1 Corintios 6

1 Jñò, k’e̱ nga tsà kjoa̱siì tjínânò ko̱ xi̱ta̱ xinguio̱o, ¿méâne jñà mejènânò koi̱ìndaàjiìnânò jñà xi̱ta̱xá xi mìtsà xi̱ta̱âla̱ Cristo? ¿A mìtsà tà jñà kàtíndaàjiìnânò xi xi̱ta̱ na̱xa̱ndáâla̱ Cristo? 2 ¿A mìtsà tíjiìnânò nga jñá xi xi̱ta̱ na̱xa̱ndáâla̱ Cristo ‘mìâná, jñá kíndaàjiìnâlá xi̱ta̱ i̱sò’nde? Tsà jñò koi̱ìndaàjiìnâlà xi̱ta̱ i̱sò’nde, ¿a mì chíkjoa̱ânò nga ta jñò kíndaàjiìnâlà xi̱ta̱ xinguio̱o kjoa̱ xi chiba tjín? 3 ¿A mìtsà tíjiìnânò nga ti̱koa̱ i̱t’aà tsa̱ján kíndaàjiìnâlá àkja̱le̱? Tsà jñá kíndaàjiìnâlá àkja̱le̱, ¿a mì ko̱maâná kíndaàjiìnâlá xi̱ta̱ xinguia̱á kjoa̱ xi tjín i̱ i̱sò’nde? 4 K’oa̱á maâne tsà ta kjoa̱ ts’e̱ i̱sò’ndeâné xi tjínânò, ti̱nókjoa̱ jngoòâlà xi̱ta̱ ’ndsè xi jñò nachrjenguioò nga ‘mìâlà ni̱mé chjíâla̱, jè kàtíndaàjiìnânò. 5 Koií koa̱ xanânò méâne nga kàtasobàânò. ¿A mìtsà tíjna jngoò xi̱ta̱ xinguio̱o xi tjínâla̱ kjo̱hítsjeèn nga ko̱maâla̱ koi̱ìndaàjiìnâla̱ xi̱ta̱ xi ’ndsé chibá? 6 Mìtsà ta koií kjoa̱âla̱ nga bixkànâko̱o xinguio̱o, skanda ya̱á onguíko̱o xinguio̱o nguixko̱n xi̱ta̱xá xi mìkiì beèxkon Nainá nga bìndaàjiìnânò. 7 Kixi̱í kjoa̱, ch’oó tjín kjoa̱ k’e̱ nga ti̱jñò bixkànâko̱ânò xinguio̱o. ¿Méâne mìtsà ta sa̱á nìkjeiínâlà xinguio̱o k’e̱ nga ch’o síko̱ânò? Ta saà ti̱kjeiínâla nga kàtasíchijéânò. 8 Ta̱nga jñò, k’oa̱á ti̱s’ín ch’o nìko̱o xinguio̱o, ti̱jñò nìchijéâlà. 9 ¿A mìtsà tíjiìnânò nga jñà xi mìtsà xi̱ta̱ kixi̱, mìkiì kjoa̱has’enâjiìn i̱’nde ñánda tíhotíxoma Nainá? Jñà xi̱ta̱ xi kjoa̱ chijngui s’ín, jñà xi xkósòn beèxkón, jñà xi̱ta̱ xi jye chixàn xi kjoa̱ chijngui s’ín, jñà xi̱ta̱ xi̱’ndè xi ti̱ x’i̱n xíkjín oyijòko̱âne, 10 jñà xi̱ta̱ chijé, jñà xi̱ta̱ tse mejèn, jñà xi̱ta̱ xi xán ‘biì, jñà xi xi̱ta̱ chja̱jnoâla̱, jñà xi̱ta̱ xi kona̱cha̱nâla̱ xíkjín nga síchijéâla̱, kì yijoânò chona̱cha̱nâlà nga jñà xi̱ta̱ xi koa̱tjín kjoa̱ch’o xi s’ín mìkiì kjoa̱has’enâjiìn ñánda tíhotíxoma Nainá. 