Santiago 2

1 Jñò, ndí ’ndsè, koni s’ín mokjeiínânò i̱t’aà ts’e̱ Na̱’ènâná Jesucristo xi jeya tíjna, kì chjaàjñoò xi̱ta̱ xinguio̱o. 2 Tsà jngoò xi̱ta̱ ki̱jchò ya̱ i̱’nde ñánda bixoña, xi ta̱ngò oro tíkjá na̱jnó tsja, ti̱koa̱ ‘ñó ndaà kjoàn nikje chjí xi kikjá. Jñò, tsà ‘ñó ndaà si̱s’inâlà, k’oínâla: “Ti̱jni i̱jndé ñánda ndaà choòn.” Tsà ti̱koa̱ ki̱jchò jngoò xi̱ta̱ i̱ma̱ xi kixajndàjno kixajndàt’aà nikjeâla̱, tsà k’oínâla: “Ta̱xki̱ ti̱si̱jni ya̱, ko̱ tsà majìn, ta̱xki̱ ti̱jnat’eiì ya̱ nangui." 4 Jñò, k’e̱ nga ko̱s’ín s’e̱en, xinguio̱o titsa̱nachrjekànguiò nga chjaàjñoò xi̱ta̱ xinguio̱o koni s’ín xi̱ta̱xá xi ch’o tjín kjo̱hítsjeènâla̱. 5 Jñò ndí ’ndsè xi ‘ñó matsjake̱ânò, ti̱ná’ya: Nainá xó k’oa̱á s’ín jaàjiìnâne jñà xi xi̱ta̱ i̱ma̱ xi tjín i̱ i̱sò’nde, méâne nga jñà kítsa̱jna ítjònâne koni s’ín mokjeiínâla̱ ti̱koa̱ tjoé kjo̱tjòâla̱ ngats’iì kjo̱ndaà xi Nainá tsjáâla̱ jñà xi̱ta̱ xi jè otíxomaâla̱ nga jyeé k’oa̱s’ín kitsjaà ‘énâla̱ nga tsjáâla̱ xi̱ta̱ xi matsjakeè. 6 Ta̱nga jñò, ta sa̱á nachrjekànguioò jñà xi̱ta̱ i̱ma̱. ¿A mìtsà jñà xi̱ta̱ nchi̱ná xi jñò beètoònânò nga fìko̱ânò nguixko̱n xi̱ta̱xá nga ónguiânò? 7 ¿A mìtsà jñà xi̱ta̱ nchi̱ná xi chja̱jnoâla̱ i̱t’aà ts’e̱ ‘ínâla̱ Cristo, xi jè otíxomaânò? 8 Jñò, ndaà ’nèânò tsà kixi̱ kjoa̱ nga nìkitasòn jè kjo̱tíxomaâla̱ Cristo xi otíxoma koni s’ín tíchja̱ Xo̱jo̱nâla̱ Nainá nga tsò: “Ti̱tsjachi xi̱ta̱ xingui̱i xi i’nga koni tsà ti̱ yijo tsi̱jiâne." 9 Ta̱nga tsà chjaàjñoò xi̱ta̱ xinguio̱o, tjín xi ndaà nìs’inâla̱à ko̱ tjín xi mìkiì ndaà nìs’inâla̱à, jé binchaàtsjiâla̱ yijoânò, nga nìkatonèâlà kjo̱tíxoma; ti̱jèâne kjo̱tíxoma tíbínèânò jé. 10 Nga tsà jngoò xi̱ta̱ xi ndaà síkitasòn yije kjo̱tíxoma ta̱nga tsà tà jngoò kjoa̱ síkatonèâla̱, jye kisakò jé yijeâla̱ i̱t’aà ts’e̱ kjo̱tíxomaâla̱ Nainá. 11 Nga̱ k’oa̱á tsò Nainá: “Kì kjoa̱ chijngui ’nè.” Ta̱nga ti̱koa̱á tjít’aà ñánda tsò: “Kì xi̱ta̱ nìk’eèn.” Jñò, tsà mì kjoa̱ chijngui ’nè, ta̱nga tsà xi̱ta̱ nìk’eèn, jye kisakò jéânò i̱t’aà ts’e̱ kjo̱tíxoma. 12 Jñò, k’oa̱á s’ín ti̱nókjoa̱a ko̱ k’oa̱á s’ín t’e̱en koni xi̱ta̱ xi Nainá ki̱ìndaàjiìnâla̱ tsà k’oa̱s’ín tíbitasònâla̱ koni tsò kjo̱tíxoma xi síkítsa̱jnandei̱í xi̱ta̱. 13 Jñà xi̱ta̱ xi tsjìnâla̱ kjo̱hi̱ma̱takòn i̱t’aà ts’e̱ xi̱ta̱ xi kj’ei̱í, ti̱koa̱á mìkiì s’e̱âla̱ kjo̱hi̱ma̱takòn k’e̱ nga si̱nèâla̱ kjo̱’in. Ta̱nga jñà xi tjínâla̱ kjo̱hi̱ma̱takòn, mì kjo̱’in si̱nèâla̱ k’e̱ nga si̱ndaàjiìnâla̱. 