निर्गमन 36

¹ “बसलेल अदिक ओहोलीआब अदिक सप्पा बुध्दिमान यारी यहोवा हींग बुद्धि अदिक समझ कोटान कि आंदुर यहोवा अन सप्पा आग्यागोळ्द अनुसार पवित्रस्थान इन स्यावा अन साटी सप्पा प्रकार इन क्याल्सा माळोद जानसुल, आंदुर सप्पा ईद क्याल्सा माळुल.”

² आग मूसा बसलेल अदिक ओहोलीआब अदिक सप्पा बुध्दिमानगोळी यार मन दा यहोवा बुद्धि इन ऊजुळ कोटीदुन, मतलब यार यार इक हात्ती बंदकु क्याल्सा माळोद उत्साह आगित आ सप्पा मुंदुरी कार्सुसदुन;

³ अदिक इस्त्राएली जो जो भेंट पवित्रस्थान इन स्यावा अन क्याल्सा अदिक अदुर बनुसोर साटी तंदीदुर, अवरी आ मंळसागोळ मूसा अन कय देल हुडु कोंडुर. आग भी लॉकुर रोज हुंजकुका आऊन हात्ती भेंट तान इच्छा देल तरतेला ईत्तुर;

⁴ अदिक यास बुध्दिमान पवित्रस्थान इन क्याल्सा माळतोगोर आंदुर सप्पा तान तान क्याल्सा बिटकु मूसा अन हात्ती बंदुर,

⁵ आंदुर मूसा से अंदुर, “याता क्याल्सा अक माळोद आग्या यहोवा कोटान अदुर साटी याट पायजे अदुर से यक्कुल आंदुर तंदार.”

⁶ आग मूसा पुरा छावनी दा ई आग्या अन प्रचार माळसुसदुन, “येन मंळसा, येन आर्तेर, यावारा पवित्रस्थान इन साटी मात्त भेंट तरबाळुल.” ईत्ता प्रकार देल लॉकुर मात्त भेंट तरोर से रोक्सकु आदुर;

⁷ यतिकी सप्पा क्याल्सा माळोर साटी याट सामान जरूरी ईरोद, अदुर से यक्कुल माळावाळेर हात्ती होटबंदीत.

⁸ क्याल्सा माळावाळेर याट बुध्दिमान ईरोर आंदुर निवास इन साटी वाट्सद सुक्ष्म सनी इन कपळा अन, अदिक नीळा, जांभळा अदिक क्याचांद रंग इन सन इन कपळा अन हत्त पळदागोळी कळुस्द करूबगोळ सहित माळदुर.

⁹ ऊंद ऊंद पळदा अन लंबाई अठ्ठावीस कय अदिक चौळाई नाक कय इन आत; सप्पा पळदागोळ ऊंदा नाप इनव बन्सदव.

¹⁰ आव अईद पळदागोळ आबुर दाबुर से जोळ्सदुन, अदिक मात्त दुसरा अईद पळदागोळ भी आबुर दाबुर से जोळ्स बुट्टुन.

¹¹ अदिक यल ई पळदागोळ जोळ्सकु आदव अल इन येढ्ढु क्वाना मा आव नीळा नीळा फन्दागोळ हचदुन.

¹² आव येढ्ढु क्वाना दा पचास पचास फन्दागोळ ईत्ता प्रकार देल हचदुन कि अव आबुर दाबुर मुंद ईरव.

¹³ अदिक आव व्हान्ना अन पचास आकळागोळ बनुसदुन, अदिक अऊर द्वारा पळदागोळी आबुर दाबुर से हींग जोळ्सदुन कि निवास मिलुसकु ऊंद आगेत.

¹⁴ बाक निवास इन म्याकुच इन तम्बु उन म्याकुच होचोर साटी आव मर्री इन चुट्टी इन हनुन पळदागोळ बनुसदुन.

¹⁵ ऊंद ऊंद पळदा अन लंबाई तीस कय अदिक चौळाई नाक कय इन आत; अदिक हनुन पळदागोळ ऊंदा नाप इनव ईरव.

¹⁶ ईऊर दा टु आव अईद पळदागोळ अलग अदिक आर पळदागोळ अलग जोळ्सदुन.

¹⁷ अदिक यल येढ्ढु जोळ्सकु आदव अल इन क्वाना दा आव पचास पचास फन्दागोळ हचदुन.

¹⁸ अदिक आव तम्बु उन जोळसोर साटी पीतळा अन पचास आकळागोळ भी बनुसदुन यदुर देल अव ऊंद आगेगुल.

¹⁹ अदिक आव तम्बु उन साटी क्याचांद रंग देल रंगकु म्यांडागोळ्द तोगुल इन ऊंद ओळनी अदिक अदुर म्याकुच इन साटी सूइसगोळ तोगुल इन भी ऊंद ओळनी बनुसदुन.

