Filipenses 3

1 Ndí ’ndsè, k’oa̱á xanânò, tsja t’èâlà ini̱ma̱ânò nga Na̱’ènâná Jesús titsa̱jnako̱o. ‘A̱n, mìkiì masiìâna̱ nga tìkjiì ìjngoò k’aânò jñà kjoa̱ xi jye kòkjìn k’a kjiìânò nga kjo̱ndaà tsa̱jònânò. 2 Ti̱kinda̱a yijoânò i̱t’aà ts’e̱ jñà xi̱ta̱ xi kjo̱’ñó mejènâla̱ nga otet’aà yijoâla̱ xi̱ta̱ nga bít’aà chi̱ba̱âla̱ kjoa̱ ts’e̱ circuncisión. Ti̱kinda̱a xi̱ta̱ koi nga ni̱mé chjíâla̱. Ti̱kinda̱a nga ‘ñó ch’o s’ín. 3 Jñáâná xi nguì kixi̱ kjoa̱ nga tjít’aà chi̱ba̱âná nga ‘yaâla̱ nga xi̱ta̱âla̱ Nainá ‘mìâná. Jñáâná xi ndaà yaxkoán Nainá nga jè Ini̱ma̱ Tsjeèâla̱ síchját’aàâná. ‘Ãó ndaà matsjaâná nga jè ma’ñót’aà takoán Cristo Jesús nga mìtsà jè kjoa̱ ts’e̱ yijoâná ma’ñót’aà takoán. 4 ‘A̱n, mìtsà kjoa̱ ts’e̱ yijoâna̱ ma’ñót’aà takoàn na̱s’ín kjìn sko̱ya kjo̱ndaà kisìkitasoàn. Tsà tjín i’nga xi̱ta̱ xi koi ma’ñót’aà takòn kjo̱ndaà xi tjínâla̱, ta̱nga ‘a̱n mì k’oa̱á s’ín tìs’iaàn na̱s’ín tsato kjìn sko̱ya kjo̱ndaà kisìkitasoàn. 5 K’e̱ nga tjínâla̱ jiìn na̱chrjein nga kits’ian, kisit’aà chi̱ba̱âna̱ kjoa̱ ts’e̱ circuncisión. ‘A̱n, xi̱ta̱ Israelâná, tje̱âla̱ Benjamínâná. Xi̱ta̱ Hebreoâná, ko̱ jñà xi̱ta̱ jchíngaâna̱ nguì xi̱ta̱ Hebreoâné. ‘A̱n, nguì xi̱ta̱ fariseoâná nga jñà kjo̱tíxomaâla̱ xi̱ta̱ judío nguì ndaà kisìkitasoàn. 6 Nga ‘ñó fìt’aàâla̱ koni s’ín tjín kjo̱tíxomaâla̱ xi̱ta̱ judío, ‘a̱n skanda kiìtji̱ngui kondra̱áâla̱ xi̱ta̱ na̱xa̱ndáâla̱ Cristo. ‘A̱n, nguì kixi̱í kisìkitasoàn kjo̱tíxomaâla̱ xi̱ta̱ judío, ni̱jngoò xi mìkiì ndaà kisìkitasoàn. 7 Nga sa̱ ítjòn, ‘a̱n, k’oa̱á s’ín kisìkítsjeèn nga ‘ñó tse chjíâla̱ ngats’iì kjoa̱ koi; ta̱nga i̱’ndei̱ nga Cristo fìt’aàâla̱ ni̱mé chjíâla̱ kjoa̱ koi. 8 Xi nguì o̱kixi̱, ngats’iì kjoa̱ xi ‘a̱n ma’ñót’aà takoàn nga sa̱ kjòtseé, i̱’ndei̱, k’oa̱á s’ín beè takoàn nga ni̱mé chjíâla̱ mì k’oa̱àâne koni s’ín bexkoan Cristo Jesús xi otíxomaâna nga ìsa̱ ‘ñó tsato chjíâla̱. Ngats’iì kjoa̱ koi, jyeé tsachrjenguia yije xi kjoa̱âla̱ Cristo. Ta tjé beè takoàn méâne nga ya̱ ma fìt’aàâla̱ Cristo 9 ko̱ méâne nga ya̱ kóti̱jnakjoòkoa̱a. Nga kixi̱ óti̱jna nga nguixko̱n Nainá, mìtsà koi kjoa̱âla̱ nga ‘a̱n ndaà sìkitasoàn kjo̱tíxomaâla̱ xi̱ta̱ judío, koiâné nga mokjeiínâna i̱t’aà ts’e̱ Cristo. Jè Nainá xi kixi̱ síkíjnaâna koií kjoa̱âla̱ nga mokjeiínâna. 