निर्गमन 35

¹ मूसा इस्त्राएलीगोळ्द सप्पा मंडली इक जमा माळकु आंदुर से अंदुन, “याता क्याल्सागोळ्द माळोद आग्या यहोवा कोटान अव ईव हुव.

² आर दिन रा क्याल्सा-कळी माळकु आगुल, लेकीन सातवा दिशी नीम साटी पवित्र अदिक यहोवा अन साटी परम विश्राम इन दिन ठहरूसुल; अदुर दा जो यावारा क्याल्सा-कळी माळ्यान आव कोन्सुसकु आगुल;

³ उलटा विश्राम इन दिशी नीव तान तान मान्नगोळ दा बेक्‍की ताका होताक बाळेतीर.”

⁴ बाक मूसा इस्त्राएलीगोळ्द सप्पा मंडली से अंदुन, याता मात इन आग्या यहोवा कोटान अद ईद हुन.

⁵ नीम हात्ती टु यहोवा अन साटी भेंट ताकोमकु आगुल, मतलब यास तान इच्छा देल कोळोद चाहसुल आंदुर यहोवा अन भेंट माळकु ईव वस्तुगोळ तरूल; मतलब व्हान्ना, बेळ्ली, पीतल;

⁶ नीळा, जांभळा रंग इन अदिक क्याचांद रंग इन कपळा, सुक्ष्म सन इन कपळा; मर्री इन चुट्टी,

⁷ क्याचांद रंग देल रंगकु म्यांडागोळ्द तोगुल, सूइसगोळ्द तोगुल; बबूल इन हुळ्ली,

⁸ ऊजुळ कोळोर साटी याण्णा, अभिषेक इन याण्णा अदिक धूप इन साटी सुगन्धद्रव्य,

⁹ बाक एपोद अदिक चपरास इन साटी सुलैमानी मणि अदिक जळुसोर साटी मणि.

¹⁰ “नीम दा टु यास मुंदुरव दिल दा बुद्धि इन ऊजुळ आद आंदुर सप्पा बंदकु याता याता वस्तु उन आग्या यहोवा कोटान अव सप्पा बनुसुल.

¹¹ मतलब तम्बु, अदिक आवरण समेत निवास, अदिक अदुर घुंडी, पट्टीगोळ, बेंडगोळ, खम्बागोळ अदिक कुर्चीगोळ;

¹² बाक डण्डागोळ समेत सन्दुक, अदिक प्रायश्चित इन झाकनी, अदिक बीच इन पळदा;

¹³ डण्डागोळ अदिक सप्पा सामान समेत मेज, अदिक भेंट इन रोट्टीगोळ;

¹⁴ सामान अदिक दिंग्यागोळ समेत ऊजुळ कोळावाळा दीवट, अदिक ऊजुळ कोळोर साटी याण्णा;

¹⁵ डण्डागोळ समेत धूपवेदी, अभिषेक इन याण्णा, सुगन्धित धूप, अदिक निवास इन दरवाजा मा पळदा;

¹⁶ पीतल इन झंझरी, डण्डागोळ समेत होमबली वेदी, पाया समेत गंगार;

¹⁷ खम्बागोळ अदिक अऊर्द कुर्चीगोळ समेत आंगुळ इन पळदागोळ, अदिक आंगुळ इन दरवाजा मा पळदागोळ;

¹⁸ निवास अदिक आंगुळ येढ्ढु उन खुटागोळ, अदिक डोरीगोळ;

¹⁹ पवित्रस्थान दा स्यावा टहल माळोर साटी कळुस्द कपळा, अदिक याजक इन क्याल्सा माळोर साटी हारून याजक उन पवित्र कपळा, अदिक आऊन पारगोळव कपळा.”

²⁰ आग इस्त्राएलीगोळ्द सप्पा मंडली मूसा अन मुंदु टु वापस होत्त.

²¹ अदिक यास मुंदुरी उत्साह आत अदिक यास मुंदुर मन दा हींग इच्छा उत्पन्न आगित, आंदुर मिलाप इन तम्बु उन क्याल्सा माळली अदिक अदुर सप्पा स्यावा अदिक पवित्र कपळागोळ्द माळोर साटी यहोवा अन भेंट तरली हतदुर.

