San Mateo 6

1 ‘K’e̱ nga ndaà tjín kjoa̱ xi ’nè, ti̱kinda̱ko̱ânò yijoânò; kì tà k’e̱é k’oa̱ ’nè k’e̱ nga nguixko̱n xi̱ta̱, tsà tà jè xi mejènânò nga skoe̱ânò xi̱ta̱ xi kj’ei̱í. Tsà k’oa̱s’ín s’e̱en, Na̱’ènâná xi tíjna ngajmiì mìkiì si̱ìchikonât’inânò. 2 K’e̱ nga jngoò kjo̱ndaà k’oi̱iâlà xi̱ta̱ i̱ma̱, kì kiì bèno̱jmíâlà ngats’iì xi̱ta̱ xi kj’ei̱í, koni s’ín xi̱ta̱ xi jò i̱sén tjínâla̱ ya̱ ni’ya i̱ngo̱ sinagoga ko̱ ya̱ ndi̱yá nga tsjá kjo̱tjòâla̱ tsojmì xi̱ta̱; tà jé xi mejènâla̱ nga skoe̱ yije xi̱ta̱. Ta̱nga o̱kixi̱í xi xanânò, jñà xi̱ta̱ xi k’oa̱s’ín s’ín, jyeé tjínâla̱ chjíâla̱ [nga nguixko̱n xi̱ta̱. Mì ti̱ mé si̱ìchikonât’inâne Nainá.] 3 K’e̱ nga tsà tsojmì k’oi̱ kjo̱tjòâlà xi̱ta̱ i̱ma̱, mochjeénâné nga mì yá xi̱ta̱ xi skoe̱; ni̱ jè skoe̱ xi ‘ñó amigo chibá. 4 Tjà’maâlà jè kjo̱ndaàânò; k’e̱ nga jè Na̱’ènâná skoe̱ jè xi kjoa̱’ma, jè tsjáânò chjíânò. 5 ‘K’e̱ nga bìtsi’ba, kì k’oa̱á ’nè koni s’ín xi̱ta̱ xi jò i̱sén tjínâla̱. Jñà xi̱ta̱ koi, k’e̱ nga bítsi’baâla̱ Nainá, tsjakeèâné nga bincha kixi̱ ya̱ ni’ya i̱ngo̱ sinagoga ko̱ ya̱ chrja̱ngui̱âla̱ ndi̱tsi̱n ñánda kjìn xi̱ta̱ kotsejènâla̱ nga Nainá bítsi’baâla̱. Xi o̱kixi̱ k’oa̱á xanânò, jñà xi̱ta̱ koi, jyeé tjínâla̱ chjíâla̱ [nga nguixko̱n xi̱ta̱. Mì ti̱ mé si̱ìchikonât’inâne Nainá.] 6 Ta̱nga k’e̱ nga mejènâlè nga kítsi’baâla̱ Na̱’ènâná, ti̱tjás’i̱in ni’yaâlè, tichjoì xotjoa̱âla̱ ni’yaâlè, i̱kjoàn ti̱jéâla̱ kjo̱ndaàâla̱ Na̱’ènâná xi ya̱ ta̱jngoò tíjna’mako̱âlè. Jè Na̱’ènâná tsjáâlè chjíâlè nga jè tíbeè xi kjoa̱’ma. 7 ‘K’e̱ nga bìtsi’ba, kì ta̱xki̱ kjìn ‘én nokjoà, koni s’ín xi̱ta̱ xi mìkiì beèxkon Nainá. K’oa̱á s’ín síkítsjeèn nga kjìn ‘én ki̱chja̱âla̱ Nainá, ìsa̱á ndaà kji̱’nchréâla̱. 8 Kì k’oa̱á ’nè koni s’ín jñà xi̱ta̱ koi; jè Na̱’ènâná jye tíjiìnâla̱ mé xi mochjeénânò k’e̱ nga ti̱kj’eè nìjét’aàâlà. 9 K’e̱ nga bìtsi’ba, kiís’ín ti̱nókjoa̱a: Na̱’ènâna̱je̱n xi tijni ngajmiì, kàtayaxkónâla̱ kjoa̱jeyaâlè nga tsjeè tijni. 