14 Ndí ’ndsè, nìmé chjíâla̱ tsà jngoò xi̱ta̱ xi tsò: “‘A̱n, mokjeiínâna i̱t’aà ts’e̱ Nainá”, tsà mìkiì tí’yaâla̱ kjo̱ndaàâla̱. Xi̱ta̱ jè, xi ta jè kjoa̱ mokjeiínâla̱, mìkiì ko̱ma ki̱tjokàjiìn kjo̱’in. 15 Tsà jngoò ’ndsé ko̱ tsà jngoò tichjaá xi tsjìnâla̱ nikje xi ókjá ko̱ tsà tsjìnâla̱ tsojmì xi kine; 16 jñò, tsà k’oínâlaà: “T’inâlà ndaàâne, ndaà chi̱kjeí nikjeâlè, ndaà chi̱ni̱i tsojmì xi mejènâlè.” Ko̱ tsà mìkiì si̱chját’aàâlà mé xi mochjeénâla̱, ni̱mé chjíâla̱. 17 K’oa̱á ti̱s’ín ma kjoa̱ xi mokjeiínâná, tsà mìkiì tí’yaâla̱ kjo̱ndaàâná, ni̱mé chjíâla̱ kjoa̱ xi mokjeiínâná. 18 Tjín i’nga xi̱ta̱ xi kjònangui, tsò: “¿A mokjeiínâlè i̱t’aà ts’e̱ Cristo?” ‘A̱n, xanâla̱: “Tí’yaáâla̱ kjo̱ndaàâna. ¿A ko̱maá ko̱kóâná nga mokjeiínâlè i̱t’aà ts’e̱ Cristo tsà ni̱mé kjo̱ndaà tì’nì? Ta̱nga ‘a̱n tìs’iìnâná kjo̱ndaà, k’oa̱á maâne kokoòâlè nga kixi̱í kjoa̱ nga mokjeiínâna." 19 Ngaji̱ ndaá tjín nga mokjeiínâlè nga jngoò ma Nainá. Ta̱nga ti̱koa̱á jñà ini̱ma̱ ch’oâla̱ nei̱í mokjeiínâla̱ nga tjín Nainá, skanda otséâné nga tsakjónâla̱. 20 Jñò, xi̱ta̱ xi tsjìnânò kjo̱hítsjeèn, ¿a mì fìyaânò nga nìmé chjíâla̱ kjoa̱ xi mokjeiínânò tsà mìkiì tí’yaâla̱ kjo̱ndaàânò? 21 Na̱’èn jchán kjìnâná Abraham, ¿méâne xi̱ta̱ kixi̱ kitsòâla̱ Nainá? Koií kjoa̱âla̱ nga ndaà kisìkitasòn koni s’ín kitsòâla̱ k’e̱ nga kitsjaà kjo̱tjò Isaac xi ki’ndíâla̱ ma nga tjínâne nga si̱ìk’en. 22 ¿A mì ‘yaâjèn nga jè Abraham koni s’ín nga kòkjeiínâla̱, k’oa̱á ti̱s’ín kisìkitasòn? Koni s’ín kisìkitasòn, ya̱á kjòjngoò kjoa̱ mokjeiínâla̱ nga ni̱mé kisìchijàt’aàâla̱. 23 K’oa̱á s’ín tsitasòn koni s’ín tíchja̱ Xo̱jo̱nâla̱ Nainá nga tsò: “Abraham kòkjeiínâla̱ i̱t’aà ts’e̱ Nainá; k’oa̱á s’ín komàâne nga Nainá kiskoétjò nga xi̱ta̱ kixi̱ kitsòâla̱.” Amigoâla̱ Nainá ki’mì Abraham. 24 Ya̱á ‘yaà, nga Nainá kjoétjò xi̱ta̱ kjoa̱ ts’e̱ kjo̱ndaà xi síkitasòn, mìtsà tà koi kjoa̱âla̱ nga mokjeiínâla̱. 25 K’oa̱á ti̱s’ín tjín ts’e̱ chjo̱ón chijngui xi ‘mì Rahab; Nainá kiskoétjò nga xi̱ta̱ kixi̱ kitsòâla̱ koií kjoa̱âla̱ kjo̱ndaà xi kis’iìn nga kitsjaà’ndeâla̱ jñà xi̱ta̱ xi ijchò katsejènâ‘ma, i̱kjoàn kisìchját’aàâla̱ nga xìn ndi̱yá kisìkasénâne xi̱ta̱ koi. 26 K’oa̱ ti̱s’ín tjín jè yijoâná, ni̱mé chjíâla̱, tíjna k’enâné tsà tsjìn ini̱ma̱âná. K’oa̱á ti̱s’ín ma kjoa̱ xi mokjeiínâná, tsà mìkiì tí’yaâla̱ kjo̱ndaàâná, ni̱mé chjíâla̱.