Romanos 16

1 I̱t’aà tsa̱jòn sìnga̱tsjaânò jè tichjaá Febe, jè xi síchját’aà na̱xa̱ndáâla̱ Cristo xi ya̱ tíjna Cencrea; 2 ndaà chjoétjò xi̱ta̱ jè nga xinguia̱á ma nga ti̱koa̱á mokjeiínâla̱ i̱t’aà ts’e̱ Na̱’ènâná nga k’oa̱á s’ín ok’ìnâla̱ xi xi̱ta̱âla̱ Cristo. Ti̱chját’aàâlà ni̱ta̱ mé xi ko̱chjeénâla̱ nga ‘ñó kjín xi̱ta̱ tsasìko̱, ti̱koa̱ ‘a̱n kisìchját’aàâna. 3 Ti̱ixat’eì jè Priscila ko̱ Aquila, jñà xi̱ta̱ xi ta̱ña nìxákjoòâje̱n i̱t’aà ts’e̱ Cristo Jesús. 4 Jñà xi̱ta̱ koi kjo̱meè kinìk’en xi kjoa̱ ts’a̱n. Mìtsà tà ‘a̱n xi tsjaàâla̱ kjo̱ndaà ti̱koa̱ tsjáâla̱ kjo̱ndaà ngats’iì xi̱ta̱ na̱xa̱ndáâla̱ Cristo xi mìtsà xi̱ta̱ judío. 5 Ti̱koa̱ ti̱ixat’eì jñà xi̱ta̱ na̱xa̱ndáâla̱ Cristo xi maxkóya ya̱ ni’yaâla̱ Priscila ko̱ Aquila. Ti̱ixat’eì jè Epeneto xi ‘ñó matsjake̱ nga jè kòkjeiín ítjònâla̱ i̱t’aà ts’e̱ Cristo ya̱ i̱’nde Acaya. 6 Ti̱ixat’eì jè María, chjo̱ón xi ‘ñó ndaà kisìxá i̱t’aà tsa̱jòn. 7 Ti̱ixat’eì jè Andrónico ko̱ Junias, xi xinguia̱á ma nga ta̱ña tsitsa̱jna’yaâje̱n nda̱yá. Jñà xi̱ta̱ xi tsibíxáyaâla̱ Cristo ‘ñó matsjakeè xi̱ta̱ koi. Ko̱ ìsa̱ ítjòn kijtseèxkon ‘énâla̱ Cristo koni ‘a̱n. 8 Ti̱ixat’eì jè Amplias, jè xi̱ta̱ xi ‘a̱n ‘ñó matsjake̱ i̱t’aà ts’e̱ Na̱’ènâná. 9 Ti̱ixat’eì jè Urbano xi ta̱ña síxáko̱âna̱ i̱t’aà ts’e̱ Cristo Jesús ko̱ jè Estaquis xi ‘a̱n ‘ñó matsjake̱. 10 Ti̱ixat’eì jè Apeles xi ndaà kixi̱ mokjeiínâla̱ i̱t’aà ts’e̱ Cristo. Ti̱ixat’eì jñà xi̱ta̱ xíkjín xi ya̱ títsa̱jna ni’yaâla̱ jè Aristóbulo. 11 Ti̱ixat’eì jè Herodión xi xinguia̱á ma. Ti̱ixat’eì jñà xi̱ta̱ xíkjín xi ya̱ títsa̱jna ni’yaâla̱ Narciso xi Na̱’ènâná títsa̱jnako̱. 12 Ti̱ixat’eì jè Trifena ko̱ Trifosa jñà íchjín xi ‘ñó síxáâla̱ Na̱’ènâná, ko̱ tichjaá Pérsida xi ‘ñó matsjachaá nga ti̱koa̱ ndaà síxáâla̱ Nainá. 13 Ti̱ixat’eì jè Rufo xi xó jaàjiìnâne Nainá. Ko̱ nea̱âla̱ xi ‘a̱n k’oa̱ ti̱s’ín beètakoàn koni tsà nea̱âna̱. 14 Ti̱ixat’eì jè Asíncrito, jè Flegonte, jè Hermas, jè Patrobas, jè Hermes ko̱ xi̱ta̱ ’ndseé xi ya̱ títsa̱jnako̱. 15 Ti̱ixat’eì jè Filólogo, jè Julia, jè Nereo ko̱ ndichja, ko̱ Olimpas, ngats’iì xi̱ta̱ xi mokjeiínâla̱ i̱t’aà ts’e̱ Cristo xi ya̱ títsa̱jnako̱. 