10 Mejènâna̱ nga ìsa̱ ndaà skoexkoan Cristo; skoeè nga’ñó xi tjínâla̱ nga jaáyaâla̱ i̱t’aà ts’e̱ kjoa̱biyaà; kàtamajngoò kjo̱hítsjeènâna̱ ko̱ ts’e̱ Cristo koni s’ín komàt’in nga kisìkjeiín kjo̱’in skanda k’e̱ nga k’en, 11 méâne k’oa̱ ti̱s’ín kjoa̱áyaâna̱ i̱t’aà ts’e̱ kjoa̱biyaà koni s’ín jaáyaâla̱ Cristo. 12 Mìtsà tsòâne kjoa̱ nga jye kjòngásòn yijeâna kjoa̱ koi. Kj’eè tsà nguì xi̱ta̱ kixi̱ ‘mìâna̱. Ta̱nga tífì tji̱nguiâla̱ nga mejènâna nga ìsa̱ ndaà skoexkoan skanda kó nga ki̱jchò tji̱nguiâla̱ mé kjoa̱âne nga ijchò tji̱nguiâna̱ Cristo Jesús. 13 Ndí ’ndsè, k’oa̱á s’ín machi̱yaâna̱, kj’eè kiì bijchó tji̱ngui yijeâla̱ kjo̱ndaà xi tjínâla̱ Cristo. Ta̱nga jngoò kjoa̱ tìs’iaàn, tìsìjchàajñaà yije kjoa̱ xi jye tsato, tíbínèâla̱ yijoâna̱ nga ki̱jchò tji̱nguiâla̱ kjoa̱ xi sa̱ nchrobá. 14 Tífì tji̱nguiâla̱ skanda ñánda fehet’aàâne, méâne nga tjoéâna kjo̱tjò xi Nainá tsjáâna nga xó kiìchja̱âna Nainá ján ngajmiì nga Cristo Jesús tìjna̱koa̱a. 15 Ngats’iaá xi jye ndaà mokjeiínâná i̱t’aà ts’e̱ Cristo, ngásòn ngáya k’oa̱s’ín si̱kítsjeén. Jñò, tsà mìkiì k’oa̱s’ín nìkítsjeèn, Nainá si̱ìkíchi̱yandaàânò. 16 Ta̱nga mochjeénâné nga k’oa̱s’ín si̱kitasoán koni kji jye machi̱yaâná skanda na̱chrjein i̱’ndei̱. 17 Ndí ’ndsè, k’oa̱á s’ín ti̱jchá yijoânò koni s’ín tìsìjchá yijoâna̱. Chjínguìâlà jñà xi̱ta̱ xi k’oa̱s’ín ndaà nchisíjchá yijoâla̱ koni s’ín titsa̱’nèâje̱n. 18 Nga kjìn ma xi̱ta̱ xi tjíma xi kondra̱ fì tji̱nguiâla̱ jè ‘én xi tís’eno̱jmíya nga krò k’enât’aà Cristo. Kòkjìn k’a k’oa̱ xanânò; i̱’ndei̱ skanda ko̱ó ndáxkoaàn tìbìxteèn nga ìjngoò k’a k’oa̱ tìxanânò. 19 Xi̱ta̱ koi, k’e̱ nga kjoe̱het’aà na̱chrjeinâla̱, kjo̱’iín si̱ìkjeiín ni̱ta̱ kjéâne. Ta koií ótsji kjoa̱ xi síjé yijoâla̱ ko̱ mìtsà Nainá ótsji. ‘Nga síkítsa̱jna yijoâla̱ kjoa̱ xi tjínèâla̱ nga ko̱sobàâla̱. Tà koií síkítsjeèn kjoa̱ ts’e̱ i̱sò’nde. 20 Ta̱nga jñá, ján i̱’ndeâná ngajmiì. ‘Ãó ndaà titsa̱chiñáâlá nga ya̱ kji̱nchrobàâne jngoò xi ko̱chrjekàjiìnâná kjo̱’in, jèâné Jesucristo xi otíxomaâná. 21 Jè si̱ìkjatjìyaâla̱ yijo ni’ndeâná; k’oa̱á kji ko̱ma koni kji ts’e̱ jè, nga jeya kji. Jè si̱ìkjeén nga’ñó xi tjínâla̱ nga jè otíxoma yijeâla̱ ni̱ta̱ mé xi tjín.