1 Tesalonicenses 5

1 Ndí ’ndsè ko̱ ndí tichjaá, mìkiì mochjeén nga xo̱jo̱n si̱t’aàânò mé na̱chrjeinâne nga o̱ko̱ma. 2 Jñò, nga̱ jyeé ndaà tíjiìnânò, jè na̱chrjein k’e̱ nga kjoi̱í ìjngoò k’a Na̱’ènâná Jesucristo, k’oa̱á s’ín kjoi̱í koni jngoò xi̱ta̱ chijé xi f’iì nga ni̱tje̱n k’e̱ nga ni̱yá xi nchikoñaáâla̱. 3 K’e̱ nga ki̱tso̱ jñà xi̱ta̱: “‘Nchán titsa̱jnaá, ni̱mé kjoa̱ tjín.” K’e̱é tà ni̱to̱ón ki̱tjojenèâla̱ kjo̱xkón koni s’ín mat’in jngoò chjo̱ón xi bijchó na̱chrjeinâla̱ nga ki’ndí ‘beé, mìkiì ko̱jnoâla̱. 4 Ta̱nga jñò ndí ’ndsè ko̱ ndí tichjaá, mìtsà i̱jiìn jñò titsa̱jnaà jñò. Ko̱ k’oa̱á maâne nga mì k’oa̱á s’ín ko̱mat’ioòn jè na̱chrjein jè, koni ma k’e̱ nga ta ni̱to̱ón fì jngoò xi̱ta̱ chijé. 5 Ta̱nga jñò, ngats’ioò, iseèn choòn ñánda titsa̱jnaà, ko̱ na̱chrjeinâné. Nga̱ jñá, mìtsà i̱jiìn jñò titsa̱jnaá ko̱ mìtsà ni̱tje̱n titsa̱jnaá. 6 K’oa̱á maâne nga mìkiì k’oa̱ s’e̱én koni s’ín xi̱ta̱ xi kj’ei̱í nga mì titsa̱jnandaàâjèn mé kjoa̱ xi tjín k’oa̱á ngayaâla̱ koni tsà kjiyijòfè. Mochjeénâné nga ki̱tsa̱jnandaá koni jngoò xi̱ta̱ xi tíjnakon, xi nguì ndaà tjín ikon. 7 Nga jñà xi̱ta̱ xi oyijòfè, k’e̱é oyijòfè k’e̱ nga jñò. Ko̱ jñà xi mach’i̱, k’e̱é mach’i̱ k’e̱ nga jñò. 8 Ta̱nga jñá, ya̱á titsa̱jnaá ñánda iseèn choòn. K’oa̱á maâne nga ndaà si̱jchá yijoâná. Jè ‘én xi mokjeiínâná ko̱ jè kjoa̱tjòcha, jñà ko̱si̱ko̱ ini̱ma̱âná koni jngoò soldado xi ndaà kijtsa ini̱ma̱âla̱ jè chrjoa̱ xi ‘mì coraza. Ko̱ k’e̱ nga nguì tíjngoò takoán nga chiñáâlá jè na̱chrjein k’e̱ nga ki̱tjokàjñaá kjo̱’in, jè ngayaâla̱ tsí’nguién ki̱cha̱ xi osìko̱ sko̱ soldado. 9 Nainá mìtsà koi xá jaàjiìnâná nga kjo̱’in tsjáâná, jéâné nga ki̱tjokàjñaá kjo̱’in i̱t’aà ts’e̱ Jesucristo xi otíxomaâná. 