यहोशू 21

¹ तब लेवियों को पूर्वजों को परिवारों को मुख्य आदमी एलीआजार याजक, अऊर नून को टुरा यहोशू, अऊर इस्राएली वंश को पूर्वजों को परिवारों को मुख्य आदमियों को जवर आय क

² कनान देश को शीलो नगर म कहन लग्यो, “परमेश्वर न मूसा को द्वारा हम्ख बसन लायी नगर, अऊर हमरो जनावरों ख चरावन लायी मैदान भी देन की आज्ञा दी होती।”

³ तब इस्राएलियों न परमेश्वर को कहन को अनुसार अपनो अपनो हिस्सा म सी लेवियों ख चराइयों समेत हि नगर दियो।

⁴ तब कहात जाति को कुलों को नाम पर चिट्ठी निकली। येकोलायी लेवियों म सी हारून याजक को वंश को यहूदा, शिमोन, अऊर बिन्यामीन को वंशों को हिस्सा म सी तेरा नगर मिल्यो।

⁵ बाकी कहात जातियों ख एप्रैम को वंश, दान को वंश, अऊर मनश्शे को अरधो वंश को हिस्सा म सी चिट्ठी डाल क दस नगर दियो गयो।

⁶ फिर गेर्शोनियों ख इस्साकार को वंश को परिवार, अऊर आशेर, अऊर नप्ताली को वंशों को हिस्सा म सी, अऊर मनश्शे को ऊ अरधो वंश को हिस्सा म सी भी जो बाशान प्रदेश म होतो चिट्ठी डाल क तेरा नगर दियो गयो।

⁷ वंशों को अनुसार मरारी वंश ख रूबेन, गाद, अऊर जबूलून को वंशों को हिस्सा म सी बारा नगर दियो गयो।

⁸ जो आज्ञा परमेश्वर न मूसा को द्वारा दी होती ओको अनुसार इस्राएलियों न लेवियों ख चारागाह जमीन समेत यो नगर चिट्ठी डाल क दियो।

⁹ उन्न यहूदियों अऊर शिमोनियों को वंशों को हिस्सा म सी यो नगर जिन को नाम लिख्यो हंय दियो;

¹⁰ हि नगर लेवीय कहाती वंशों म सी हारून को वंश लायी होतो; कहालीकि पहिली चिट्ठी उन्कोच नाम पर निकली होती।

¹¹ मतलब उन्न उन्ख यहूदा को पहाड़ी देश म चारयी तरफ की चराइयों समेत किर्यतर्बा नगर दे दियो, जो अर्बा अनाक को बाप होतो जो हेब्रोन भी कहलावय हय।

¹² पर ऊ नगर को खेत अऊर ओको गांव उन्न यपुन्ने को टुरा कालेब ख ओकी निजी जमीन कर क् दे दियो।

¹³ तब उन्न हारून याजक को वंश ख चराइयों समेत खूनी को शरन नगर हेब्रोन, अऊर अपनी अपनी चराइयों समेत लिब्ना,

¹⁴ यत्तीर, एश्तमो,

¹⁵ होलोन, दबीर,

¹⁶ ऐन, युत्ता अऊर बेतशेमेश दियो; यो तरह उन दिनों वंशों को हिस्सा म सी नव नगर दियो गयो।

¹⁷ अऊर बिन्यामीन को वंश को हिस्सा म सी अपनी अपनी चराइयों समेत हि चार नगर दियो गयो, मतलब गिबोन, गेबा,

¹⁸ अनातोत अऊर अल्मोन।

¹⁹ यो तरह हारूनवंशी याजकों ख तेरा नगर अऊर चराइयां मिली।

²⁰ फिर बाकी कहाती को लेवी वंश को परिवारों ख एप्रैम को हिस्सा म सी कुछ नगर दियो गयो।

²¹ मतलब उन्ख चराइयों समेत एप्रैम को पहाड़ी देश म खूनी ख शरन लेन ख शकेम नगर दियो गयो, फिर अपनी चराइयों समेत गेजेर,

