यहोशू 20

¹ फिर परमेश्वर न यहोशू सी कह्यो,

² “इस्राएलियों सी यो कहो, ‘मय न मूसा को द्वारा तुम सी शरन नगर की जो चर्चा करी होती ओको अनुसार उन्ख ठहराय लेवो,

³ जेको सी जो कोयी भूल सी यां अनजानो म कोयी ख मार डाले, ऊ वहां सी भग क शरन ले सके; येकोलायी यो नगर खून को बदला लेन वालो सी बचन लायी तुम्हरो शरन नगर ठहरेंन।

⁴ ऊ कोयी भी शरन नगर म भग क जाये, अऊर ऊ नगर की फाटक पर खड़ो होय क उन बुजूर्गों ख अपनी हकिकत बताये; बुजूर्गों ओख अपनो नगर म ले जाये, अऊर ओख रहन लायी जागा दे, जेको म ऊ उन्को संग रहे।

⁵ अऊर खून को बदला लेन वालो ओको पीछा करतो हुयो आये, त बुजूर्गों यो जान क कि ओन अपनो पड़ोसी ख अनजानो म, ओन ओको सी बिना दुस्मनी रख्यो ओख मारयो, येकोलायी ऊ खूनी ख ओको हाथ म नहीं देयेंन।

⁶ अऊर जब तक ऊ मण्डली को सामने न्याय को लायी खड़ो नहीं होयेंन, अऊर जब तक उन दिनों को महायाजक नहीं मर जाये, तब तक ऊ उच नगर म रहेंन; ओको बाद ऊ खूनी अपनो नगर ख जहां सी ऊ भग क आयो होना अपनो घर म लौट जाये।’”

⁷ येकोलायी उन्न नप्ताली को पहाड़ी देश म गलील को केदेश नगर ख, अऊर एप्रैम को पहाड़ी देश म शकेम नगर ख, अऊर यहूदा को पहाड़ी देश म किर्यतर्बा नगर ख, जो हेब्रोन भी कहलावय हय शरन नगर ठहरायो।

⁸ अऊर यरीहो को जवर को यरदन को पूर्व दिशा को तरफ उन्न रूबेन को वंश को हिस्सा म बेसेर नगर ख, जो जंगल म चौरस जमीन पर बस्यो हुयो हय, अऊर गाद को वंश को हिस्सा म गिलाद को रामोत ख, अऊर मनश्शे को वंश को हिस्सा म बाशान को गोलान नगर ख ठहरायो।

⁹ पूरो इस्राएलियों लायी, अऊर उन्को बीच म रहन वालो परदेशियों लायी भी, जो नगर यो मनसा सी ठहरायो गयो कि जो कोयी कोयी प्रानी ख भूल सी मार डाले ऊ उन म सी कोयी भी नगर म भग जाये, अऊर जब तक न्याय लायी मण्डली को सामने खड़ो नहीं होयेंन, तब तक खून को बदला लेन वालो ओख मार नहीं पाये, हि हिच नगर आय।