1 Juan 1

1 Jè Jesús, jè ‘Ãn xi síkíjnakonâná xi tíjna skanda ti̱sa̱ tàts’enâla̱ kjoa̱. Ta̱nga i̱’ndei̱, jyeé kina’yàâla̱je̱n, ko̱ xko̱ón ki’yaânaje̱n, kichìtsejènâla̱je̱n kó kji, ti̱koa̱á ndsa̱á kinìko̱âna̱je̱n. 2 Jè ‘Ãn jè, ki’ya tsejeénâla̱. Ko̱ ki’yaânáje̱n. Ko̱ nguì kjoa̱ kixi̱âné xi bèno̱jmíâje̱n xi i̱t’aà ts’e̱. Ko̱ ti̱koa̱á bèno̱jmíyaânòje̱n jè ‘Ãn xi síkíjnakon ini̱ma̱âná ni̱ta̱ kjéâne. Jè ‘Ãn jè, k’e̱ nga ti̱sa̱ ítjòn, ya̱á tíjnat’aàâla̱ Nainá. Ta̱nga i̱’ndei̱, jyeé tsatsejènânaje̱n. 3 Bèno̱jmíânaje̱n kjoa̱ xi ki’yaâje̱n ko̱ xi kina’yàâje̱n, méâne jñá, k’oa̱ ti̱s’ín ngásòn ki̱tsa̱jnakoa̱á, koni s’ín ndaà titsa̱jnakoa̱á Nainá xi Na̱’énâná ma, ko̱ Ki’ndíâla̱ xi Jesucristo. 4 Koií xá titsa̱chjiìânòje̱n Xo̱jo̱n jè méâne nga nguì ko̱ kjo̱tsja kàtasakó kjit’aàâla̱ ini̱ma̱âná. 5 K’oa̱á s’ín tjín jñà ‘én xi tsakóyaânaje̱n Jesucristo, ko̱ koiíâné xi nokjoàyajiìnânòje̱n: Jè Nainá, kjoa̱ iseènâné. Xi i̱t’aà ts’e̱, tsjìn xi kjoa̱ jñò. 6 Tsà kixoán nga ndaà titsa̱jnakoa̱á Nainá, ta̱nga tsà ya̱á titsa̱nìjchá yijoâná ya̱ ñánda jñò choòn, ñánda tjín kjoa̱ch’o, ‘én ndisoó titsa̱nokjoá; mìtsà kjoa̱ kixi̱ xi titsa̱’né. 7 Ta̱nga tsà ya̱ titsa̱jnaá ñánda iseèn choòn, koni jè Nainá ya̱á tíjna ñánda iseèn choòn, ndaá titsa̱jnakoa̱á xinguia̱á, ko̱ jè jníâla̱ Jesucristo xi Ki’ndíâla̱ Nainá ma, sítsjeè yijeé jñà jé xi tjínâná. 8 Tsà kixoán: “Tsjìnâna jé”, ti̱jñá titsa̱chona̱cha̱nâlá yijoâná; mìtsà kjoa̱ kixi̱ xi titsa̱nokjoá. 9 Ta̱nga tsà kéno̱jmí yijeâlá Nainá jñà jé xi tjínâná, ko̱maá jè kjót’aàtakoán nga si̱ìjchàat’aàâná jéâná ti̱koa̱á si̱ìtsjeèyaâná ngats’iì kjoa̱ xi ch’o ’né. Nga̱ jè Nainá síkitasòn ‘énâla̱, ko̱ nguì kjoa̱ kixi̱í xi s’ín. 10 Ta̱nga tsà kixoán: “Kj’eè tsà jé otsjià”, jè Nainá ndisoó titsa̱nachrjekànguiaá, ko̱ mìtsà kixi̱ kjoa̱ nga mokjeiínâná jè ‘énâla̱.