Nɨawari 142

1 Karima ne’utahiwatɨ, Yawé parewiya nepɨwawirie, karima ne’utahiwatɨ, Yawé nepɨwawirie mɨnetsinenimayakakɨ. 2 Mɨkɨ xeikɨa nepɨtihekɨatɨa kenemɨtiuta’aiwa, nepɨtikuxaxatɨwa kenemɨtiuka’eniwa. 3 Kepauka nemɨkayɨwenitsie, ’ekɨ matsi huye pepɨnetsixeitsitɨa. Huye nemiweiya ‘utɨma hipatɨ winiyari nehetsiemieme mepuwɨwɨtɨwa. 4 Tsiparatsɨ keneneuxeiya: nixewitɨ parewiya pɨkanetsiyetuirie. Nepɨkaheixeiya hakewa nemeyuti’awieta, xewitɨ pumawe nehepaɨtsita yu’iyaritɨatɨ. 5 Yawé, ’ekɨ parewiya nepɨmetsiwawirie, ’ekɨ ne mɨpaɨ nepɨmerahɨawe: «‘Ekɨ hakewa nemeyu’awieta pepɨhɨkɨ, ’ena kwiepa tixaɨtɨ nepɨkarexeiya, ’ekɨ xeikɨa nepɨmetsihexeiya». 6 Kenemɨmetiwawirie keneneu’eni, ne hikɨ nekaniweranini, keneneutawikweitsitɨa memɨnetsi’uweiya wahepaɨtsita, mɨkɨ matsi waɨkawa memɨtɨrɨkawikɨ. 7 Nepanutahɨiya keneniwayexɨna, nemetsinɨawatɨ nemayanikɨ. ‘Ana teɨteri ‘aixɨa memɨte’u’uwa ne’aurie mekani’axɨakuni menenieretɨ ‘aixɨa pemɨnetsi’uyurikɨ.