1 Pedro 2

1 Chja̱àxìnâlà yijoânò xi kjoa̱ ts’e̱n, kjoa̱ chona̱cha̱n, kjoa̱ ts’e̱ xi̱ta̱ xi jò i̱sén tjínâla̱, kjoa̱xìtakòn, ngats’iì ‘én ndiso. 2 Ko̱s’ín t’e̱en koni s’ín ndí i̱xti xi sa̱ kits’iìn nga ‘ñó síjé tsjín nga mejènâla̱ ko̱ki. K’oa̱á ti̱s’ín ‘ñó ti̱nchátsjioò jè ‘énâla̱ Nainá xi nguì ‘én tsjeè méâne nga jè ko̱jcháânò ko̱ ko̱chrjekàjiìnânò kjo̱’in Nainá, 3 nga jyeé ki’yaà jñò nga jè Na̱’ènâná, ‘ñó ndaà xi̱ta̱. 4 Jè Jesucristo, jè ngayaâla̱ jngoò nda̱jo̱ xi tíjnakon, jè xi ochrjekàngui jñà xi̱ta̱, ta̱nga Nainá xó k’oa̱á s’ín jaàjiìnâne nga ‘ñó tse chjíâla̱. Jñò, k’e̱ nga binchat’aà chrañàâlà Cristo, 5 ti̱koa̱á k’oa̱á s’ín ngayaânò koni nda̱jo̱ xi títsa̱jnakon. Nainá tísíkjeénânò koni nda̱jo̱ nga tíbíndaà ni’ya tsjeèâla̱ méâne jñò, no̱’miì tsjeè ko̱ma nga ya̱ si̱xá nga i̱t’aà ts’e̱ Jesucristo k’oi̱âlà kjo̱tjò Nainá xi jè ndaà sasénâla̱ koni s’ín okóya Ini̱ma̱ Tsjeèâla̱. 6 K’oa̱á s’ín tíchja̱ Xo̱jo̱nâla̱ Nainá nga tsò: Chítsejènâlà, ‘a̱n síkíjna jngoaà nda̱jo̱ nga’ñóâla̱ chrja̱ngui̱âla̱ ni’ya ján na̱xa̱ndá Sión, xi xó ‘a̱n jaàjiìnâna, xi ‘ñó ndaà kji ko̱ ‘ñó tse chjíâla̱. Jè xi ko̱kjeiínâla̱ i̱t’aà ts’e̱, mìkiì ko̱sobàâla̱. 7 Jñò, xi mokjeiínânò i̱t’aà ts’e̱ nda̱jo̱ jè, bixónânò: ‘ñó tse chjíâla̱. Ta̱nga jñà xi̱ta̱ xi mìkiì mokjeiínâla̱, bitasònâné koni s’ín tíchja̱ Xo̱jo̱nâla̱ Nainá nga tsò: Jè nda̱jo̱ xi tsachrjekàngui chji̱ne̱chrjó, jè xi nda̱jo̱ sko̱âla̱ ko̱ma ts’e̱ chrja̱ngui̱âla̱ ni’ya. 8 Ãjngoò k’a tjít’aà Xo̱jo̱nâla̱ Nainá ñánda tsò: Nda̱jo̱ jè, kjìn xi̱ta̱ satíngui ko̱ kjìn xi̱ta̱ ki̱xangui. Jñà xi̱ta̱ koi, k’oa̱á s’ín mat’in nga mìkiì síkitasòn koni tsò ‘énâla̱ Nainá; koií ko̱s’ín mat’inâne nga k’oa̱á s’ín ok’ìnâla̱. 9 Ta̱nga jñò, xi̱ta̱ na̱xa̱ndá xi xó kitjaàjiìnânò. Jñò, no̱’miì xi nìxáâla Cristo, jè xi xi̱ta̱xá ítjòn tíjna. Jñò, xi na̱xa̱ndá tsjeèâla̱ Nainá ‘mìânò, jngoò na̱xa̱ndá xi ya̱ nokjoàânò i̱t’aà ts’e̱ Nainá méâne nga ko̱ma ki̱nókjoa̱yaânò kjo̱ndaàâla̱ Nainá xi tsachrjekàjiìnânò kjoa̱ ts’e̱ jé ñánda jñò choòn koa̱ ya̱á kisìkítsa̱jnaânò ñánda iseèn choòn. 10 Jñò, nga sa̱ kjòtseé skanda mìtsà xi̱ta̱ na̱xa̱ndá ‘mìânò; ta̱nga i̱’ndei̱ na̱xa̱ndáâla̱ Nainá ‘mìânò. Nga sa̱ kjòtseé Nainá mìkiì mahi̱ma̱keèânò; ta̱nga i̱’ndei̱, jyeé mahi̱ma̱keèânò. 