1 Corintios 3

1 Jñò ndí ’ndsè ko̱ tichjaá, mìkiì komà ko̱s’ín kichjàko̱ânò koni xi̱ta̱ xi ndaà tíjiìn ini̱ma̱âla̱ Ini̱ma̱ Tsjeèâla̱ Nainá. Ta k’oa̱á s’ín kichjàko̱ânò koni tsà ta̱xki̱ xi̱ta̱ i̱sò’nde xi tà kjoa̱ ts’e̱ yijoâla̱ ótsji, koni tsà tákó ndí i̱xti xó xi i̱t’aà ts’e̱ Cristo. 2 Mìtsà ‘in tjín ‘én xi tsakoòyaânò; k’oa̱s’ín ngayaâla̱ koni ndí i̱xti xó xi sa̱ nchihoki, tà tsjín ‘biì, mìtsà tsojmì tájaà kine. Jñò, kj’eè kiì ndaà fahas’enâjiìnânò ‘énâla̱ Nainá, k’oa̱á ngayaâla̱ koni tsojmì tájaà xi kj’eè kiì ma chine skanda na̱chrjein i̱’ndei̱. 3 Tákó k’oa̱á s’ín ’nè koni s’ín xi̱ta̱ xi kjoa̱ ts’e̱ yijoâla̱ ótsji. Machi̱ni̱chaânò xinguio̱o, chitiyaânò ni̱ta̱ mé kjoa̱âne. Kjoa̱ koi, kjoa̱ ts’e̱ xi̱ta̱ i̱sò’ndeâné. 4 K’e̱ nga bixón: “‘A̱n, xi̱ta̱ ts’e̱ Pabloâná”, ko̱ jè xi ìjngoò tsò: “‘A̱n, xi̱ta̱ ts’e̱ Apolosâná”, jñò, k’oa̱á s’ín nokjoà koni chja̱ xi ta̱xki̱ xi̱ta̱ i̱sò’nde. 5 ‘A̱n xi Pablo ‘mìâna, ko̱ Apolos, tà xi̱ta̱ chi̱’ndaânáje̱n xi nìxáâla̱je̱n Nainá. I̱t’aà tsa̱je̱én kòkjeiínânò ‘énâla̱ Nainá, nga ìjngoò ìjngoòâje̱n ki’nèâje̱n xá xi Na̱’ènâná kisìnga̱tsjaânaje̱n. 6 ‘A̱án tsakoòyaânò ‘énâla̱ Nainá, k’oa̱á ngayaâla̱ koni jngoò xi̱ta̱ xi bítje̱ xojmá, jè Apolos kiskinìndáâla̱, ta̱nga jè Nainá tísíjchá. 7 Mìtsà jè xi̱ta̱ xi bítje̱ tsojmì, ni̱ mìtsà jè xi kinìndáâla̱ xi chjíâla̱, ta̱ jngoò jè Nainá xi síjchá tsojmì xi sitje̱ xi ‘ñó chjíâla̱. 8 Jè xi bítje̱ ko̱ xi kinìndáâla̱, ta jngoò xá tjínâne xi s’ín. Ta̱nga jè Nainá tsjáâla̱ chjíâla̱ koni tjín xá xi kis’iìn nga jngoò ìjngoò. 9 Ngaje̱n, ya̱á ta̱ña nìxákjoòâje̱n xáâla̱ Nainá. Koa̱ jñòânò i̱’nde ñánda sitje̱ ‘énâla̱ Nainá. Ti̱koa̱á jñòânò ni’yaâla̱ Nainá xi ngaje̱n bíndaàâje̱n. 10 Koni s’ín tjín kjo̱ndaàâla̱ Nainá xi kitjoéâna, ‘a̱nâná xi chji̱ne̱ chrjó ítjòn, xi tsibijnà tàts’en chrjóâla̱ ni’ya. Kj’ei̱í xi̱ta̱á bíndaàsòn ni’ya. Ta̱nga jñà xi bíndaàsòn, ndaà kàtasíkinda̱ nga jngoò ìjngoò kós’ín ki̱ìndaà. 