Nɨawari 28

1 Yawé, ne nepɨmatsihahɨawe, ’ekɨ nehetsie nunuwame pepɨhɨkɨ, pemɨka’enani hepaɨ pepɨkayɨaneni, xɨka pekanetsi’uta’eiya, kanihekɨaka nekanimɨmɨkɨ. 2 Nehiwari kenanu’eni kepauka ‘ahetsɨa nemɨye’axetsie parewiya neheuyehɨatɨ, kepauka Waɨkawa Muyepatsietsie nemamate nemeutatsetseratsie. 3 Pepɨkanetsihehanani ‘axamemɨte’u’iyari wahamatɨa, ‘axateyuruwamete wahamatɨa, ‘aixɨa memutekuxata yuhepaɨ teɨteri wahamatɨa, peru yu’iyaritsie ‘axamɨti’ane metexeɨrietɨ. 4 Yaketiniwarupitɨa kememɨte’uyuri, ‘axakememɨteyuriekaikɨ. Kememɨte’u’uximayataxɨ mɨpaɨ ketiniwarupitɨa, tita mɨtiwahetsiemieme. 5 Yawé, kemɨtiuyuri mɨpaɨ memɨkateku’eriwakɨ, meta tita mɨtiutawewi yutɨrɨkariyakɨ memɨkatematekɨ, mɨkɨ kaniwaka’unamɨkɨ, tawarita hatsuaku pɨkawaranuku’uitɨani. 6 Yawé witsiketikuxaxatsiwani, nehiwari mu’enikɨ waɨkawa ne’iwawiriekaku. 7 Yawé netɨrɨkariya kanihɨkɨtɨni meta nehetsie nunuwame, ne’iyari hetsiena katiniwiyani, mɨkɨ kaneniparewieka. Ne’iyari kaniutitsukwakani temawierikakɨ, ne’utakwitɨ pamɨpariyutsi nekanipitɨamɨkɨ. 8 Yawé yuteɨterima muwatɨrɨkariya kanihɨkɨtɨni, meta kemɨ’ane pemenayexei pekaniwikweitsitɨaka. 9 ‘Ateɨterima keniwarutawikweitsitɨa, ‘aixɨa keniwayurieka ‘ahetsɨa miemete, keniwaruwitɨximeni yuheyemekɨ muxatsi wahɨweme hepaɨ.