Santiago 3

1 Jñò ndí ’ndsè, i̱t’aà tsa̱jòn, kì kjìn maâne xi maestro ma. Jyeé ‘ya nga ngaje̱n xi okoòyaâje̱n, tsà mé kjoa̱ xi ch’o ’nèâje̱n, ìsa̱á tse kjo̱’in si̱nèânaje̱n. 2 Ngats’iìâná, kjìn ska̱ya kjoa̱ch’o xi ’né, ta̱nga jngoò xi̱ta̱ xi mì ch’o tsò ‘én xi chja̱, jèâné xi nguì xi̱ta̱ kixi̱, xi komàâla̱ ko̱tìxoma yijeâla̱ yijoâla̱. 3 K’oa̱á ngayaâla̱ koni kohòyo̱ xi si’a freno tso’ba méâne nga si̱ìkitasònâne koni s’ín mejènâná nga kjoi̱, k’oa̱á s’ín ma’nchré yije yijoâla̱. 4 K’oa̱á ti̱s’ín tjín koni s’ín síxá jñà chitso, na̱s’ín tákó i’í kjoàn, ko̱ na̱s’ín ta̱kó ‘ñó ‘ba tjo̱ xi fàhitje̱n, jè xi̱ta̱ xi síxáko̱ na̱s’ín jtobá kji yá xi ‘mì timón xi síxáko̱, maá fàhitje̱n nga fìko̱ ni̱ta̱ kós’ín mejènâla̱ nga kji̱ko̱. 5 K’oa̱á ti̱s’ín ma xi kjoa̱ ts’e̱ ni̱je̱nâná. Tà yijo jtobá kji, ta̱nga ‘ñó ’nga chja̱ ni̱ta̱ mé kjoa̱âne. K’oa̱á ngayaâla̱ koni jngoò ni’ín xi i̱tsé kji, ko̱maá ko̱kángui ijñá na̱s’ín ta̱kó tse ma. 6 Ni̱je̱nâná k’oa̱á ngayaâla̱ koni jngoò ni’ín, ya̱á tjí’a yije ngats’iì ‘én ch’o xi tjín i̱sò’nde xi maâla̱ síkits’ón yije yijoâná. Jè ni’ín xi tjín ya̱ i̱’nde ts’e̱ kjo̱’in ñánda ‘mì infierno, jè bít’a’íâla̱ ni̱je̱nâná nga chja̱ ‘én xi ch’o tsò xi ko̱maâla̱ ko̱kàâná koni tjín na̱chrjein ki̱tsa̱jnakoaán. 7 Ngats’iì cho̱ xi tjín i̱ i̱sò’nde ma ma’nchré, koni jñà cho̱ xi tjín i̱jiìn ijñá, ko̱ xi tjímajiìn i̱sén, ko̱ jñà cho̱ xi nangui bífejno yijoâla̱ ko̱ jñà xi tjín i̱jiìn ndáchikon, jñà xi̱ta̱ maâla̱ sí’nchré. 8 Ta̱nga ni̱jngoò xi̱ta̱ xi maâla̱ sí’nchré ni̱je̱nâla̱. Nga jè ni̱je̱nâná jngoò kjoa̱ ch’o tjínâla̱ xi mìkiì tsjá’nde nga ma’nchré. Ya̱á tjí’a koni xán kjanâla̱ ye̱ xi maâla̱ sík’enâná. 9 Ti̱jèâne ni̱je̱nâná jeya síkíjna Nainá xi Na̱’ènâná, ko̱ ti̱jèâne nokjoà’onâkoa̱á xi̱ta̱ xi ko̱s’ín kisindaà koni kji Nainá. 10 Ti̱jèâne ndso̱baá bitjoâne ‘én xi jeya síkíjna Nainá ko̱ ti̱jè bitjoâne xi nokjoà’onâkoa̱á xi̱ta̱. Ndí ’ndsè, mìkiì ndaà tjín kjoa̱ koi. 11 Jngoò nga̱jo̱ ñánda tíbitjo nandá, mìkiì ko̱ma ki̱tjo nandá jnchra koa̱ ki̱tjo nandá ndaà. 12 Jñà yá toò iko̱, ¿a ko̱maá ko̱ja̱âla̱ toò xi ‘mì aceituna? Jè yá uva, ¿a ko̱maá ko̱ja̱âla̱ toò iko̱? Jñò ndí ’ndsè k’oa̱á ti̱s’ín tjín kjoa̱ ts’e̱ nandá, jngoò nga̱jo̱ mìkiì ko̱ma ki̱tjo nandá jnchra ko̱ ki̱tjo nandá ndaà. 13 Jñà xi̱ta̱ xinguio̱o, tsà tjín i’nga xi tjínâla̱ kjoa̱ chji̱ne̱ ko̱ xi ndaà fìyaâla̱, kàtakó kjoa̱chji̱ne̱âla̱ nga indaà ikon tísíjchá yijoâla̱. 14 Jñò, tsà biì’ndeâla̱à yijoânò nga kjoa̱xìtakòn si̱jiìn ini̱ma̱ânò nga mejènânò nga jñò ki̱tsa̱jna ítjònâlà xinguio̱o, kì k’oa̱á s’ín nokjoà nga ndaà titsa̱’nè; kì ‘én ndiso nokjoà nga kondra̱ onguíâlà kjoa̱ kixi̱âla̱ Nainá. 15 Kjoa̱ chji̱ne̱ jè, mìtsà i̱t’aà ts’e̱ Nainá nchrobáâne. Kjoa̱ chji̱ne̱ ts’e̱ i̱sò’ndeâné. Kjo̱hítsjeèn ts’e̱ xi̱ta̱âné, ko̱ ti̱ ts’e̱éâne xi̱ta̱ nei̱í. 16 K’e̱ nga maxìtakònâchaá xinguia̱á ko̱ nga mejènâná nga jñá ki̱tsa̱jna ítjònâlaà, ya̱á sakóâná kjoa̱siì, ngats’iì kjoa̱ ch’o xi tjín i̱sò’nde. 17 Ta̱nga jñà xi̱ta̱ xi tjínâla̱ kjoa̱ chji̱ne̱ xi i̱t’aà ts’e̱ Nainá nchrobáâne, tsjeè síjchá yijoâla̱, kjoa̱’nchán ótsji, tjínâla̱ kjo̱ndaà, xi̱ta̱ ’nchréâné, tjínâla̱ kjo̱hi̱ma̱takòn, ndaà tjín xá xi s’ín, mì jò fìâne, ko̱ ‘én kixi̱í chja̱. 18 Jè xi̱ta̱ xi mejènâla̱ nga s’e̱ kjoa̱’nchán, ’nchán bìjnako̱ xi̱ta̱ xi i’nga méâne nga ma i̱skan sa̱kòâla̱ kjo̱ndaà xi kixi̱ tjín.