11 Mì ti̱ yá xi ko̱maâla̱ ki̱ìjna ìjngoòâìsa tàts’en chrjó ni’ya koni jè xi jye tíjna, nga jè Jesucristo tíjna koni tàts’en chrjó ni’ya. 12 Tàts’en chrjó ni’ya, ko̱maá sindaàsònâne ki̱cha̱ oro, plata, nda̱jo̱ chjí xi ‘ñó ndaà kjoàn, na̱s’ín yá, na̱s’ín xka̱ paja, o xka̱ ndi̱ji. 13 Ta̱nga jñà xá xi s’ín nga jngoò ìjngoò xi̱ta̱, k’e̱é jcha̱âla̱ jè na̱chrjein k’e̱ nga si̱ndaàjiìnâla̱ xi̱ta̱. Na̱chrjein jè, ni’ín kjoi̱íko̱, koa̱ jè ni’ín skót’aà nga jngoò ìjngoò ska̱ya xá xi komà. 14 Tsà jngoò xá ki̱chìkjoa̱ko̱âla̱ ni’ín xi skót’aà, tjoéâla̱ chjíâla̱ jè xi̱ta̱ xi ki̱ìndaàsòn. 15 Ta̱nga tsà jè xá xi kisindaàsòn, tsà ki̱ti̱, chijaá chjíâla̱. Ta̱nga jè xi̱ta̱ ki̱tjokàjiín kjo̱’in koni jngoò xi̱ta̱ xi bitjokàjiìn ni’ín. 16 Jñò, ¿a mìtsà tíjiìnânò nga ni’ya i̱ngo̱ tsjeèâla̱ Nainá ‘mìânò? Nga jè Ini̱ma̱ Tsjeèâla̱ Nainá tíjnajiìnânò. 17 Tsà yá xi̱ta̱ xi mejènâla̱ si̱ìkits’ónâjiìnâla̱ ni’ya tsjeèâla̱ Nainá, Nainá ti̱koa̱á si̱ìkits’ónâjiìnâla̱ jè xi̱ta̱ xi k’oa̱s’ín s’i̱in. Nga jè ni’yaâla̱ Nainá, tsjeèâné. Koa̱ jñòânò xi ni’ya tsjeèâla̱ Nainá ‘mìânò. 18 Kì yijoânò chona̱cha̱nâlà, tsà yá xi k’oa̱s’ín síkítsjeèn nga ‘ñó tjínâla̱ kjo̱hítsjeèn xi ts’e̱ kjoa̱ chji̱ne̱âla̱ i̱sò’nde, ta sa̱á ko̱s’ín kàtas’ín koni tsà tsjìnâla̱ kjo̱hítsjeèn, méâne nga nguì xi̱ta̱ chji̱ne̱ ko̱maâne. 19 Jè kjoa̱ chji̱ne̱âla̱ xi̱ta̱ i̱sò’nde, i̱t’aà ts’e̱ Nainá, kjoa̱ ská tsòâla̱. Xo̱jo̱nâla̱ Nainá, k’oa̱á s’ín tíchja̱ nga tsò: “Nainá, k’oa̱á s’ín s’ín nga jñà xi̱ta̱ chji̱ne̱, ti̱jñàâne kjoa̱ maña̱âla̱ ki̱xo̱jiìnâne." 20 Jè Xo̱jo̱nâla̱ Nainá, ìjngoò k’a tjít’aà ñánda tsò: “Nainá, beèâné nga ni̱mé chjíâla̱ kjo̱hítsjeènâla̱ xi̱ta̱ xi chji̱ne̱ tsòâla̱ yijoâla̱." 21 K’oa̱á maâne, jñò, kì ni̱jngoò xi̱ta̱ xi ’nga nìkíjna. Nga̱ ngats’iì xi tjín, kjo̱ndaà tsa̱jòn yijeânò. 22 Tsà jè Pablo, tsà jè Apolos, tsà jè Cefas [xi ti̱koa̱ Pedro ‘mì], tsà jè i̱sò’nde, tsà jè kjoa̱binachon, tsà jè kjoa̱ biyaà, tsà jè na̱chrjein i̱’ndei̱, tsà jè na̱chrjein xi sa̱ nchrobá, kjo̱ndaà tsa̱jòn yijeânò. 23 Jñò, ts’e̱ Cristoânò, koa̱ jè Cristo ts’e̱é Nainá.