इब्रानिगोळ 3

¹ इदुरसाटी हे मसीह वार्टुरा अदिक आकतींगेरा, नीव जो परमेश्वर उन द्वारा कारूकु आगिर नीव तान ध्यान यीशु मा हचकु ईटी यारी परमेश्वर प्रमुख याजक माळोर साटी कळुकु आगीदुन, आ अदुर मा नाव तान कबुली कोळतेव.

² आव याव आऊक निवळुस्यान आ परमेश्वर उन प्रती विश्वासलायक ईरोन, ठीक हांगा ह्यांग मूसा तान क्याल्सा अन प्रती परमेश्वर उन घराना दा विश्वासलायक ईरोन.

³ ह्यांग भवन इन निर्माण माळावाळा अक खुद भवन से यक्कुल आदर सिकतद, हांग अच यीशु मूसा से यक्कुल आदर इन पात्र मान्सकु आदुन.

⁴ यतिकी हर ऊंद मान्ना अन्द यावारा ना यावारा माळावाळा ईरतान, लेकीन परमेश्वर रा सप्पा वस्तु उन माळावाळा हुन.

⁵ मूसा रा परमेश्वर उन मान्या सेवक घाई विश्वासलायक ईरोन, अदिक आव अव मातगोळी अंदुन जो भविष्य दा परमेश्वर उन द्वारा अंदकु आगोव ईरव.

⁶ लेकीन मसीह पार आगा नाता देल परमेश्वर उन मान्या विश्वासलायक आन. अदिक आऊन मान्ना नाव हुयेव, अगर नाव नाम साहस अदिक यदुर मा नाव घमण्ड माळतेव आ आशा मा मजबूती देल स्थिर ईरूल.

⁷ इदुरसाटी ह्यांग पवित्र आत्मा अनतद, “अगर ईंद परमेश्वर उन आवाज केळी,

⁸ रा तान मन इक कठोर माळबाळेतीर, ह्यांग कि निमोर पुर्वजगोळ याग आंदुर्द मरूस्थल दा परीक्षा आगोद परमेश्वर उन खिलाप बगावत माळीदुर.

⁹ परमेश्वर अनतान कि अल आंदुर नांद परीक्षा माळदुर अदिक परखुसदुर, अदिक नान क्याल्सागोळी नोळदुर यवरी ना चालीस साल टु माळतेला बरेतीन.”

¹⁰ ईद कारण ना आ समय इन लॉकुर से सिट्ट दा ईत्‍तीन, अदिक अंदीन, “इंदुर मन हमेशा टु अच अप्रामाणिक आव अदिक नान आग्या अक ठुकरूसतार.”

¹¹ इदुरसाटी ना सिट्ट दा बंदकु किर्‍या तिंदीन, “इदुरसाटी येल ना आंदरी आराम कोळाईन आ जागा दा आंदुर यागलु होग सकतीदिल.”

¹² हे वार्टुरा अदिक आकतींगेरा, सावधान ईरी कि नीम दा ईत्‍ता बेकार अदिक अविश्वासी मन आगबाळुल, जो नीमी जित्‍ता परमेश्वर से दुर ओयुल.

¹³ लेकीन ईदुर बदला यागासताका ईद “ईंद इन दिन” अनकु आगतद, नीव हर दिशी आबुर दाबुर इक धीरज कोळतेला ईरी, ताकी नीम दा टु यावारा भी पाप दा भरमुसकु ईला आगुल, अदिक ना कठोर आगेगुल.

¹⁴ अगर नाव आखरी ताका मजबूती इन सांगुळ तान सुरूवात इन आत्मविश्वास इक हुडुकु ईरतेव रा नाव मसीह अन भागीदार बनसेगतेव.

¹⁵ ह्यांग शास्त्र अनतद, “अगर ईंद नीव परमेश्वर उन आवाज केळीर, रा तान मन इक कठोर माळबाळेतीर, ह्यांग कि बगावत इन दिनगोळ दा नीम पुर्वजगोळ माळीदुर.”

¹⁶ भला आंदुर या लॉकुर ईरोर यार परमेश्वर उन आवाज केळदुर अदिक आऊन खिलाप बगावत माळदुर? येन आंदुर आ लॉकुर ईला ईरोर, यारी मूसा मिस्त्र दा टु उळ्सकु तेगदीदुन?

¹⁷ अदिक परमेश्वर चालीस वर्ष ताका याता लॉकुर से सिट्ट दा ईत्‍तुन? येन आंदुर से अच ईला यार पाप माळदुर, अदिक आंदुर लाश मरूस्थल दा बिदकु ईत्‍तव?

¹⁸ अदिक परमेश्वर याता लॉकुर साटी किर्‍या तिंदुन कि नीव नान आराम इन जागा दा प्रवेश माळ सकतीदिल? येन आंदुर ई लॉकुर आल्लच यार आऊन आग्या मान्सीदील?

¹⁹ इदुरसाटी नाव नोळतेव कि आंदुर अविश्वास इन कारण अच आ जागा दा प्रवेश माळ सकिदील.