2 Corintios 3

1 K’e̱ nga k’oa̱’mìânòje̱n kjoa̱ koi, ¿a bìts’ia̱ ìjngoò k’aâje̱n nga ndaà nìkítsa̱jnaâje̱n yijoânaje̱n? Jñò, ¿a k’oa̱á s’ín nìkítsjeèn nga mìkiì tjí’ndeâna nga ma sìxá tsà tsjìnâna xo̱jo̱n xi jñò k’oi̱âná, o xi kj’ei̱í xi̱ta̱ tsjáâna koni s’ín síjé xi̱ta̱ xi kj’ei̱í? 2 Majìn, jñò sobàânò xi xo̱jo̱nânaje̱n ma xi tíjiìn i̱jiìn ini̱ma̱ânaje̱n. Ngats’iì xi̱ta̱ beèâné koa̱ bíxke̱jiìnâné. 3 K’oa̱á s’ín ndaà ‘yaâje̱n nga jñòânò xi koni xo̱jo̱nâla̱ Cristo xi i̱t’aà tsa̱je̱n kitjei. Jngoò xo̱jo̱n carta xi mìtsà tinta kitjeiâne; ko̱ó Ini̱ma̱ Tsjeèâla̱ Nainá xi tíjnakon kitjeiâne; mìtsà nda̱jo̱ kitjeit’aà; ya̱á kitjeit’aà yijo ini̱ma̱âla̱ xi̱ta̱. 4 Kjoa̱ koi, k’oa̱á s’ín makixi̱ya nga i̱t’aà ts’e̱ Cristo mokjeiínânaje̱n i̱t’aà ts’e̱ Nainá. 5 Xi ta nga’ñó tsa̱je̱n tsjìnânaje̱n kjo̱hítsjeèn mé xi s’e̱nâje̱n. Ta̱nga jè Nainá tsjáânaje̱n kjo̱hítsjeèn k’e̱ nga mé xi ’nèâje̱n. 6 Jè Nainá tsjáânaje̱n kjo̱hítsjeèn nga chi̱’ndaâla̱ maâje̱n méâne nga ko̱ma ki̱nókjoa̱yaânaje̱n i̱t’aà ts’e̱ kjo̱ndaà xi̱tse̱ xi Nainá tsibíndaàjiìnâko̱ jñà xi̱ta̱. Mìtsà kjoa̱ ts’e̱ kjo̱tíxoma xi xo̱jo̱n tjít’aà, ts’e̱é Ini̱ma̱ Tsjeèâla̱ Nainá. Jè kjoa̱ xi ts’e̱ kjo̱tíxoma sík’enâná nga nguixko̱n Nainá, ta̱nga jè Ini̱ma̱ Tsjeèâla̱ Nainá síkíjnakonâná. 7 Jè kjo̱tíxoma xi kitjoéâla̱ Moisés xi nda̱jo̱ kitjeit’aà, kjoa̱ biyaà j’iìko̱. Ta̱nga k’e̱ nga sa̱ kitjoé ítjònâla̱ kjo̱tíxoma jè, k’oa̱á s’ín ki’yaâla̱ kjoa̱ jeyaâla̱ Nainá. Jè Moisés, k’e̱ nga j’iìâne nga kiì mijìnâjno nindoò, jñà xi̱ta̱ Israel mìkiì komà kiskoò’an Moisés nga ‘ñó ote ni’ín kji i̱sénâla̱; ta̱nga xi komà i̱skan, chaán kichijà xi ote kji i̱sénâla̱. Tsà k’oa̱á s’ín kis’eâla̱ kjoa̱jeya, jè kjoa̱ xi tjínèâla̱ nga chi̱ja, 8 ìsa̱ jeya tjín kjo̱ndaà xi̱tse̱ xi tsjáâná Nainá k’e̱ nga tsjáâná Ini̱ma̱ Tsjeèâla̱. 9 Nga jeya j’iì jè kjo̱tíxoma xi kjoa̱ biyaà tsibínèâná, ìsa̱á ‘ñó jeya ki̱tasòn ‘én xi nokjoàyaâje̱n nga xi̱ta̱ kixi̱ síkítsa̱jnaâná Nainá. 10 Na̱s’ín ‘ñó kis’eâla̱ kjoa̱ jeya jè kjo̱tíxoma xi jye tsato, ta̱nga mìkiì mangásònâko̱ jè kjoa̱jeya xi tjínâla̱ kjo̱ndaà xi̱tse̱; ìsa̱á ‘ñó jeya tíjna. 11 Tsà jè kjoa̱ xi tíchijangui kis’eâla̱ kjoa̱ jeya, ìsa̱á jeya tjín kjoa̱ xi̱tse̱ xi mì ti̱ kiì chi̱jaâne ni̱ta̱ kjéâne. 12 Nga tíjngoò takònâje̱n nga titsa̱chiñáâla̱je̱n kjoa̱ koi, k’oa̱á maâne nga mìkiì masobàânaje̱n nga nokjoáâje̱n. 13 Mìtsà k’oa̱s’ín ’nèâje̱n koni kis’iìn Moisés nga nikje tsibíjtsa i̱sénâla̱, méâne nga jñà xi̱ta̱ Israel mìkiì komà kiskoò’anâne nga jye tíchijangui xi ote kji i̱sénâla̱. 14 Ta̱nga jñà xi̱ta̱ Israel kjòtájaàjiìn kjo̱hítsjeènâla̱. Skanda na̱chrjein i̱’ndei̱, k’e̱ nga bíxke̱jiìn Xo̱jo̱nâla̱ Nainá xi tjít’aà kjoa̱ jchínga xi tsibíndaàjiìnâko̱ xi̱ta̱, tákó k’oa̱á s’ín maâla̱ koni tsà nikje xo̱ba̱ kijtsa kjo̱hítsjeènâla̱. Ta̱ jngoó i̱t’aà ts’e̱ Cristo ko̱ma tjáxìn nikje jè. 15 Skanda na̱chrjein i̱’ndei̱, jñà xi̱ta̱ Israel, k’e̱ nga bíxke̱jiìn xo̱jo̱n xi kiskiì Moisés, tákó k’oa̱á s’ín maâla̱ koni tsà nikje xo̱ba̱ tíjtsa’ma kjo̱hítsjeènâla̱. 16 Ta̱nga k’e̱ nga jngoò xi̱ta̱ síkjahatjìyaâla̱ kjo̱hítsjeènâla̱ nga fìt’aàâla̱ Na̱’ènâná xi otíxomaâná, tjáxìnâla̱ nikje xo̱ba̱ xi tíjtsa’ma kjo̱hítsjeènâla̱. 17 Nga̱ jè Na̱’ènâná, jè sobàâné xi Ini̱ma̱ Tsjeèâla̱ Nainá. Ya̱ ñánda tíjna Ini̱ma̱âla̱ Na̱’ènâná, jñà xi̱ta̱ títsa̱jnandei̱íâné kjoa̱ ts’e̱ kjo̱tíxoma. 18 Ngats’iaá jñá mì ti̱ nikje xo̱ba̱ tíjtsa’maâne kjo̱hítsjeènâná. I̱t’aà tsa̱ján k’oa̱á s’ín ngayaâla̱ koni jngoò chi̱tsín xi ma chìtsejènâyá xi okó kjoa̱ jeyaâla̱ Na̱’ènâná. Kjit’aà na̱chrjein ìsa̱ jeya tíhotsejèn koni kji Na̱’ènâná nga jè Ini̱ma̱ Tsjeèâla̱ tísíkjatjìyaâná.