²⁰ बाक आव निवास इन साटी बबूल इन हुळ्ली इन तखतगोळी निदुरकु ईरोर साटी बनुसदुन.

²¹ ऊंद ऊंद पाटीगोळ्द लंबाई हत्त कय अदिक चौळाई दिळ कय इन आत.

²² निवास इन सप्पा तखतगोळी आव ईत्ता प्रकार देल बनुसदुन, ऊंद ऊंद तखत दा आबुर दाबुर से जोळ्सकु येढ्ढ येढ्ढ चुलीगोळ बन्सदव.

²³ आव निवास इन साटी तखतगोळी ईत्ता प्रकार देल बनुसदुन कि दक्षिण दी ईप्पत तखतगोळ हतुल;

²⁴ अदिक ई ईप्पत इन ईप्पत तखतगोळ्द ल्यालमा बेळ्ली नव च्यालीस कुर्चीगोळ, मतलब ऊंद ऊंद तखत इन ल्यालमा अदुर येढ्ढ चुलीगोळ साटी आव येढ्ढ कुर्चीगोळ बनुसदुन.

²⁵ अदिक निवास इन दुसरा दी, मतलब उत्तर दीकळोद साटी भी आव ईप्पत तखतगोळ बनुसदुन;

²⁶ अदिक ईऊर साटी भी आव बेळ्ली इन च्यालीस कुर्चीगोळ, मतलब ऊंद ऊंद पाटीगोळ ल्यालमा येढ्ढ येढ्ढ कुर्चीगोळ बनुसदुन.

²⁷ अदिक निवास इन हींदळोद भाग दी, मतलब पश्चिम दीकळोद साटी आव आर तखतगोळ बनुसदुन.

²⁸ अदिक हींदळोद भाग दा निवास इन क्वाना अन साटी आव येढ्ढ तखतगोळ बनुसदुन.

²⁹ अव ल्यालमा टु येढ्ढ येढ्ढ भाग इनव बन्सदव, अदिक येढ्ढु भाग म्याकळव सिरा ताका ऊंद ऊंद कळा दा मिलुसकु आदव; आव आ येढ्ढु पाटीगोळ्द आकार हींग अच बनुसदुन.

³⁰ ईत्ता प्रकार देल येठ्ठ तखतगोळ आदव, अदिक अऊर्द बेळ्ली इन सॉळा कुर्चीगोळ आदव; मतलब ऊंद ऊंद तखतगोळ ल्यालमा येढ्ढ येढ्ढ कुर्चीगोळ आदव.

³¹ बाक आव बबूल इन हुळ्ली इन बेंडगोळ बनुसदुन, मतलब निवास इन ऊंद दीकळोद तखतगोळ साटी अईद बेंडगोळ,

³² अदिक निवास इन दुसरा दीकळोद तखतगोळ साटी अईद बेंडगोळ, अदिक निवास इन जो किनारा पश्चिम दी हींदळा भाग दा ईरोद अदुर साटी भी अईद बेंडगोळ बनुसदुन.

³³ अदिक आव बीच इन बेंड इक तखतगोळ बीच दा तम्बु उन ऊंद सिरा से दुसरा सिरा ताका पोहचुसोर साटी बनुसदुन.

³⁴ अदिक तखतगोळी आव व्हान्ना देल मळुसदुन, अदिक बेंडगोळ्द मान्ना अन क्याल्सा कोळावाळा कळागोळी व्हान्ना नव बनुसदुन, अदिक बेंडगोळी भी व्हान्ना देल मळुसदुन.

³⁵ बाक आव नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बीच इन पळदा बनुसदुन; अद कळाई इन क्याल्सा माळ्द करूबगोळ्द सांगुळ बनुस्त.

³⁶ आव अदुर साटी बबूल इन नाक खम्बा बनुसदुन, अदिक अवरी व्हान्ना देल मळुसदुन; अऊर हुकगोळ व्हान्ना नव बन्सदव, अदिक आव अऊर साटी बेळ्ली नव नाक कुर्चीगोळ बनुसदुन.

³⁷ आव तम्बु उन दरवाजा अन साटी भी नीळा, जांभळा अदिक क्याचांद रंग इन सन इन कपळा अन, अदिक सुक्ष्म सनी इन कपळा अन कढ़ाई इन क्याल्सा माळ्द पळदा बनुसदुन;

³⁸ अदिक आव हुकगोळ समेत अदुर्द अईद खम्बा भी बनुसदुन, अदिक अऊर सिरागोळ अदिक जोळसोद छळीगोळी व्हान्ना देल मळुसदुन, अदिक अऊर अईद कुर्चीगोळ पीतळा अन बनुसदुन.