10 Kàtjanchrobá kjo̱tíxomaâlè, k’oa̱s’ín kàtama i̱ i̱t’aà nangui koni s’ín mejènâlè nga ko̱ma, koni s’ín ma ján ngajmiì. 11 Tjiìânáje̱n i̱’ndei̱ jè ni̱ño̱ xi mochjeénânaje̱n nga na̱chrjein inchijòn. 12 Ti̱jchàat’aàânáje̱n jéâna̱je̱n koni s’ín nìjchàat’aàâla̱je̱n jñà xi̱ta̱ xi ch’o síko̱âna̱je̱n. 13 Kì kiì biì’ndi yá xi mejènâla̱ nga kot’aàânaje̱n nga ki̱nchátsji jéâje̱n. Ti̱kinda̱ânáje̱n xi i̱t’aà ts’e̱ xi̱ta̱ nei̱í. Nga̱ tsi̱jií kjo̱tíxoma, tsi̱jií nga’ñó ko̱ tsi̱jií kjoa̱jeya ni̱ta̱ kjéâne. K’oa̱s’ín kàtama. 14 ‘Tsà jñò si̱jchàat’aàâlà jéâla̱ xi̱ta̱ xi kj’ei̱í, ti̱koa̱á jè Na̱’ènâná xi tíjna ngajmiì si̱ìjchàat’aàânò jéânò. 15 Ta̱nga tsà jñò mìkiì si̱jchàat’aàâlà jéâla̱ xi̱ta̱, ti̱koa̱á Na̱’ènâná mìkiì si̱ìjchàat’aàânò jéânò. 16 ‘K’e̱ nga bitsa̱jnachjan, kì k’oa̱á ’nè koni s’ín jñà xi̱ta̱ xi jò i̱sén tjínâla̱ nga síkjatjìya i̱sénâla̱, méâne nga skoe̱âne xi̱ta̱ nga ba tjínâla̱ nga títsa̱jnachjan. Xi o̱kixi̱, k’oa̱á xanânò, jñà xi̱ta̱ koi, jyeé kitjoéâla̱ chjíâla̱ [nga nguixko̱n xi̱ta̱. Mì ti̱ mé si̱ìchikonât’inâne Nainá.] 17 Ta̱nga jñò, k’e̱ nga bitsa̱jnachjan, kì k’oa̱á ’nè. Ta̱ sa̱á ta̱nìjnoò i̱sénânò ko̱ ta̱si’a tsja̱skoò, 18 méâne nga mìkiì skoe̱ânò xi̱ta̱ tsà titsa̱jnachjan, ko̱ jè Na̱’ènâná xi tíjna’mako̱ânò, ta̱ jè xi tíbeè. Jè si̱ìchikonât’inânò. 19 ‘Jñò, kì tsojmì kjìn binchatjò i̱ i̱sò’nde; bits’onâné ko̱ makixoâné ko̱ jñà xi̱ta̱ síchijé. 20 Ta sa̱á ján ngajmiì ti̱nchatjò tsojmì. Ján ngajmiì mìkiì bits’on ko̱ mìkiì makixo tsojmì; ti̱koa̱á tsjìn xi̱ta̱ chijé. 21 Ya̱ ñánda ki̱nchatjò tsojmìânò, ti̱koa̱á ya̱á si̱ìkítsjeèn ini̱ma̱ânò. 22 ‘Jñà xkoaán, jè ma ni’ín xi síhiseènâla̱ yijoâná. Koií kjoa̱âla̱ k’e̱ nga ndaà tsejènâná, iseèn choòn yijeâla̱ yijoâná; 23 ta̱nga tsà mìkiì ndaà tsejènâla̱ xkoiìn, ti̱koa̱á kóho̱kji yijoâlè, tà jñò choònâla̱. Nga tjíjñòâla̱ kjo̱hítsjeènâlè ti̱koa̱á nguì tà jñò choònâla̱ yijoâlè. 