यहेजकेल 34

¹ यहोवा अन ईद वचन नान हाती पोहचुस्त:

² “हे मंळसा अन सन्तान, इस्त्राएल इन चरहावा अन विरूद्ध भविष्यवाणी माळकु आ चरवाहागोळ से अन, परमेश्वर यहोवा ईद अनतान: हाय इस्त्राएल इन चरवाहा मा जो तान तान व्हाट्टा तुमतार! येन चरवाहागोळ मर्र-म्यांढ्ढागोळ्द व्हाट्टा ईला तुम पायजे?

³ नीव लॉकुर ण्याण तिनतीर, ऊन हाकतीर अदिक मोटा मोटा जनावरगोळ इक कडुतीर; लेकीन मर्र-म्यांढ्‌ढागोळ इक नीव आळसालीर.

⁴ नीव बिमारगोळी बलवान माळीदील, ना रोगीगोळी चंगा माळीर, न घायलगोळ्द घावगोळी कटीर, न तेग्द इक वापस माळीर, ना काळ्द इक ढुंढसीर, लेकीन नीव ताकत अदिक जबरदस्ती देल अधिकार नळसीर.

⁵ अव चरवाहा अन ईला ईत्तुर कारण तितर-बितर आदव; अदिक सप्पा आळी दाकळव जनावरगोळद आहार आगेदव.

⁶ नान मर्र-म्यांढ्ढा तितर-बितर आगेग्याव; अव सप्पा पहाळीगोळ अदिक ऊँचा ऊँचा टीलागोळ मा भटकुसव; नान मर्र-म्यांढ्ढा सप्पा पृथ्वी इन म्याकुच तितर-बितर आदव; अदिक ना याऊ अऊरव सुधी ताकोमोन, ना यावारा अवरी ढुंढसोन.

⁷ “ई कारण, हे चरवाहागोळा, यहोवा अन वचन केळी:

⁸ परमेश्वर यहोवा अन ईदा वाणी आद, नान जीवन इन किर्या, नानव मर्र-म्यांढ्ढा जो लुटुसीग्याव, अदिक नानव मर्र-म्यांढ्ढा जो चरवाहा अन ईला ईत्तुर कारण सप्पा आळी दाकळव जनावरगोळ्द आहार आगेदव; अदिक ईदुरसाटी कि नान चरवाहागोळ नान मर्र-म्यांढ्ढागोळ्द सुधी ताकोंडीदील, अदिक नान मर्र-म्यांढ्ढा अन ईला, तांद अच व्हाट्टा तुमदुर;

⁹ ई कारण हे चरवाहागोळा, यहोवा अन वचन केळी,

¹⁰ परमेश्वर यहोवा ईद अनतान: नोळी, ना चरवाहागोळ विरूद्ध आईन; अदिक ना आंदुर से तान मर्र-म्यांढ्ढागोळ्द लेखा ताकोमाईन, अदिक आंदरी बाक अवरी आळ्स गोळतीदील; आंदुर बाक तान तान व्हाट्टा तुम सकतीदील. ना तान मर्र-म्यांढ्ढा आंदुर बाय टु बीळसाईन कि मुंद इक अव अऊरव आहार आगबाळुल.

¹¹ “यतिकी परमेश्वर यहोवा ईद अनतान: नोळी, ना खुद अच तान मर्र-म्यांढ्‌ढागोळ्द सुधी ताकोमाईन, अदिक अवरी ढुंढसाईन.

¹² ह्यांग चरवाहा तान मर्र-म्यांढ्ढागोळ दा टु भटकुस्द इक मात तान झुंड दा जमा माळतान, हांग अच ना भी तान मर्र-म्यांढ्ढागोळ इक जमा माळाईन; ना अवरी आ सप्पा जागागोळ टु तेगुकु तराईन, येल येल अव बादल अदिक घोर अंधकार इन दिशी तितर-बितर आगेग्याव.

¹³ ना अवरी द्याश द्याश इन लॉकुर दा टु तेगाईन, अदिक द्याश द्याश टु जमा माळाईन, अदिक अऊर दा खुद इन जमीन दा तराईन; अदिक इस्त्राएल इन पहाळीगोळ मा अदिक नालागोळ दा अदिक द्याश इन सप्पा बसुस्द जागागोळ मा आळसाईन.

¹⁴ ना अवरी वळ्लीद चराई दा आळसाईन, अदिक इस्त्राएल इन ऊँचा ऊँचा पहाळी मा अवरी चराई सीक्कीत; अल अव वळ्लीद हरीयाली दा कुरतोदव, अदिक इस्त्राएल इन पहाळी मा वळ्लीद से वळ्लीद चराई चरूसेव.