10 Nga jè k’en ngajoâná méâne k’e̱ nga kjoi̱í ìjngoò k’aâne, tsà titsa̱jnakoaán, ko̱ tsà jye k’eén, ya̱á ki̱tsa̱jnakoa̱á. 11 K’oa̱á maâne nga ti̱jetakòn ko̱ tjiìâla nga’ñó xinguio̱o koni s’ín jye titsa̱’nè. 12 Ndí ’ndsè ko̱ ndí tichjaá, nìjéânòje̱n kjo̱ndaà, jcha̱xkón xi̱ta̱ xi síxáko̱ânò nga jñà títsa̱jna ítjòn ya̱ i̱jiìn na̱xa̱ndáâla̱ Nainá ko̱ nga okóyaânò. 13 Ndaà jcha̱xkón ti̱koa̱ ndaà ti̱tsjacha xi̱ta̱ koi, jè kjoa̱âla̱ xá xi s’ín. ‘Nchán titsa̱jnako̱o xinguio̱o. 14 K’oa̱ ti̱s’ín bìtsi’baânòje̱n ndí ’ndsè ko̱ ndí tichjaá, ko̱t’ìnâlà nga kàtasíxá jñà xi̱ta̱ xi ta jyò tjíma nga majìnâla̱ síxá; ti̱’ñó ikon jñà xi indaà tjín ikon; ti̱chját’aàâlà jñà xi tsjìnâla̱ nga’ñó ya̱ i̱jiìn ini̱ma̱âla̱; ko̱ kàtas’eânò kjoa̱tsejta i̱t’aà ts’e̱ ngats’iì xi̱ta̱âla̱ Nainá. 15 Tsà k’e̱ nga mé kjoa̱ xi ch’o síko̱ânò xi̱ta̱ xi kj’ei̱í, ti̱kinda̱a xinguio̱o nga mì si̱ìjndà ngajoâne. Ta̱ sa̱á tìnèâlà yijoânò nga kjit’aà na̱chrjein ndaà ti̱ko̱o xinguio̱o ko̱ ngats’iì xi̱ta̱ xi kj’ei̱í. 16 Kjit’aà na̱chrjein tsja t’èâlà ini̱ma̱ânò. 17 Titsi’ba kjit’aàâlà Nainá. 18 Ni̱ta̱ mé kjoa̱âne, tjiì kjit’aàâlà kjo̱ndaà Nainá. K’oa̱á s’ín mejènâla̱ Nainá nga k’oa̱s’ín s’e̱en ngats’ioò xi mokjeiínânò i̱t’aà ts’e̱ Cristo Jesús. 19 Kì bichjoá ikònâlà xá xi s’ín Ini̱ma̱ Tsjeèâla̱ Nainá. 20 Kì nachrjekànguioò ‘énâla̱ xi̱ta̱ xi chja̱ ngajoâla̱ Nainá. 21 Ndaà ndaà chít’aà yije ngats’iì ‘én. Jñà ti̱kítsa̱jnatjò xi ndaà tsò. 22 Ngats’iì xi ch’o tsò, kì kiì nìkitasòn. 23 Jè Nainá xi tsjá kjoa̱’nchán, jngoò k’a tsjeè kàtasíkítsa̱jnaânò. Ndaà kàtasíkinda̱ ini̱ma̱ânò, yijoânò ko̱ kjo̱hítsjeènânò méâne nga ni̱mé jé s’e̱ânò jè na̱chrjein k’e̱ nga kjoi̱í ìjngoò k’a jè Jesucristo xi otíxomaâná. 24 Nga xi̱ta̱ kixi̱âné jè Nainá xi xó kiìchja̱ânò, si̱ìkitasòn yijeé kjoa̱ koi. 25 ‘Ndseé ko̱ tichjaá, titsi’batjìânáje̱n. 26 Ti̱ixot’aà ngats’iì xi̱ta̱ ’ndseé nga nguì ko̱ ini̱ma̱ânò. 27 ‘A̱n, tsjaânò o̱kixi̱ nga nguixko̱n Na̱’ènâná nga kàtaxke̱jiìnâla̱ xo̱jo̱n jè ngats’iì xi̱ta̱ na̱xa̱ndáâla̱ Nainá. 28 Jè kàtìjnako̱ânò kjo̱ndaàâla̱ Jesucristo xi otíxomaâná.