इब्रानिगोळ 2

¹ ई कारण पायजे कि जो सत्य मातगोळी नाव केळेव, अदिक यक्कुल अच सावधानी देल अऊर मा मन हची, हिंग आगबाळुल कि वाहुसकु अऊर से दुर होटोगुल.

² यतिकी जो बातणी स्वर्गदूतगोळ द्वारा नाम पुर्वजगोळी कोटकु आत अद खरा ठहरूस्त, यार आंदुर्द उल्लंघन माळदुर आंदरी दण्ड प्राप्त आत यदुर आंदुर लायक ईरोर.

³ अगर नाव ईद महान उद्धार मा ध्यान कोटीदील रा नाव ह्यांग उळु सकतेव? यदुर चर्चा पयले पहल प्रभु उन द्वारा आत, अदिक यार केळदुर आंदुर नामी ईद साबित माळदुर कि अद उद्धार खरा आद.

⁴ अदिक सांगुळ अच परमेश्वर भी तान इच्छा अन्द अनुसार चमत्कारगोळ, अदिक अदभुत क्याल्सागोळ, अदिक अलग प्रकार इन सामर्थ्य इन क्याल्सागोळ, अदिक पवित्र आत्मा अन्द वरदानगोळी वाट्सदुर द्वारा इदुर्द गवाही कोळतेला ईत्‍तुन.

⁵ परमेश्वर आ बरावाळा दुनिया अक यदुर चर्चा नाव माळतेव, स्वर्गदूतगोळ हात्‍ती माळीदिल.

⁶ बल्‍की यावारा शास्त्र दा ईद गवाही कोटान, “मंळसा येन हुन कि नी आऊक याद माळत्या? या मंळसा येन हुन कि नी आऊंद चिंता माळत्या?

⁷ नी आऊक स्वर्गदूतगोळ से थ्वाळासा अच गोर्त माळ्द; नी आऊन मा महिमा अदिक आदर इन मुकुट ईट्द,

⁸ अदिक आऊक तान कयगोळ्द क्याल्सागोळ मा अधिकार कोट्ट नी सप्पा आऊन कालगोळ ल्यालमा माळ्द.” इदुरसाटी याग आव सप्पा येनारा आऊन हात्‍ती माळ कोंडुन, रा आव येनु भी बिटीदिल जो आऊन हात्‍ती ईला ईरोद. लेकीन ईग नाव सप्पा येनारा वस्तु आऊन हात्‍ती नोळालेव.

⁹ लेकीन नाव यीशु उक जो स्वर्गदूतगोळ से थ्वाळासा कम माळकु आगीदुन, मृत्यु उन दुख नेगदुर कारण महिमा अदिक आदर इन मुकुट हाक्‍कु नोळतेव, ताकी परमेश्वर उन अनुग्रह देल आव हर ऊंद मंळसा अन्द साटी सायुल.

¹⁰ ईद परमेश्वर उन साटी वळ्लीद हत्‍त याव सप्पा मातगोळी माळदुन अदिक संभाळ्सकु ईटदुन, यीशु उक भी यातनागोळ द्वारा परिपुर्ण माळ पायजे ताकी हापाळ सा चिकोर आऊन महिमा दा भागी आगुल. यतिकी यीशु अच आव ऊंद हुन जो आंदरी उद्धार इन दी ओयतान.

¹¹ यतिकी लॉकुरी आंदुर पापगोळ से पवित्र माळतान अदिक आंदुर येढ्ढु पवित्र माळकु आग्यार, सप्पा मुंदुरव आप्प ऊंद अच आन, इदुरसाटी यीशु आंदरी तान वार्टुर अनोर से नाचालुन.

¹² आव परमेश्वर से अनतान, “ना तान वार्टुर अदिक आकतींगेर न्याड्या दा नींद हेसुर इन प्रचार माळाईन; सभा अन्द न्याड्या दा ना नींद प्रशंसा माळाईन.”

¹³ अदिक आव ईद भी अनतान, “ना तान भरोसा परमेश्वर मा ईटाईन. अदिक अनतान, ना ईल परमेश्वर उन कोळ्द चिकोर सांगुळ आईन,”

¹⁴ इदुरसाटी याग कि पारगोळ मास अदिक रक्ता अन्द भागी आर, रा यीशु खुद भी आंदुर घाई आंदुर सहभागी आगेदुन, ताकी मृत्यु उन द्वारा शैतान उक नाश माळ सकुल मतलब यार हाती मृत्यु उन शक्ति आद;

¹⁵ ईदा रीति देल आ मंळसागोळी मुक्त माळकोमी यार्द जीवन मृत्यु उन अंज्क इन मारा गुलामी या दासत्व दा ईरोर.

¹⁶ यतिकी ईद स्पष्ट आद कि आव रा स्वर्गदूतगोळ इक ईला बल्‍की अब्राहम उन वंश इन सहायता माळतान.

¹⁷ ई कारण आऊक चाहसोद ईरोद, कि सप्पा मातगोळ दा तान वार्टुरगोळ घाई बनसुल; यदुर देल आव आ मातगोळ दा जो परमेश्वर देल संबंध ईटतद, ऊंद दयालु अदिक विश्वासलायक महायाजक बनसुल ताकी लॉकुर्द पापगोळ साटी प्रायश्चित माळुल.

¹⁸ यतिकी याग आव परीक्षा अन्द दशा दा दुख नेगदुन, रा आव आंदुर्द भी मदत माळ सकतान यार्द परीक्षा आगतद.