यहेजकेल 35

¹ यहोवा अन ईद वचन नान हाती पोहचुस्त:

² “हे मंळसा अन सन्तान, तान बाय सेईर पहाळी इन दी माळकु अदुर विरूद्ध भविष्यवाणी माळ,

³ अदिक आऊन से अन, परमेश्वर यहोवा ईद अनतान: हे सेईर पहाळी, ना नीन विरूद्ध आईन; अदिक तान कय नीन विरूद्ध वाळुस्कु नीनी ऊजाळ अच ऊजाळ माळ कोमाईन.

⁴ ना नीन नगरगोळी खंडर माळ कोमाईन, अदिक नी उजाळ आगेद्या; आग नी जान्स कोंड्या कि ना यहोवा हुईन.”

⁵ यतिकी नी इस्त्राएलीगोळ से युग-युग इन शत्रुता ईटतोग्या, अदिक आंदुरव परेशानी इन समय याग आंदुर्द अधर्म इन दंड इन समय पोहचुस्त, आग आंदरी तलवार देल सायोर साटी कोटबुट.

⁶ ईदुरसाटी परमेश्वर यहोवा अन ईद वाणी आद: नान जीवन इन किर्या, ना नीनी हत्या अन साटी होगोर साटी तैयार माळाईन अदिक रक्ता नीन पीछा माळीत; नी रा रक्ता देल न रीस्स ईला माळ्या, ई कारण रक्ता नीन पीछा माळीत.

⁷ ईदा रीती ना सेईर पहाळी इक ऊजाळ अच ऊजाळ माळ कोमाईन, अदिक जो अदुर दा होग्त-बर्त ईतीदान, ना आऊन नाश माळाईन.

⁸ ना आऊन पहाळी इक सोत्तुर से तुम कोमाईन; नीन टीलागोळ, तराईगोळ अदिक सप्पा नालागोळ दा तलवार देल सोतकु बीद्दार.

⁹ ना नीनी युग युग इन साटी ऊजाळ माळ कोमाईन, अदिक नीन नगर बाक बसुसतीदील. आग नीव जान्स कोंडीर कि ना यहोवा हुईन.

¹⁰ “यतिकी नी अंद्या, ‘ईव येढ्ढु जातीगोळ अदिक येढ्ढु द्याश नानव आदव; अदिक नाव अच अऊरव स्वामी आगेदेव,’ अगर यहोवा अल ईरोन.

¹¹ ई कारण, परमेश्वर यहोवा अन ईद वाणी आद, नान जीवन इन किर्या, नीन कोप इन अनुसार, अदिक जलजलाहट नी आंदुर मा तान सिट्ट इन कारण माळ्या, अदुर अच अनुसार ना नीन से बर्ताव माळाईन, अदिक याग ना नींद न्याय माळाईन, आग नीम दा तान इक प्रगट माळाईन.

¹² नी जानस्या कि ना यहोवा नीनव सप्पा तिरस्कार इन मातगोळ केळीन, जो नी इस्त्राएल इन पहाळीगोळ बारा दा अंद्या, अव रा ऊजळुसीग्याव, अव नामी का कोटकु आग्याव कि नाव अवरी तीन कोमुल.

¹³ नीव तान बाय देल नान विरूद्ध बळाई होळ्द, अदिक नान विरूद्ध हापाळ मातगोळ अंद; ईदरी ना केळीन.

¹⁴ परमेश्वर यहोवा ईद अनतान: याग पृथ्वी तीम दा आनंद आदीत, आग ना नींद उजाळ माळाईन.

¹⁵ नी इस्त्राएल उन घराना अन खुद इन भाग इन ऊजळुसा कारण खुश आद, ईदुरसाटी ना भी नीन से हांग अच माळाईन; हे सेईर पहाळी, हे एदोम इन सप्पा द्याश, नी ऊजळुसेद्या. आग आंदुर जान्स कोंडार कि ना यहोवा हुईन.”