¹⁵ ना खुद अच तान मर्र-म्यांढ्ढागोळोव आळसावाळा आगाईन, अदिक ना खुद अच अवरी कुरसाईन, परमेश्वर यहोवा अन ईदा वाणी हुन.

¹⁶ ना काळ्द इक ढुंढसाईन, अदिक तेग्द इक वापस तराईन, अदिक घायल इन घाव इक कटाईन, अदिक बीमार इक बलवान माळाईन अदिक जो मोटा अदिक ताकवर आद अवरी ना नष्ट माळाईन; ना अऊर्द चरवाही न्याय देल माळाईन.

¹⁷ “हे नान झुण्ड, नीम से परमेश्वर यहोवा ईद अनतान: नोळी, ना मर्र-म्यांडा अदिक व्हात इन न्याड्या न्याय माळतीन.

¹⁸ येन नीमी ईद श्याण मात जान्सकु बीळतद कि नीव वळ्लीद चराई चरूसी अदिक मिग्द चराई इक तान काल देल मेटी; अदिक येन नीमी ईद श्याण मात जान्सकु बीळतद कि नीव निर्मल नीर कुडुकोमी अदिक मिग्द नीर इक तान कालगोळ देल डवला माळी?

¹⁹ येन नान मर्र-म्यांढ्ढागोळी इक नीम कालगोळ से मेटकु आग्याव इक रचोद, अदिक नीम कालगोळ देल डवला माळ्द इक कुडोद बीद्दीत?

²⁰ “ई कारण परमेश्वर यहोवा आंदुर से ईद अनतान: नोळी, ना खुद मोटा अदिक पतला मर्र-म्यांढ्ढागोळ न्याड्या न्याय माळाईन.

²¹ नीव जो सप्पा बिमारगोळी पंजागोळ अदिक खांदा देल ईल ताका ढकलुसतीर अदिक सींग देल ईल ताका बडुतीर कि अव तीतर-बितर आगेगताव,

²² ई कारण ना तान मर्र-म्यांढ्‌ढागोळी बीळसाईन, अदिक अव बाक ईला लुटसेव, अदिक मर्र-मर्र इन म्यांढ्ढा म्यांढ्ढा अन न्याड्या न्याय माळाईन.

²³ ना आंदुर मा हींग चरवाहा ठहरुसाईन जो अऊर चरवाही माळ्यान, आव नान दास दाऊद आदान, आवा अवरी आळस्यान, अदिक आवा अऊरव आळसावाळा आदान.

²⁴ ना, यहोवा, अऊरव परमेश्वर ठहरूसाईन, अदिक नान दास दाऊद आऊन न्याड्या प्रधान आदान; ना यहोवा अच ईद अंदीन.

²⁵ “ना अऊर सांगुळ शांती इ वादा माळाईन, अदिक दुष्ट किळागोळी द्याश दा ईर गोळतीदील; अत: अव आळी दा निडर ईत्ताव, अदिक आळी दा मींगेव.

²⁶ ना अवरी अदिक तान पहाळी इन आस पास इन जागागोळी आशीष इन कारण माळ कोमाईन; अदिक मेंह अक ना ठीक समय दा बरसुसाईन; अदिक अद आशीष इन माळ आदीत.

²⁷ मैदान इन मार्र फलुसेव अदिक जमीन तान उपज पैदा माळीत, अदिक अव द्याश द्याश दा निडर ईत्तव; याग ना अऊर गुलामी अन जुवा अक मुरूकु आ लॉकुर कय देल बीळसाईन, जो अऊर से स्यावा माळसुसतार, आग आंदुर जान्स कोंडार कि ना यहोवा हुईन.

²⁸ अव बाक जाती जाती देल लुट्सकु आगतीदील, अदिक ना आळी दाकळव जनावर अवरी हरूकु तींदव; अव निडर ईत्तव, अदिक अवरी याऊ अंजुसतीदील.

²⁹ ना आंदुर साटी उपजाऊ बारी उपजुसाईन, अदिक अव द्याश दा बाक हस्तकु सायतीदील, अदिक न जाती-जाती इन लॉकुर बाक अऊर्द निंदा माळ्यार.

³⁰ आंदुर जानस्यार कि ना परमेश्वर यहोवा, अऊर सांगुळ आईन, अदिक आंदुर जो इस्त्राएल उन घराना आर, आंदुर नान प्रजा उर, ना परमेश्वर यहोवा अन ईदा वाणी आद.

³¹ नीव रा नान मर्र-म्यांढ्‌ढागोळ, नान चराई इन मर्र-म्यांढ्‌ढागोळ हुईर, नीव रा मंळसा हुईर, अदिक ना नीमव परमेश्वर हुईन, परमेश्वर यहोवा अन ईदा वाणी हुन.”