24 ‘Ni̱jngoò xi̱ta̱ xi jò ko̱ma neiâla̱ nga si̱ìxáâla̱. Tsà jò ko̱ma neiâla̱, jngoò ko̱jtikeè koa̱ jngoò ko̱tsjakeè; jngoò ndaà kjit’aàâla̱ koa̱ ch’o si̱ìko̱ xi ìjngoò. Jñò, tsà kjoa̱ nchi̱ná si̱ìs’inâlà, mìkiì ko̱s’inâla̱ kjoa̱ ts’e̱ Nainá. 25 ‘K’oa̱á xanânò, kì makájnoânò mé tsojmì xi chji̱ne̱e, xi s’io̱o, nga si̱jchá yijoânò, ko̱ mé nikje xi chi̱kjá. ¿A mì ‘yaâjèn k’e̱ nga titsa̱jnakoaán i̱ i̱sò’nde tjínâìsa kjoa̱ xi ìsa̱ ‘ñó chjíâla̱ mì k’oa̱âne koni tsojmì xi ma chine? Ti̱koa̱á yijoâná, tjínâìsa kjoa̱ xi ìsa̱ ‘ñó chjíâla̱ mì k’oa̱âne koni jè nikje xi chíkjá. 26 Chítsejènâlà ni̱se xi tjíma i̱jiìn i̱sén; mì jno̱ó ‘beé; mì ni̱ji̱n majcháâla̱ koa̱ mì ni’nga tjínâla̱ ñánda bincháxkó ni̱ji̱nâla̱; ta̱nga jè Na̱’ènâná xi tíjna ngajmiì tsjáâla̱ tsojmì xi kine; koa̱ jñò, ìsa̱á chjíânò mì k’oa̱âne jñà ni̱se. 27 Jñò, na̱s’ín ta̱kó ‘ñó si̱kájnoò, ni̱ i̱tsé ko̱ma si̱katonèâlà na̱chrjeinânò koni s’ín tjíndaàâla̱ Nainá. 28 ‘¿Méâne nìkájnoânò xi i̱t’aà ts’e̱ nikje xi chi̱kjá? Chítsejènâlà naxó lirio xi majchá i̱jiìn ijñá; mìkiì síxá ko̱ mìkiì maâla̱ faña nikje. 29 Ta̱nga ‘a̱n, k’oa̱á xanânò, ndaà tsà jè Salomón xi xi̱ta̱xá ítjòn tsibìjna nga ‘ñó xi̱ta̱ jeya, mì k’oa̱á kjoàn nikje xi tsohòkjá koni kjoàn jñà naxó nga ndaà kjoàn. 30 Nainá, k’oa̱á s’ín ndaà kjoàn s’ín xka̱ ijñá, xi jngoò na̱chrjein títsa̱jnakon ko̱ xi ma nchijòn kotsjòojiìn ni’ín. Jñò xi xi̱ta̱ ‘mìânò xi mìkiì ndaà mokjeiínânò, ¿a mìtsà ìsa̱ ni̱to̱n tsjáânò Nainá nikje xi mochjeénânò nga chi̱kjá? 31 Kì makájnoânò, kì bixónâjèn: “¿Mé xi chji̱ne̱é?, ko̱ ¿mé xi s’ioa̱á? ko̱ ¿mé nikje xi chi̱kjá?" 32 Nga yije tsojmì koi, k’oa̱á tjín xi ótsji jñà xi̱ta̱ xi mìkiì mokjeiínâla̱ i̱t’aà ts’e̱ Nainá. Ta̱nga jñò tíjnaáânò Na̱’èn xi tíjna ngajmiì xi jyeé tíjiìnâla̱ nga mochjeénânò ngats’iì tsojmì koi. 33 Ãtjòn ti̱nchátsjioò kjoa̱ ts’e̱ Nainá koni s’ín otíxoma ko̱ kjoa̱kixi̱âla̱; ngats’iì tsojmì xi mochjeénânò tà tjoésònânò. 34 Kì makájnoânò mé kjoa̱ xi s’e̱ nchijònâlè; nga nchijònâlè, s’e̱éânò kjoa̱ xi ko̱kájnoânò; tà koií kjoa̱ ti̱kájno xi tjín na̱chrjein i̱’ndei̱.