SAM 138

1 Mwa Guyau! Anokagutoki baisa yoku metoya onanogu komwaidona. Ausiwosi kam yakaula omitasi minasina yaubada. 2 Yeigu atovilaki m Bwala Kwebumaboma, e akululu watanawa e ayakawolaim, paila m mitakwai deli m kimadagi, e paila lokuyomitali mwada yagam deli m kwaraiwaga makwaisina vidabala goli. 3 Yoku kumapwaigu avai tuta ladouwaim, e yoku lokukwatupewolaigu metoya om peula. 4 Mwa Guyau! Komwaidona guyoula valu watanawa biyakawolaimsi, paila uula matausina bogwa eilagaisi m biga katotila. 5 Matausina biwosisi butula avaka bogwa lokuvagi, deli butula m guyugwayu saina vakaigaga. 6 Ilagoli yoku m kwabosisu saina walakaiwa, mitaga yoku kuvauli matausina ninasi watanawa. E matausina ninasi walakaiwa gala igagabila bisipepunisi metoya baisa yoku. 7 Avai tuta kabomwau komwaidona bivaulaigusi bivapataigusi, e yoku wala kukolaigu. Yoku kukwagagi agu tilaula togigasisi, e kukwatumovaigu metoya om peula. 8 Yoku bukuvagi komwaidona avaka avaka bogwa lokukwatotila. Mwa Guyau! M yebwaili ikanuvagasi goli. Mapaila ibodi wala bukuvigimkulovi paisewa makwaina avaka bogwa lokuvitouli.