11 Jñò ndí ’ndsè xi ‘ñó matsjachaânò, bítsi’baânò koni xi̱ta̱ xi mì ti̱ nanguiânò titsa̱jnaânò xi ta titsa̱bitjaàjtoò i̱ i̱sò’nde, kì kiì biì’ndeâla yijoânò kjoa̱ ts’e̱ jé xi síjé yijoânò xi kjaánâko̱ ini̱ma̱ânò. 12 Ndaà tanguíko̱o yijoânò ya̱ i̱jiìnâla̱ xi̱ta̱ xi mìkiì mokjeiínâla̱ i̱t’aà ts’e̱ Cristo. Jñà xi̱ta̱ koi, na̱s’ín chja̱jnoânò i̱’ndei̱, ta̱nga k’e̱ nga kjoi̱í ìjngoò k’a Cristo tsjáâla̱ kjo̱ndaà Nainá koií kjoa̱âla̱ nga skoe̱xkonânò nga ndaà titsa̱’nè. 13 Nga jeya kíjnaâne Na̱’ènâná, ti̱kitasònâlà ngats’iì xi̱ta̱ i̱sò’nde xi kjo̱tíxoma tjíya tsja, jñà xi ‘ñó ’nga xá tjínâla̱, xi xi̱ta̱ sko̱âla̱ títsa̱jna; 14 ti̱koa̱ ti̱kitasònâlà jñà xi gobernador títsa̱jna nga jè xi̱ta̱xá ítjòn síkasén nga tsjáâla̱ kjo̱’in xi̱ta̱ xi kjoa̱ ótsji; koa̱ jñà xi ndaà s’ín, ndaà síkítsa̱jna. 15 Nainá k’oa̱á s’ín mejènâla̱ nga jñò, ndaà s’e̱en, méâne jñà xi̱ta̱ xi mìkiì machi̱yaâla̱ jyò kítsa̱jnaâne, nìmé ‘én ki̱chja̱ xi kondra̱ tsa̱jòn. 16 Jñò, k’oa̱á s’ín ti̱jchá yijoânò nga titsa̱jnandei̱íânò, ta̱nga kì k’oa̱á s’ín nìkítsjeèn nga tjí’ndeânò nga ch’o s’e̱en. K’oa̱á s’ín ti̱jchá yijoânò nga chi̱’ndaâla̱ Nainá maà. 17 Jcha̱xkón yije xi̱ta̱. Ti̱tsjacha xi ’ndsè chibà. Ti̱skónâchaà Nainá. Jcha̱xkón jè xi xi̱ta̱xá ítjòn tíjna. 18 Jñò xi xi̱ta̱ chi̱’nda ‘mìânò, jcha̱xkón koa̱ ti̱kitasònâlà neiânò. Mìtsà ta jñà neiânò xi ndaà síko̱ânò ko̱ xi beètjòânò, ti̱koa̱á ti̱kitasònâlà jñà xi ch’o síko̱ânò. 19 Ndaà bìtsa̱jna nga nguixko̱n Nainá jñà xi̱ta̱ xi kjo̱’in síkjeiín na̱s’ín mì jé tjínâla̱ ta jè nga̱tjìâla̱ nga machi̱yaâla̱ kó tsò Nainá. 20 Jñò, tsà kjo̱’in tsjáânò xi̱ta̱ nga jé binchaàtsjioò, ¿mé xi ndaà ki̱tsa̱jnaânò? Ta̱nga tsà kjo̱’in titsa̱nìkjioón nga ndaà ’nè, ndaà si̱ìkítsa̱jnaânò Nainá. 21 Nga koií xá kiìchja̱ânò Nainá nga jè Cristo kisìkjeiín kjo̱’in xi kjoa̱ tsa̱jòn. Tsibíjna jngoòânò chi̱ba̱ nga k’oa̱s’ín si̱kitasòn koni s’ín kisìkitasòn jè. 22 Cristo, ni̱jngoò jé tsohótsji, ko̱ ni̱jngoò ‘én ndiso kiìchja̱. 23 K’e̱ nga kiìchja̱jnoâla̱ xi̱ta̱, mìkiì tsà kiìchja̱jno ngajoâla̱. K’e̱ nga kisìkjeiín kjo̱’in, mìkiì tsà koa̱ ti̱s’ín kis’iìn ngajoâne. Ta Nainá tsibíya tsja, nga jè xi bíndaàjiìn kjoa̱kixi̱. 24 Jè sobà Cristo tsakaje̱n jéâná k’e̱ nga kisìtjoòt’aà yijoâla̱ ya̱ krò, méâne jñá ki̱tsa̱jnakonâná nga nìkitasoán xi kjoa̱ kixi̱ nga jyeé titsa̱jnat’aàxìnâlá kjoa̱ ts’e̱ jé koni tsà jye k’eén. Jè Cristo, koni s’ín kisìkjeiín kjo̱’in nga kitsì’on, jñò kjòndaáânò. 25 Jñò, nga sa̱ kjòtseé, k’oa̱á s’ín tsitjaà koni orrè xi kisìjchàaxkon ndi̱yáâla̱, ta̱nga i̱’ndei̱, jyeé inchrobàt’aàâlà Cristo koni jngoò paxtò xi síkinda̱ ini̱ma̱ânò.