²² किबसैम, अऊर बेथोरोन; हि चार नगर दियो गयो।

²³ अऊर दान को वंश को हिस्सा म सी अपनी अपनी चराइयों समेत, एलतके, गिब्बतोन,

²⁴ अय्यालोन, अऊर गत्रिम्मोन; हि चार नगर दियो गयो।

²⁵ अऊर मनश्शे को अरधो वंश को हिस्सा म सी अपनी अपनी चराइयों समेत तानाक अऊर गत्रिम्मोन; हि दोय नगर दियो गयो।

²⁶ यो तरह बाकी कहातियों को वंश को सब नगर चराइयों समेत दस नगर होतो।

²⁷ फिर लेवियों को वंशों म सी गेर्शोनियों ख मनश्शे को अरधो वंश को हिस्सा म सी अपनी अपनी चराइयों समेत खूनी को शरन नगर बाशान प्रदेश को गोलान अऊर बेशतरा; हि दोय नगर दियो गयो।

²⁸ अऊर इस्साकार को वंश को हिस्सा म सी अपनी अपनी चराइयों समेत किश्योन, दाबरत,

²⁹ यर्मूत, अऊर एनगन्नीम; हि चार नगर दियो गयो।

³⁰ अऊर आशेर को वंश को हिस्सा म सी अपनी अपनी चराइयों समेत मिशाल, अब्दोन,

³¹ हेल्कात, अऊर रहोब; हि चार नगर दियो गयो।

³² अऊर नप्ताली को वंश को हिस्सा म सी अपनी अपनी चराइयों समेत खूनी को शरन नगर गलील प्रदेश को केदेश नगर, हम्मोतदोर, अऊर कर्तान; हि तीन नगर दियो गयो।

³³ गेर्शोनियों को वंशों को अनुसार उन्को सब नगर अपनी अपनी चराइयों समेत तेरा होतो।

³⁴ फिर बाकी लेवियों, मतलब मरारियों को वंशों ख जबूलून को वंश को हिस्सा म सी अपनी चराइयों समेत योकनाम, कर्ता,

³⁵ दिम्ना, अऊर नहलाल; हि चार नगर दियो गयो।

³⁶ अऊर रूबेन को वंश को हिस्सा म सी अपनी चराइयों समेत बेसेर, यहसा,

³⁷ कदेमोत, अऊर मेपात; हि चार नगर दियो गयो।

³⁸ अऊर गाद को वंश को हिस्सा म सी अपनी चराइयों समेत खूनी को शरन नगर गिलाद प्रदेश म को रामोत, महनैम,

³⁹ हेशबोन, अऊर याजेर, यो सब मिलाय क चार नगर हंय, दियो गयो।

⁴⁰ लेवियों को बाकी वंशों मतलब मरारियों को वंशों को अनुसार उन्ख बारा नगर चिट्ठी डाल क दियो गयो।

⁴¹ इस्राएलियों की निजी जमीन को बीच लेवियों को सब नगर अपनी चराइयों समेत अड़तालीस हय।

⁴² हि सब नगर अपनो चारयी तरफ की चराइयों को संग होती; इन सब नगरों की याच दशा होती।

⁴³ यो तरह परमेश्वर न इस्राएलियों ख ऊ पूरो देश दियो, जेक ओन उन्को पूर्वजों सी कसम खाय क देन ख कह्यो होतो; अऊर हि ओको अधिकारी होय क ओको म बस गयो।

⁴⁴ अऊर परमेश्वर न उन सब बातों को अनुसार, जो ओन उन्को पूर्वजों सी कसम खाय क कही होती, उन्ख चारयी तरफ सी आराम दियो; अऊर उन्को दुस्मनों म सी कोयी भी उन्को सामने टिक नहीं सक्यो; परमेश्वर न उन सब ख उन्को वश म कर दियो।

⁴⁵ जितनी भलायी की बाते परमेश्वर न इस्राएल को घराना सी कही होती ओको म सी कोयी बात भी नहीं छूटी; सब की सब पूरी भयी।