1 Corintios 5

1 Jye na’yàâla̱ nga kjoa̱chijngui tíma i̱jiìn tsa̱jòn. Kjoa̱ xi tíma, skanda jñà xi̱ta̱ xi mìkiì beèxkón Nainá, mì k’oa̱á s’ín. Nga ya̱á tíjnajiìn jngoòânò xi̱ta̱ xinguio̱o xi nea̱jònâla̱ tsóhoko̱. 2 Jñò, ¿méâne ’nga nìkítsa̱jnaânò yijoânò? Mochjeénâné nga kjoa̱ba ki̱tsa̱jnajñoò, ko̱ jè xi̱ta̱ xi ko̱tjín jé tíhótsji, ti̱nachrjekàjioòn. 3 ‘A̱n, kixi̱í kjoa̱, kjiìn tìjna̱ânò, ta̱nga kjo̱hítsjeènâla̱ ini̱ma̱âna̱ ya̱á tíjnajiìn osenânò. ‘A̱n, k’oa̱á ngayaâla̱ koni tsà ya̱ tìjna̱jiìnânò, jyeé kiskoòsònâla̱ mé kjo̱’in xi si̱nèâla̱ jè xi̱ta̱ xi k’oa̱ tjín jé tíhótsji. 4 Jñò, k’e̱ nga ko̱xkóya nga jeya si̱kíjna Jesucristo xi otíxomaâná, jè kjo̱hítsjeènâla̱ ini̱ma̱âna̱ ya̱á kíjnajiìnânò, ti̱koa̱ ya̱á kíjnajiìnânò jè nga’ñóâla̱ Na̱’ènâná Jesucristo. Ko̱ i̱t’aà ts’e̱ Na̱’ènâná Jesucristo, 5 xi̱ta̱ jè, xi̱ta̱ nei̱í kàtanga̱tsja yijoâla̱ nga kàtas’eâla̱ kjo̱’in, ko̱ kàtasíkájno jéâla̱ nga mì ti̱ jé ko̱hótsjiâne méâne nga ki̱tjokàjiìnâne kjo̱’in ini̱ma̱âla̱, k’e̱ nga kjoi̱í ìjngoò k’a Jesucristo xi otíxomaâná. 6 Mìkiì ndaà tjín nga ’nga nìkítsa̱jna yijoânò. ¿A mì tíjiìnânò nga na̱s’ín ta̱ chiba na̱’yo̱ san sísan yije xíkjín na̱’yo̱? 7 Ti̱nachrjekàjioòn jè xi̱ta̱ xi ótsji jé k’oa̱á ngayaâla̱ koni tsà na̱’yo̱ san xi mì ti̱ ndaàâne nga síkits’ónânò, méâne jñò k’oa̱s’ín kjoàn ko̱maânò koni na̱’yo̱ xi̱tse̱ ts’e̱ i̱nchra̱jín xi tsjìnâla̱ na̱’yo̱ san. Nga jñò, jyeé kitjaàxìnânò kjoa̱ ts’e̱ jé koni na̱’yo̱ san jchínga nga jè Cristo k’en ngajoâná koni jñà orrè xi kisìk’en xi̱ta̱ Israel k’e̱ nga Paxko̱. 8 Koií kjoa̱âla̱ jñá, k’oa̱á s’ín ki̱náchrjeé s’eí nga jyeé kisìkítsa̱jnandei̱íâná Nainá kjoa̱ ts’e̱ jé, koni s’ín xi̱ta̱ Israel k’e̱ nga Paxko̱ nga sítsjeè ni’yaâla̱ nga faáxìn yije na̱’yo̱ san. Jñá, k’oa̱á ti̱s’ín chja̱àxián kjoa̱ ts’e̱ jé ko̱ kjoa̱ ch’o ko̱ nguì kjoa̱tsjeè ko̱ kjoa̱kixi̱ si̱kjeén k’oa̱á ngayaâla̱ koni i̱nchra̱jín xi tsjìnâla̱ na̱’yo̱ san. 9 Jè xo̱jo̱n xi kisìkasén ítjònânò, k’oa̱á kixanânò nga mì ya̱ koa̱hijtako̱o jñà xi̱ta̱ xi kjoa̱ chijngui s’ín. 10 K’e̱ nga k’oa̱ kixanânò, mìtsà jñà kisìkaxkia̱ jñà xi̱ta̱ i̱sò’nde xi kjoa̱ chijngui s’ín, ko̱ jñà xi tse mejènâla̱, ko̱ jñà xi̱ta̱ chijé, ko̱ jñà xi xkósòn beèxkón. Xi̱ta̱ koi, xki̱ xi ján satíkjoò. Ta jè xi ko̱ma ki̱nchat’aàxìnâlà tsà xìn i̱sò’nde onguió. 11 Jñà ‘én xi kixanânò, jèâné nga mì ya̱ tsjahijtako̱o jñà xi tsò nga xi̱ta̱âla̱ Cristo xi ’ndsè chibá tsà tákó kjoa̱ chijngui nchis’ín, xi̱ta̱ xi tse mejènâla̱, xi xkósòn beèxkón, xi ch’o chja̱jnoâná, xi xán ‘biì, xi chijé s’ín. Jñà xi̱ta̱ xi k’oa̱s’ín s’ín, skanda mìkiì mochjeén nga ki̱chiko̱o. 12 Mìtsà jñá oko̱âná nga bíndaàjiìnâlá jñà xi̱ta̱ i̱sò’nde. Jè Nainá ki̱ìndaàjiìnâla̱ jñà xi̱ta̱ koi. Ta̱nga jñò oko̱ânò nga kíndaàjiìnâlà xi̱ta̱ na̱xa̱ndáâla̱ Nainá xi tsa̱jòn. K’oa̱á maâne nga xanânò, chja̱àxiòn jè xi̱ta̱ xi ch’o tís’ín xi ya̱ tíjnajiìnânò.