16 Jñò nga jngoò ìjngoò, k’e̱ nga si̱xat’aà xinguio̱o, nguì ko̱ó ini̱ma̱ânò ti̱ixat’aà xinguio̱o nga ko̱ o̱kixi̱ânò. Ngats’iì xi̱ta̱ na̱xa̱ndáâla̱ Cristo xi i̱ títsa̱jna síhixat’aàânò. 17 Ndí ’ndsè k’oa̱á s’ín bìtsi’bàânò nga chítsejènâlà jñà xi̱ta̱ xi síjòya ko̱ xi síkits’ónâjiìn koni s’ín mokjeiínânò, jñà xi kondra̱ f’iìâla̱ kjo̱hítsjeèn koni s’ín kichìta’yà jñò. Ti̱nchat’aàxìnâlà jñà xi̱ta̱ koi. 18 Jñà xi̱ta̱ koi, mìtsà Na̱’ènâná Jesucristo síxáâla̱, tà yijoâla̱á síxátjì. ‘Ãn sin ‘én ndaà chja̱ nga kona̱cha̱nâla̱ xi̱ta̱ xi mìkiì ndaà machi̱yaâla̱. 19 ‘A̱n, matsjaáâna i̱t’aà tsa̱jòn nga jye ndaà na’yàânò nga ndaà nìkitasòn. Ta̱nga ‘a̱n mejènâna nga xi̱ta̱ chji̱ne̱e kàtama i̱t’aà ts’e̱ kjoa̱ xi ndaà tjín. Ko̱ jñà kjoa̱ xi ch’o tjín, kj’eè kiì na’yàânò. 20 Jè Nainá xi tsjáâná kjoa̱’nchán, tà chibaá chijaâla̱ nga ya̱ si̱ìkíjnangui ndso̱koò jè xi̱ta̱ nei̱í méâne nga ko̱ma ki̱nchanè. Kjo̱ndaàâla̱ Na̱’ènâná Jesucristo kàtìjnako̱ânò. 21 Tísíhixat’aàânò jè Timoteo xi ta̱ña nìxákjoòâje̱n, ko̱ Lucio, ko̱ Jasón ko̱ Sosípater jñà xi xi̱ta̱ xinguia̱a ma. 22 ‘A̱n xi Tercio mìâna̱, xi tìkjiìânò xo̱jo̱n jè, i̱t’aà ts’e̱ Na̱’ènâná, sìhixat’aàânò. 23 Ti̱koa̱ tísíhixat’aàânò Gayo; ‘a̱n i̱í tìjna̱a i̱ ni’yaâla̱ nga ti̱koa̱ i̱í bixoña ngats’iì xi̱ta̱ na̱xa̱ndáâla̱ Cristo. Tísíhixat’aàânò Erasto xi̱ta̱ xi bítjò to̱n ts’e̱ ni’ya osen; ti̱koa̱á síhixat’aàânò jè ’ndseé xi ‘mì Cuarto. 24 Ngats’ioò, jè kàtìjnako̱ânò kjo̱ndaàâla̱ Jesucristo xi otíxomaâná. 25 Jeya kàtìjna jè Nainá xi tíjnako̱ânò. Jè xi komà tsjáânò nga’ñó ti̱koa̱ komà kixi̱ si̱ìkítsa̱jnaânò koni tsò ‘én ndaàâla̱ Nainá xi ‘a̱n okoòyaânò ko̱ jñà ‘én xi nokjoàyajiìnânò i̱t’aà ts’e̱ Na̱’ènâná Jesucristo. Nga jyeé tí’yaâla̱ kjoa̱ xi tjí’maâla̱ Nainá skanda sa̱ kjòtseé; 26 ta̱nga i̱’ndei̱ jye ki’yaâla̱ koni s’ín tíchja̱ Xo̱jo̱nâla̱ Nainá xi kiskiì jñà xi̱ta̱ xi kiìchja̱ ngajoâla̱ Nainá kjòtseé. K’oa̱á s’ín tíchja̱ kjo̱tíxomaâla̱ Nainá xi tíjna ni̱ta̱ mé na̱chrjeinânè. Jè kjoa̱’maâla̱ Nainá, jye kis’eno̱jmí yijeâla̱ ngats’iì xi̱ta̱ na̱xa̱ndá xi tjín nga tíjtsa i̱sò’nde méâne nga kàtasíkitasònâne koni s’ín mokjeiínâla̱. 27 Jè Nainá xi ta̱jngoò maâne, xi tjínâla̱ kjoa̱chji̱ne̱, kàtas’eâla̱ kjoa̱ jeya i̱t’aà ts’e̱ Jesucristo ni̱ta̱ mé na̱chrjeinâne. K’oa̱s’ín kàtama.