Nɨawari 29

1 ‘Aixɨa xeketenahɨaweni Yawé, muyuawitsie xemɨte’i’uximayatsirie, ‘aixɨa xeketenahɨaweni Yawé witsikemɨ’ane, kemɨtitɨrɨkaɨye. 2 ‘Aixɨa xeketenahɨaweni Yawé witsikemɨ’ane mɨkɨ xeikɨa ‘aixɨa mɨtikɨhɨawaruwanikɨ, Yawé hɨxie xekenekahɨxima’uti tukitana mariweme xe’ayeitɨatɨ. 3 Yawé hiwarieya haa heima kaniuyeikani, Kakaɨyari witsimɨ’ane tɨranarieya kanayuaneni, Yawé, haa heima waɨkawa ‘uyuanekaku kaniuyeikani. 4 Yawé hiwarieya kanayuaneni tɨrɨkaɨyetɨ, Yawé hiwarieya kanayuaneni mariwetɨ. 5 Yawé hiwarieya kariuxa kanititarani, Yawé kariuxa Riwanu mieme kanititarani, 6 Riwanu hɨriyari tsikeru hepaɨ katiniutsunatsitɨwani, Heximuni hɨriyari tuuru mɨkamaxiu hepaɨ katiniutsunatsitɨwani. 7 Yawé hiwarieya tai kanitanenetsitɨwani, 8 Yawé hiwarieya makumawe kaniutayuitɨwani, Yawé makumawetsie Karetsi kaniutayuitɨwani. 9 Yawé hiwarieya tuaxa kanitikatseni meta hɨri metsekame kanikuhayeikawani, tukitana yunaitɨ mɨpaɨ mekateniuhiwani: «‘Aixɨa kani’aneni». 10 Yawé, wiyeritsie yu’uweni kanexeiyani, Yawé yuheyemekɨ katini’aitani. 11 Yawé yuteɨterima tɨrɨkariya kaniwapitɨaka, Yawé yuteɨterima ‘aixɨa kaniwayurieka kayuwatɨ wapitɨatɨ.