዋርቂሻኔ፤ ዔባ ዓኣፓንዳጉዲ ማሂሢና ዖርጎቻኔ፤ ዎሮ ዋኣሢና ኔ ኩንሣኔ፤ ሳዖይዳ ሃኣኮ ኔ ባቃልሳኔ፤ ዬያ ኔ ማዻሢያ ሂዲኬ፦

¹⁰ ጎሽኪንቴ ጎዦይዳ ዒርዚ ኔ ዋርቂሳኔ፤ ሂርኪ ዼግ ጋዓ ቤዞ ኔ ጊኢጊሻኔ፤ ሳዖ ዓጮ ዒሮኮ ዑኡፖና ኔ ዎዒሳኔ፤ ባቃሎ ባቃልሲ ኔ ዑጊሳኔ።

¹¹ ኔ ኮሹሞና ካፃ ሃኣካ ዎዚ ሚርጋይ! ኔ ዓኣ ቤዛ ቢያ ሚርጌ ሃኣኮ ዓኣኔ።

¹² ዓሳ ናንጉዋ ዳውላ ሚርጌ ማኣቲ ዋርቄኔ፤ ጌሜራኣ ዎዛና ኩሜኔ።

¹³ ቦኦላዻ ጊንፃ ቆልሞ ሌሊ ማዔኔ፤ ዶኦጮ ጊንፃኣ ሃኣኮና ኩሜኔ፤ ዬያሮ ቢያሢ ዎዛዺ ዒላሺሢና ኔኤም ዓይናዻኔ።