ዓይኑሞ ማፃኣፖ 64

¹ ፆኦሲዮ! ታኣኮ ሜቶሮ ኔና ታ ሺኢቃሢ ዋይዜ፤ ታ ሞርካ ታና ዒጊቻሢዳፓ ታና ካፔ።

² ፑርቶ ዓሳ ታ ጊዳ ጌኔ ማሊሢና ዔቄሢፓ ዔያቶኮ ዎጎ ዎጋኒ ቡኮሢዳፓኣ ታና ዓይሴ።

³ ዔያታ ዒንዲርዞ ፔኤኮ ዓዳ ጬንቻ ዓፓሮጉዲ ዋርቃኔ፤ ዔያቶኮ ጫንጮ ዑኡዛ ሂኢሺጉዲ ዱካኔ።

⁴ ካቲ ዴዒ ፂሎ ዓሶ ዔያታ ዱካኔ፤ ዓሳ ማሊባኣንቴ ዒጊጩዋዖ ዱካኔ።

⁵ ፑርታ ባኣዚ ማዻኒ ዎላ ዞርታኔ፤ ፒራሢያ ዓኣቺ ፒራኒ ዔያታ ጌስታኔ፤ ዔያታ ዬያ ቢያ ሂዳዖ፦ «ዖኦኒያ ዴንቃኒ ኑና ዳንዳዑዋሴ» ጋዓኔ።

⁶ ዔያታ ጌኔ ማሊሢ ማሊ ቱኬስካፓ፦ «ዓካሪ ፑርታ ማሊሢ ዶዲ ኑኡኒ ቱኬኔ» ጋዓኔ። ዬይያ፦ ዓሲኮ ዒናንታ ማሊሢያ ጌኔ ባኣዚና ኩሜያ ማዒፆ ዔርዛኔ።

⁷ ፆኦሲ ጋዓንቴ ዔያቶ ፔ ሂኢዦና ዱካንዳኔ፤ ዔያታ ማሊባኣዖ ማኣሳናንዳኔ።

⁸ ፔ ዻንጎና ዔያታ ዹቂንታንዳኔ፤ ባይሲንታ ዔያቶ ሄላንዳኔ፤ ዬያሮ ዔያቶ ዛጋ ዓሳ ቢያ ዔያቶ ዾንኪ ቶኦኮ ፔኤሲ ዓጊሣንዳኔ።

⁹ ዓሲ ቢያ ዒጊጫንዳኔ፤ ፆኦሲ ማዼ ባኮ ፔጌና ዔያታ ኬኤዛንዳኔ፤ ዒናፓኣ ዔያታ ማላንዳኔ።

¹⁰ ፂሎ ዓሳ ፆኦሲና ዎዛዾንጎ፤ ዒዛ ፔኤኮ ፑኖ ካያሢ ማሄ ዓሳ ዒኖ ፒዜዚንሢያ ቢያ ዎዛዾንጎ።