11 Jñò, k’e̱ nga sa̱ kjòtseé k’oa̱ ti̱s’ín ki’nè i’nga; ta̱nga i̱’ndei̱, jye kisaníjno kjoa̱ ts’e̱ jéânò, jye xi̱ta̱ tsjeèâla̱ Nainá komà, ko̱ jye xi̱ta̱ kixi̱ komà i̱t’aà ts’e̱ nga’ñóâla̱ Jesucristo xi otíxomaâná ko̱ i̱t’aà ts’e̱ Ini̱ma̱ Tsjeèâla̱ Nainá. 12 Tjín i’nga xi̱ta̱ xinguio̱o xi tsò: “‘A̱n tjí’ndeéâna ni̱ta̱ mé kjoa̱ xi s’iaàn.” Kixi̱í kjoa̱ tjí’ndeâné, ta̱nga mìkiì ok’ìnâla̱ tsà k’oa̱s’e̱n yijeé ngats’iì kjoa̱; k’oa̱á maâne, ‘a̱n, mìkiì tsjaà’ndeâla̱ yijoâna̱ nga si̱ìkijneâna jngoò kjoa̱. 13 Ti̱koa̱á tjín i’nga xi tsò: “Jñà tsojmì xi ma chine, ts’e̱é i̱ndso̱’bá, koa̱ jè i̱ndso̱’bá mochjeénâla̱ tsojmì xi ma chine.” Kixi̱í kjoa̱, ta̱nga ingajò kjoa̱ koi, Nainá si̱ìkjehet’aà. Ta̱nga jè yijoâná, mìtsà ko̱s’ín ko̱chjeén nga kjoa̱ chijngui s’e̱én; i̱t’aà ts’e̱ Nainá ko̱chjeén; yijoâná, ts’e̱é Nainá. 14 Koni s’ín kis’iìn Nainá nga kisìkjaáyaâla̱ Na̱’ènâná Jesús, jñá k’oa̱á ti̱s’ín kjoa̱áyaâná i̱t’aà ts’e̱ kjoa̱ biyaà nga tjínâla̱ nga’ñó Nainá. 15 ¿A mìtsà tíjiìnânò nga jè yijoâná, ya̱á tíkjoòko̱ ts’e̱ Cristo? ¿A ko̱maá si̱kjeén yijoâla̱ Cristo nga si̱jngoòt’aàâlá ts’e̱ chjo̱ón ská? Majìn, mìkiì ko̱ma. 16 ¿A mìtsà ‘yaà, k’e̱ nga jngoò xi̱ta̱ x’i̱n, tsà chjo̱ón ská kíjnako̱, jngoò yijoó ko̱ma? Nga k’oa̱á s’ín tíchja̱ Xo̱jo̱nâla̱ Nainá nga tsò: Ingajò xi̱ta̱ koi, jngoò yijoó ko̱ma. 17 Ta̱nga jè xi Na̱’ènâná tíjnako̱, ya̱á majngoòko̱ ini̱ma̱âla̱ ko̱ ts’e̱ Na̱’ènâná. 18 Ti̱nchat’aàxìnâlà kjoa̱ chijngui. Jngoò xi̱ta̱, ni̱ta̱ mé jé xi ótsji xi kj’ei̱í jé, mìtsà yijoâla̱ tíbeètoòn. Ta̱nga jè xi̱ta̱ xi kjoa̱ chijngui s’ín, yijoâla̱á beètoòn. 19 ¿A mìtsà tíjiìnânò nga jè yijoânò ni’yaâla̱ Ini̱ma̱ Tsjeèâla̱ Naináâné xi jñò kitsjaàânò Nainá nga tíjnajiìn ini̱ma̱ânò? Yijoânò, mìtsà ti̱ tsa̱jònânò. 20 Nainá jye tsakatseânò, tseé tsibíchjítjìânò. Koií kjoa̱âla̱ jcha̱xkón Nainá, ndaà ti̱kjeén yijoânò nga ts’e̱é Nainá.