²² येन आर्तेर, येन मंळसागोळ, यास मुंदुर मन दा हींग इच्छा उत्पन्न आगित आंदुर सप्पा कुत्या दाकळोद हार, कीव दाकळव नथनी, ऊंगरा, अदिक बांगळा व्हान्ना अन ईसरा तरली हतदुर, ईत्ता प्रकार देल यास मंळसा यहोवा अन साटी व्हान्ना अन भेंट इन कोळावाळेर ईरोर आंदुर सप्पा मुंदुर अवरी तंदुर.

²³ अदिक याता याता मंळसा अन हात्ती नीळा, जांभळा या क्याचांद रंग इन कपळा, या सुक्ष्म सन इन कपळा, या मर्री इन चुट्टी, या क्याचांद रंग देल रंगकु म्यांडागोळ्द तोगुल, या सूइसगोळ्द तोगुल ईरव आंदुर अवरी तंदुर.

²⁴ बाक याट बेळ्ली, या पीतळा अन भेंट इन कोळावाळेर ईरोर आंदुर यहोवा अन साटी ईत्ता भेंट तंदुर; अदिक यार यार हात्ती स्यावा अन यातोदारा क्याल्सा अन साटी बबूल इन हुळ्ली ईरोद आंदुर अदरी तंदुर.

²⁵ अदिक यास आर्तेर मन दा बुद्धि इन ऊजुळ ईरोद आंदुर तान कय देल लूला कातुस कातुसकु नीळा, जांभळा अदिक क्याचांद रंग इन, अदिक सुक्ष्म सन इन कातुस्द लूला अक तंदुर.

²⁶ यास आर्तेर मन दा हींग बुद्धि इन ऊजुळ ईरोद आंदुर मर्री इन चुट्टी भी कातुसदुर.

²⁷ अदिक प्रधान लॉकुर एपोद अदिक चपरास इन साटी सुलैमानी मणि, अदिक जळुसोर साटी मणि,

²⁸ अदिक ऊजुळ कोळली अदिक अभिषेक अदिक धूप इन सुगन्धद्रव्य अदिक याण्णा तंदुर.

²⁹ याता याता वस्तु उन माळोद आग्या यहोवा मूसा अन द्वारा कोटीदुन अदुर साटी जो येनारा जरूरी ईरोद, अदरी आ सप्पा मंळसागोळ अदिक आर्तेर तंदुर, यार मन दा हींग इच्छा उत्पन्न आगित. ईत्ता प्रकार देल इस्त्राएली यहोवा अन साटी तांद अच इच्छा देल भेंट तंदुर.

³⁰ आग मूसा इस्त्राएलीगोळ से अंदुन, “केळी, यहोवा यहूदा अन गोत्रवाळेर बसलेल उक, जो ऊरी इनव पार अदिक हूर इन नातु हुन, हेसुर ताकोमकु कारस्यान;

³¹ अदिक आव आऊक परमेश्वर उन आत्मा देल हींग परिपुर्ण माळ्यान कि सप्पा प्रकार इन बनावट इन साटी आऊक ईत्ता बुद्धि, समझ, अदिक ग्यान सिक्याद

³² कि आव कारीगरी इन युक्तिगोळ तेगुकु व्हान्ना, बेळ्ली अदिक पीतळा दा,

³³ अदिक जळुसोर साटी मणि कळदुर दा अदिक हुळ्ली मा नकाशा माळदुर दा, उलटा बुद्धि देल सप्पा प्रकार इन तेग्द बनावट दा क्याल्सा माळ सकुल.

³⁴ बाक यहोवा आऊन मन दा दान इन गोत्रवाळेर अहीसामाक उन पार ओहोलीआब उन मन दा भी शिक्षा कोळोद शक्ति कोटान.

³⁵ ई येढ्ढु मुंदुर मन इक यहोवा हींग बुद्धि देल परिपुर्ण माळ्यान कि आंदुर नकाशा तेगदुर दा अदिक गळुसावाळेर अदिक नीळा, जांभळा अदिक क्याचांद रंग इन सन इन कपळा दा कातुसावाळेर अदिक बुनाई माळावाळेर आगुल, उलटा सप्पा प्रकार इन बनावट दा, अदिक बुद्धि देल क्याल्सा तेगदुर दा सप्पा प्रकार इन क्याल्सा माळुल.