Nɨawari 141

1 Yawé, ’ekɨ nepɨmetsihahɨawe, yapauka kenenanu’eni. Kepauka nemɨmetsihahɨawe keneneuta’eiya kenemɨmetiwawirie. 2 ‘Ahetsɨa paitɨ kehenuani nenenewieri ‘ɨkwa mawariyari hepaɨ, teikɨ nememe’ekɨ mawari taikai mieme hepaɨ. 3 Yawé, netenitsie tihɨweme keneutaketsa, pepɨkanetsipitɨaka ‘axanemɨtikuxatanikɨ. 4 Pepɨkanetsipitɨaka ‘axanemɨtiyukɨhɨawenikɨ, meta pepɨkanetsipitɨaka kapa ‘axanetiuyurienikɨ, pepɨkanetsipitɨaka ‘ixɨararipa nemuyeikanikɨ ‘axateyuruwamete wahamatɨa. 5 ‘Aixɨa mɨti’ane kenetsiku’imaiyani, naki’eriya kenetsi’utate’ani, witsimu’ɨa ‘axateyuruwamete wapiini nemu’utsie pɨkayuhayewani, nemuyunenewiekɨ wahepaɨtsita ke’axamemɨteyuriekɨ. 6 Kepauka xe’itsɨkate ‘aitsie memakaxɨriyani, ‘ana mɨpaɨ xepɨtehetimani kename ne yurikɨ nehainekai. 7 Mɨpaɨ xepɨtiyuani: «Kwie kemɨtitawiwiwe, kepauka hararu hetsiena muye’inetɨyeikatsie, mɨpaɨta ta’umete pɨtiutaxɨri teukiyapa tetsita». 8 Yawé Ti’aitame, ‘ahetsie ne nepɨtiwiya, ‘ahetsɨa ne nepɨne’awieta, pepɨkanetsipitɨaka nemɨmierienikɨ. 9 Winiyari nehɨxie muwɨwɨtɨariwakɨ kenene’ɨwiyani, ‘axateyuruwamete menetsiwiniyatɨwekaku. 10 ‘Axateyuruwamete yuwiniyaritsietɨtɨ meke’uyewɨre, neta newikweitsitɨarietɨ neke’ayani.