यहोशू 16

¹ बाक यूसुफ उन सन्तान इन भाग चिट्टी हाक्कु ठहरूसकु आत, आंदुर सीमा यरीहो अन हाती इन यरदन गांगा टु मतलब पूर्व अन दी यरीहो अन झरना देल शुरू आगकु आ पहाळी द्याश टु आगतेला जो आळी दा आद बेतेल नगर इक पोहचुस्त;

² बेतेल टु आव लूज क्षेत्र ताका पोहचुस्त, अदिक अर्की जाती इन सीमा टु आगतेला अतारोत मा होगकु होळ्त,:

³ अदिक पश्चिम इन दी यपलेती जाती इन सीमा टु ईळुकु बाक ल्यालमागोळोद बेथोरोन इन सीमा टु आगकु गेजेर हेसुर इन जागा मा पोहचुस्त, अदिक महासमुद्र दा खतम आत.

⁴ आग मनश्शे अदिक एप्रैम हेसुर ईनोर यूसुफ उन येढ्ढु पारगोळोर औलाद तान तान हिस्सा तांकोडुर.

⁵ एप्रैमगोळ्द सीमा आंदुर्द कुलगोळ्द अनुसार ईद ठहरूस्त; मतलब आंदुर भाग इन सीमा पूर्व टु चालु आगकु अत्रोतदार टु आगतेला म्याकुचवाळा बेथोरोन ताका पोहचुस्त;

⁶ अदिक उत्तरी सीमा पश्चिम इन दी मिकमतात टु चालु आगकु पूर्व इन दी तिर्गकु तानतशीला अक पोहचुस्त, अदिक अदुर हाती टु आगतेला यानोह ताका पोहचुस्त;

⁷ बाक यानोह टु अद अतारोत अदिक नारा अक ईळुतेला यरीहो अन हाती टु आगकु यरदन गांगा मा खतम आत.

⁸ बाक अदा सीमा तप्पूह टु होटकु, अदिक पश्चिम दी होगकु, काना नाला ताका आगकु समुद्र मा होळ्त. एप्रैमिगोळ्द गोत्र अन भाग आंदुर कुलगोळ अनुसार ईल्या ठहरूस्त.

⁹ अदिक मनश्शे कुल इन हिस्सा अन न्याड्या भी थ्वाळासा नगर तान तान ऊरगोळ सांगुळ एप्रैमिगोळ साटी अलग माळकु आदव.

¹⁰ लेकीन जो कनानी गेजेर दा बसुस्कु ईरोर आंदरी एप्रैमीगोळ अल टु ईला तेगदीदुर; इदुरसाटी आंदुर कनानी आंदुर बीच ईंद इन दिन ताका बसुस्कु आर, अदिक बेगारी दा दास इन घाई क्याल्सा माळतार.